រាជធានីភ្នំពេញ ៖ រថយន្តស្ទូចធុនធំមួយគ្រឿងបើកបរលឿនមិនប្រយ័ត្ន លុះដល់ចំណុចឈប់ស្តុបរថយន្តត្រូវដាច់ហ្វ្រាំង បណ្តាលឲ្យតៃកុងរថយន្តបង្ខំចិត្តបួងចង្កូតឡើងឃឿនផ្លូវជ្រុលបុករះម៉ូតូជាច្រើនគ្រឿង រួចជ្រុលបុកផ្ទះទ្វារផ្ទះប្រជាពលរដ្ឋ បង្កការភ្ញាក់ឡើងនៅចំណុចស្តុបលូ៥ ក្នុងភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ កាលពីវេលាម៉ោង១៥និង០០នាទីរសៀល ថ្ងៃទី២៤ ខែតុលា ឆ្នាំ២០១៨ ។
រថយន្តបង្កម៉ាកហ៊ីយ៉ាន់ដាយជាប្រភេទរថយន្តស្ទូច ពណ៌ស ពាក់ស្លាកលេខ ភ្នំពេញ 1G-4208 ។ ចំណែកម៉ូតូរងគ្រោះមាន៣គ្រឿង ត្រូវរងការខូចខាត ក្នុងនោះរួមមានម៉ូតូរ៉ឺម៉កដឹកទឹកកកមួយគ្រឿង ពណ៌ខៀវ គ្មានស្លាកលេខ ម៉ូតូម៉ាកស្កុបពី ពណ៌ស ពាក់ស្លាកលេខភ្នំពេញ 1CX-6127 និងមួយគ្រឿងទៀតម៉ាក PCX ពណ៌ស ។
យោងតាមប្រភពព័ត៌មានពីអ្នកដែលបានឃើញហេតុការណ៍បានរៀបរាប់ឲ្យដឹងថា នៅមុនពេលកើតហេតុគេសង្គេតឃើញរថយន្តបង្កបើកបរដោយបុរសម្នាក់ធ្វើដំណើរតាមបណ្តោយផ្លូវវេងស្រេង ក្នុងទិសដៅពីលិចទៅកើត និងក្នុងល្បឿនលឿនគួរសម ។ លុះធ្វើដំណើរមកដល់ចំណុចកើតហេតុ ដែលជិតដល់ចំណុចឈប់ភ្លើងស្តុបផងនោះរថយន្តបង្ក ស្រាប់តែដាច់ហ្វ្រាំង ធ្វើឲ្យតៃកុងរថយន្តបង្ខំចិត្តបួងចង្កូតឡើងទៅលើចិញ្ចើមផ្លូវ ជាហេតុធ្វើឲ្យជ្រុលចង្កូតទៅបុករ៉ឺម៉កដឹកទឹកកកដែលកំពុងចតស្ងៀមពីក្រោយពេញទំហឹង បណ្តាលឲ្យម៉ូតូរ៉ឺម៉កត្រូវក្រឡាប់ផ្ងារជើង ហើយរថយន្តបង្កនៅមិនទាន់អស់ល្បឿនក៏ជ្រុលទៅបុកផ្ទប់នឹងម៉ូតូ២គ្រឿងបន្ថែមទៀតដែលម្ចាស់គេចតចោលនៅខាងមុខផ្ទះ បណ្តាលឲ្យគៀបម៉ូតូក្រោមរថយន្តអូសទៅផ្ទប់នឹងទ្វារផ្ទះប្រជាពលរដ្ឋចំនួន២ផ្ទះត្រូវរងការខូចខាតបន្ថែមទៀតផងដែរ ។ បន្ទាប់ពីបង្កហេតុភ្លាមៗតៃកុងរថយន្តបានបើកទ្វាររថយន្តចេញទៅក្រៅ ហើយរត់គេចបាត់ស្រមោលសូន្យ ។
ក្រោយកើតហេតុកម្លាំងនគរបាលមូលដ្ឋានសហការជាមួយជំនាញបានចុះអន្តរាគមន៍វាស់វែងអូសយកទាំងរថយន្តបង្ក និងម៉ូតូជនរងគ្រោះទាំងអស់ទៅរក្សាទុកនៅការិយាល័យនគរបាលចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញរងចាំដោះស្រាយទៅតាមផ្លូវច្បាប់នៅពេលក្រោយ ។
សូមបញ្ជាក់ក្នុងហេតុការណ៍គ្រោះថ្នាក់ចរាចរណ៍ខាងលើនេះ គឺពុំមានបណ្តាលឲ្យមានគ្រោះថ្នាក់ ឬរងរបួសដល់មនុស្សណាម្នាក់នោះឡើយ ។ ហើយករណីនេះ គឺសំណាងហើយដែលពេលដាច់ហ្វ្រាំង តៃកុងរថយន្តរថយន្តបង្កនៅមានស្មារតីគ្រប់គ្រងខ្លួនឯងអាចបួងចង្កូតឡើងលើចិញ្ចើមផ្លូវ ប្រសិនបើមិនដូច្នោះទេ មិនដឹងថា រថយន្តបង្កត្រូវបន្តដំណើរទៅមុខទៅបុកអ្នកដំណើរជាច្រើនដែលកំពុងឈប់ស្តុបបង្កឲ្យមានមនុស្សស្លាប់ ឬរងរបួសប៉ុន្មាននាក់នោះទេ ? ៕
ចែករំលែកព័តមាននេះ