រាជធានីភ្នំពេញ ៖ កម្ពុជានឹងរៀបចំបញ្ជូនពលករច្រើនទៅលើវិស័យចេញទៅបំពេញការងារនៅប្រទេសគុយវ៉េត ជាលើកដំបូង បើសិនមានលក្ខខណ្ឌការងារល្អប្រាក់ឈ្នួលខ្ពស់ និងស្របតាមអ្វីដែលពលករកម្ពុជាចង់បាន ។ នេះបើតាមការឱ្យដឹងរបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ។…
រាជធានីភ្នំពេញ ៖ កម្ពុជានឹងរៀបចំបញ្ជូនពលករច្រើនទៅលើវិស័យចេញទៅបំពេញការងារនៅប្រទេសគុយវ៉េត ជាលើកដំបូង បើសិនមានលក្ខខណ្ឌការងារល្អប្រាក់ឈ្នួលខ្ពស់ និងស្របតាមអ្វីដែលពលករកម្ពុជាចង់បាន ។ នេះបើតាមការឱ្យដឹងរបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ។
ថ្លែងក្រោយបញ្ចប់ជំនួបពិភាក្សាការងារជាមួយនឹងលោកស្រី Hind Al-Sabeeh រដ្ឋមន្ត្រីក្រសួង សង្គមកិច្ច ការងារ និងក្រសួងសេដ្ឋកិច្ចប្រទេសគុយវ៉េត កាលពីល្ងាចថ្ងៃទី២៤ ខែតុលា ឆ្នាំ២០១៨ នៅទីស្តីការក្រសួងលោកអ៊ិត សំហេង រដ្ឋមន្ត្រីក្រសួងការងារបានឱ្យដឹងថា ចំពោះគម្រោងបញ្ជូនពលករកម្ពុជាទៅធ្វើការងារនៅប្រទេសគុយវ៉េតនេះ គឺមានច្រើនវិស័យក្នុងនេះរួមមានទាំងផ្នែកសេវា ឧស្សាហកម្ម និងកសិកម្មជាដើម ។ ទាក់ទិនទៅនឹងការបញ្ជូនពលករទៅកាន់ប្រទេសតំបន់មជ្ឈឹមបូព៌ានេះដែរ លោករដ្ឋមន្ត្រីបានឱ្យដឹងបន្ថែមថា ជាការបើកចំហរបស់រាជរដ្ឋាភិបាលកម្ពុជា ពិសេសសម្តេច តេជោ ហ៊ុន សែន បានប្រកាសនាកន្លងមក ។
លោកបានឱ្យដឹងផងថា ចំពោះលក្ខខណ្ឌការងាររបស់ពលករកម្ពុជាត្រូវមាននោះ គឺត្រូវមានការបណ្តុះបណ្តាលជាមុន និងពលករត្រូវមានជំនាញ ។ ក្រៅពីនេះពលករត្រូវស្វែងយល់ពីវិស័យការងារលក្ខខណ្ឌអាកាសធាតុ ។ ព្រមជាមួយគ្នាចំពោះតម្រូវការចាំបាច់បំផុតនោះ គឺកម្ពុជាយើងត្រូវការទីផ្សារការងារ និងតម្រូវការចំនួនពលករផងដែរ ។
ដោយឡែកទាក់ទិនទៅនឹងពលករកម្ពុជាដែលរងគ្រោះនៅបរទេស ពិសេសប្រទេសអារ៉ាប់ប៊ីសាអូឌីតនាកន្លងមក ត្រូវបានលោករដ្ឋមន្ត្រីក្រសួងការងារបានឱ្យអះអាងថា ពលករកម្ពុជារងគ្រោះនៅក្រៅប្រទេស ដោយសារការបោកប្រាស់របស់មេខ្យល់ដែលនាំទៅធ្វើការមិនស្របច្បាប់ និងអ្នកខ្លះបានទៅ២០ឆ្នាំមកហើយ គឺមុនពេលដែលមិនទាន់មានកិច្ចព្រមព្រៀងទៀតផង ។ លោកបានបញ្ជាក់ថា«កន្លងមកអ្វីដែលងាយទទួលរងរំលោភបំពាន និងងាយរងគ្រោះរបស់បងប្អូនយើង ដោយសារទៅរបៀបមិនស្របច្បាប់ ។ ក្រៅពីនេះក៏មានការកេងប្រវ័ញ្ច និងការបោកប្រាស់មួយចំនួនពីសំណាក់មេខ្យល់ ។ មានអ្នកខ្លះទៅ២០ឆ្នាំតាំងតែពីមិនទាន់មានកិច្ចព្រមព្រៀងថែមទៀត» ។
លោករដ្ឋមន្ត្រីបានគូសបញ្ជាក់ទៀតថា «កម្ពុជានឹងរៀបចំកម្លាំងពលកម្មរបស់ខ្លួនដែលបានជ្រើ សរើសគ្រប់លក្ខខណ្ឌចំនួន៥ពាន់នាក់ជាលើកដំបូងទៅបម្រើការងារនៅប្រទេសគុយវ៉ែត ហើយកម្លាំងពលកម្មនេះជាកម្លាំងពលកម្មគ្រប់ផ្នែកទាំងផ្នែកសេវាកម្ម ឧស្សាហកម្ម និងកសិកម្ម ។ លោករដ្ឋមន្ត្រីបានបន្តថា ប្រសិនបើស្ថានភាពនៅប្រទេសគុយវ៉ែតល្អប្រសើរ ស្របទៅនឹងអ្វីដែលពលករកម្ពុជាទទួលយកបានមានលក្ខខណ្ឌការងារល្អ ប្រាក់ឈ្នួលសមរម្យនោះរាជរដ្ឋាភិបាលកម្ពុជានឹងជំរុញឱ្យមានការបញ្ជូនឱ្យបានកាន់តែច្រើន ។ លោករដ្ឋមន្ត្រីក៏បានសង្កត់ធ្ងន់ថា ទាំងនេះ គឺស្របទៅនឹងគោលនយោបាយ «បើកចំហទៅកាន់តំបន់មជ្ឈិមបូព៌ា» របស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រី ។ បើតាមលោករដ្ឋមន្ត្រីបានឲ្យដឹងថា កម្ពុជាគ្រោងនឹងបញ្ជូនកម្លាំងពលកម្មពីកម្ពុជានៅ ឆ្នាំ២០១៩ ហើយនៅឆ្នាំបន្តបន្ទាប់បើមានលក្ខខណ្ឌការងារល្អប្រសើរសម្រាប់គុយវ៉េតនេះ ។
គួរបញ្ជាក់ថា នាពេលកន្លងមកប្រទេសកម្ពុជាបានបញ្ជូនពលកររបស់ខ្លួនទៅបម្រើការងារនៅក្រៅប្រទេសដោយស្របច្បាប់ទៅកាន់ប្រទេសថៃ កូរ៉េខាងត្បូង សិង្ហបុរី ជប៉ុន និងប្រទេសគុយវ៉េតដើម ។ នាពេលបច្ចុប្បន្ននេះដែរ កម្ពុជាមានពលករធ្វើការនៅក្រៅប្រទេសកើនឡើងចំនួនជាង១លាន២សែននាក់ហើយ ក្នុងចំណោមនេះបាននាំមកនូវចំណូលមកកាន់ប្រទេសវិញប្រមាណជិត២ពាន់លានដុល្លារក្នុងមួយឆ្នាំ ៕
ចែករំលែកព័តមាននេះ