ខេត្តកោះកុង ៖ តាមសេចក្តីរាយការណ៍បឋមឲ្យដឹងថា កាលពីវេលាម៉ោង៧ និង១០នាទីព្រឹកថ្ងៃទី២៤ ខែតុលា នៅភូមិកណ្តាល ឃុំតាទៃលើ ស្រុកថ្មបាំង មានករណីជ្រូកព្រៃខ្វេះបុរសម្នាក់បណ្តាលស្លាប់បាត់បង់ជីវិតនៅនឹងកន្លែង ចំណែកកូនស្រីរត់រួច ។ ជនរងគ្រោះឈ្មោះ ស្រ៊ុន ជា អាយុ៤៧ឆ្នាំ ជាកសិករ រស់នៅក្នុងភូមិ-ឃុំខាងលើ ។
បើតាមកូនស្រីជនរងគ្រោះរៀបរាប់ប្រាប់សមត្ថកិច្ចថានាព្រឹកថ្ងៃនោះ ឪពុកនាងនិងនាង បានទៅលើកលបដាក់ត្រីនៅឯស្រែ ។ ពេលទៅនោះស្រាប់តែឃើញឆ្កែកំពុងរត់ដេញជ្រូកព្រៃ១ក្បាលធំ ហើយជ្រូកព្រៃនោះបានបោលសំដៅមករកនាងនិងឪពុក ដែលទំនងជាចង់ឲ្យមនុស្សជួយ ខណៈឆ្កែកំពុងដេញខាំ ។
ផ្ទុយទៅវិញ នៅពេលបោលមកដល់ ជ្រូកព្រៃ១ក្បាលនេះ បានធ្វើការវាយប្រហារលើឪពុកនាង ដោយឈ្មុសនិងខ្វេះនឹងចែយ៉ាងសាហាវបំផុត បណ្តាលឲ្យឪពុកនាងរងរបួសហូរឈាមយ៉ាងខ្លាំងជាច្រើនកន្លែង រហូតដល់ស្លាប់មិនអាចជួយសង្គ្រោះបាន ។ ចំណែករូបនាងជាកូនស្រី នៅពេលឃើញដូច្នោះ ក៏ខំប្រឹងរត់យករួចខ្លួន ។
ក្រោយកើតហេតុ សមត្ថកិច្ចចុះទៅធ្វើកោសល្យវិច័យ រួចប្រគល់សពជូនក្រុមគ្រួសារ ដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ