រាជធានីភ្នំពេញ ៖ នារីវ័យក្មេងម្នាក់បានបើករថយន្តឡិចស៊ិស RX330 ក្នុងល្បឿនលឿន រួចហើយបានគេចនិងម៉ូតូមួយគ្រឿងដែលបើកឆ្លងកាត់ ទើបធ្វើអោយរថយន្តរេចង្កូតជ្រុលទៅបុកនិងរបាំងថ្ម និងបង្កាន់ដៃដែកធ្លាក់ចូលប្រឡាយទឹកស្អុយអស់ចំនួន១កង់ និងកល់រថយន្តទៅមុខលែងរួច បណ្តាលអោយអ្នកបើកបររងរបួសផងដែរ ។
ហេតុការណ៍នេះបានកើតឡើងនៅវេលាម៉ោង១១និង៣០នាទីយប់ថ្ងៃទី២៤ ខែតុលា ឆ្នាំ២០១៨ ទុលមុខផ្ទះលេខ ១៤៩B ផ្លូវលូទឹកស្អុយ១០៥ កែងនិងផ្លូវ៤២០ សង្កាត់បឹងត្របែក ខណ្ឌចំការមន ។
តាមប្រភព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេបានឃើញនារីវ័យក្មេងម្នាក់
បានបើករថយន្តមួយគ្រឿងម៉ាកឡិចស៊ិស RX330 ពណ៌ស ពាក់ស្លាកលេខ ភ្នំពេញ ២Q-៦១៨៧ ធ្វើដំណើរតាមផ្លូវ១០៥ ក្នុងល្បឿនលឿន លុះមកដល់ចំណុចកើតហេតុ ក៍ស្រាប់តែម៉ូតូមួយគ្រឿង បានជិះឆ្លងកាត់ទទឹងផ្លូវលេខ៤២០ ក្នុងទិសដៅពីលិចទៅកើត ទើបធ្វើអោយអ្នកបើកបរបួងចង្កូតគេចខ្លាចបុកម៉ូតូនោះ ទើបធ្វើអោយរថយន្តរេចង្កូតជ្រុលទៅបុកនិងរបាំងថ្មនិងបង្កាន់ដៃដែក ធ្លាក់ចូលប្រឡាយទឹកស្អុយអស់ចំនួន១កង់ ។
ប្រភពព័ត៌មានបានឱ្យដឹងថា រថយន្តបានរងការខូចខាតបែកកង់ និងបាក់រ៉ូទីលចំហៀងឆ្វេង កល់ទៅមុខលែងរួច បណ្តាលអោយនារីវយ័ក្មេងម្នាក់នោះរងរបួស ត្រង់ទ្រូងបន្តិចបន្តួច ហើយភ្លាមនោះ នារីវយ័ក្មេងរូបនោះ ត្រូវបានបុរសម្នាក់បានមកដឹកចេញពីកន្លែងកើតហេតុបាត់ស្រមោល ដោយបន្សល់ទុករថយន្តនៅកន្លែងកើតហេតុ ។
ក្រោយពេលកើតហេតុ ឃើញសមត្ថកិច្ចមូលដ្ឋាននិងជំនាញចរាចរណ៍ខណ្ឌចំការមនបានចុះទៅដល់កន្លែងកើតហេតុ រួចហើយក៍បានទំនាក់ទំនងហៅខាងជំនាញក្រុង អោយចុះទៅស្ទូចយករថយន្តទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញដើម្បីរងចាំធ្វើការដោះស្រាយ ៕
ចែករំលែកព័តមាននេះ