ប្រទេសអារ៉ាប៊ីសាអ៊ូឌីត ៖ ទូរទស្សន៍ CNN TURK បានរាយការណ៍នាថ្ងៃទី២៣ តុលាថា ពួកអ្នកស៊ើបអង្កេតបានរកឃើញវ៉ាលីស២ និងសម្ភារ ដែលជារបស់អ្នកកាសែតអារ៉ាប៊ីសាអ៊ូឌីត…
ប្រទេសអារ៉ាប៊ីសាអ៊ូឌីត ៖ ទូរទស្សន៍ CNN TURK បានរាយការណ៍នាថ្ងៃទី២៣ តុលាថា ពួកអ្នកស៊ើបអង្កេតបានរកឃើញវ៉ាលីស២ និងសម្ភារ ដែលជារបស់អ្នកកាសែតអារ៉ាប៊ីសាអ៊ូឌីត ត្រូវគេធ្វើឃាត លោក JAMAL KHASHOGGI ពេលធ្វើការឆែកឆេររថយន្ត១គ្រឿងរបស់ស្ថានកុងស៊ុលអារ៉ាប៊ីសាអ៊ូឌីត ប្រចាំក្រុងអ៊ីស្តង់ប៊ុល។
រថយន្តនោះត្រូវបានរកឃើញក្នុងចំណតក្រោមដីមួយ ក្នុងសង្កាត់ស៊ុលតានហ្គាហ្ស៊ី ក្រុងអ៊ីស្តង់ប៊ុល។
ទូរទស្សន៍នោះគូសបញ្ជាក់ថា ពួកអ្នកស៊ើបអង្កេតរកឃើញក្នុងរថយន្ត នូវកុំព្យូទ័រមួយនិងបណ្ដាឯកសារជារបស់លោក KHASHOGGI ។ អាជ្ញាធរតួកគីសង្ស័យថា អ្នកកាសែតរូបនេះត្រូវសម្លាប់ ហើយកាត់ដៃកាត់ជើង ខាងក្នុងស្ថានកុងស៊ុលដោយពួកភ្នាក់ងារអារ៉ាប៊ីសាអ៊ូឌីតកាលពីថ្ងៃទី២តុលា។
ចំពោះការសម្លាប់អ្នកកាសែតរូបនេះ ប្រធានាធិបតីអាមេរិកលោកដូណាល់ ត្រាំ វាយតម្លៃកាលពីថ្ងៃទី២៣តុលាថា ការសម្លាប់រូបគេក្នុងស្ថានកុងស៊ុលមួយ ជាប្រតិបត្តិការដែលមានការបិទបាំងអាក្រក់បំផុតនៃប្រវត្តិសាស្ត្រ។ វាមានប្រភពពីគម្រោងយ៉ាងអាក្រក់បំផុតមួយ ហើយមានការបិទបាំងអាក្រក់បំផុតនៃប្រវត្តិសាស្ត្រ។
ប្រធានាធិបតីតួកគីលោកតៃយីបអ័រដូហ្គានបានហៅការធ្វើឃាតនេះថា ជាការសម្លាប់យ៉ាងសាហាវព្រៃផ្សៃដែលមានផែនការទុកមុនរយៈពេលច្រើនថ្ងៃ ហើយអនុវត្តដោយភ្នាក់ងារមួយក្រុមមានគ្នា១៥នាក់។ ដោយពុំលើកពីព្រះអង្គម្ចាស់រជ្ចទាយាទអារ៉ាប៊ីសាអ៊ូឌីតដែលលោក KHASHOGGI តែងរិះគន់ ប្រធានាធិបតីតួកគីគូសបញ្ជាក់ពីសារសំខាន់នៃការដាក់ទោស រាល់មនុស្សដែលទាក់់ទិន ចាប់ពីពួកអ្នកអនុវត្តផ្ទាល់រហូតដល់អ្នកបញ្ជាពីក្រោយខ្នង។
ចំពោះការសម្លាប់អ្នកកាសែតរូបនេះក្រុងវ៉ាស៊ិនតោនបានដកហូតទិដ្ឋាការពីបណ្ដាជនជាតិអារ៉ាប៊ីសាអ៊ូឌីតដែលមានការជាប់ទាក់ទិន៕
ចែករំលែកព័តមាននេះ