ខេត្តបន្ទាយមានជ័យ ៖ លោកឧត្តមសេនីយ៍ត្រី វង្ស វ៉ិត ស្នងការរងទទួលផែនធនធានមនុស្សតំណាងលោកឧត្តមសេនីយ៍ទោ អាត់ ខែម ស្នងការនគរបាលខេត្តបានថ្លែង និងការផ្តាំផ្ញើថា…
ខេត្តបន្ទាយមានជ័យ ៖ លោកឧត្តមសេនីយ៍ត្រី វង្ស វ៉ិត ស្នងការរងទទួលផែនធនធានមនុស្សតំណាងលោកឧត្តមសេនីយ៍ទោ អាត់ ខែម ស្នងការនគរបាលខេត្តបានថ្លែង និងការផ្តាំផ្ញើថា «អត់ពីមេបា សូមឲ្យក្មួយៗទាំង៤នាក់បងប្អូនត្រូវចេះស្រឡាញ់គ្នា ប្អូនត្រូវចេះគោរពស្តាប់នូវដំបូន្មានបង ត្រូវចាត់ទុកបងជាឪពុក ម្តាយ និងត្រូវខិតខំរៀនសូត្រ» ។
នាពេលចូលរួមមរណៈទុក្ខយ៉ាងក្រៀមក្រំជាមួយក្រុមគ្រួសារសព និងនាំយកថវិកាចំនួន៦លានរៀលរបស់សមាគមមិត្តនគរបាលជាតិកម្ពុជា និងអង្ករ៥០គីឡូក្រាម ថវិកាចំនួន៦០ម៉ឺនរៀល ជារបស់អធិការដ្ឋាននគរបាលស្រុកមង្គលបូរី ជូនដល់ក្រុមគ្រួសារសពរបស់លោកអនុសេនីយ៍ទោ ណាប់ សូល មន្ត្រីនគរបាលប៉ុស្តិ៍ឬស្សីក្រោកនៃអធិការដ្ឋាននគរបាលស្រុកមង្គលបូរីនៅល្ងាចថ្ងៃទី២៣ ខែតុលា ឆ្នាំ២០១៨ នៅគេហេដ្ឋានសពភូមិផាស៊ីស្រា ឃុំប្ញស្សីក្រោក ស្រុកមង្គលបូរី ខេត្តបន្ទាយមានជ័យ ។
បើតាមការឲ្យដឹងពីសាច់ញាតិរបស់លោកអនុសេនីយ៍ទោ ណាប់ សូល បានទទួលមរណភាពនៅថ្ងៃទី២២ ខែតុលា ឆ្នាំ២០១៨ ដោយជម្ងឺប្រចាំកាយ ចំណែកភរិយារបស់លោកបានទទួលមរណភាពរយៈពេល២ឆ្នាំមកហើយ បច្ចុប្បន្នបន្សល់ទុកកូនប្រុសចំនួន៤នាក់ឲ្យនៅកំព្រា ។
លោកឧត្តមសេនីយ៍ត្រី វង្ស វ៉ិត បានបញ្ជាក់ថា សមាគមមិត្តនគរបាលជាតិកម្ពុជាត្រូវបានផ្តួចផ្តើមឡើងដោយអគ្គស្នងការនគរបាលជាតិ ក្នុងនោះគឺត្រូវបានកាត់ខែសមាជិកក្នុងមួយខែ៥ពាន់រៀលគោលបំណងនៃការបង្កើតសមាគមនេះគឺសម្រាប់ជួយគ្នាទៅវិញទៅមកចាប់ពីថ្នាក់លើដល់ក្រោម ពេលដែលសមាជិកណាម្នាក់មានទុក្ខធុរៈ ។
បើតាមលក្ខ័ន្តិកៈរបស់សមាគមមិត្តនគរបាលជាតិកម្ពុជាសមាជិកម្នាក់ ដែលទទួលមរណៈភាពគឺត្រូវទទួលបានថវិកាចំនួន៦លានរៀល ចំណែកភរិយារបស់សមាជិកមរណៈភាព ទទួលបានថវិកា២លានរៀលផងដែរ ។ ជាមួយគ្នានោះដែរលោកអធិការនគរបាលស្រុកមង្គលបូរី និងសហការី បានជួយថវិកាចំនួន៦០ម៉ឺនរៀល និងអង្ករចំនួន៥០គីឡូក្រាម ចូលរួមឧបត្ថម្ភក្នុងកម្មវិធីបុណ្យផងដែរ ។
ជាចុងក្រោយលោកឧត្តមសេនីយ៍ស្នងការរងបានផ្តាំផ្ញើដល់អាជ្ញាធរមូលដ្ឋាន និងលោកអធិការនគរបាលស្រុកមង្គលបូរី សូមឲ្យជួយមើលដល់ប្អូនៗទាំង៤នាក់ពីមុនគេព្រាត់ម្តាយជាទីស្រឡាញ់តែពេលនេះគឺគេត្រូវបាត់បង់ឪពុកជាទីស្រឡាញ់ម្នាក់ បើពួកគេមានការខ្វះខាតសូមមេត្តាជួយឧបត្ថម្ភដល់ពួកគេផងដែរ ៕
ចែករំលែកព័តមាននេះ