ខេត្តកណ្តាល ៖ នាព្រឹកថ្ងៃទី២៤ ខែតុលា ឆ្នាំ២០១៨ ប្រជាពលរដ្ឋរស់នៅក្នុងភូមិជ័យឧត្តម2 ឃុំសំរោងធំ ស្រុកកៀនស្វាយ ខេត្តកណ្តាល ចំនួន២៥០គ្រួសារបាននាំគ្នាផ្តិតមេដៃដាក់ពាក្យសំណូមពរសូមឲ្យអាជ្ញាធរឃុំជួយដោះស្រាយពីបញ្ហាផលប៉ះពាល់នៃក្លិនស្អុយអាចម៌ជ្រូកចេញពីកសិដ្ឋានចិញ្ចឹមជ្រូកមួយកន្លែងនៅក្បែរលំនៅឋានរបស់ពួកគាត់ ។ ហើយដំណោះស្រាយនេះក៏មានការចូលរួមពីសំណាក់លោក ទេព ឈួន មេឃុំ ក្រុមប្រឹក្សាឃុំ និងម្ចាស់កសិដ្ឋានចិញ្ចឹមជ្រូកឈ្មោះ បេ ប៊ុនលី ហៅយាយឡ ភេទស្រី អាយុ៦៩ឆ្នាំ មកចូលរួមផងដែរ ។
ប្រជាពលរដ្ឋបានលើកឡើងថា ដោយសារតែទ្រាំលែងបានទៅនឹងក្លិនស្អុយអាចម៌ជ្រូកចេញពីកសិដ្ឋានចិញ្ចឹមជ្រូកខាងលើនេះរយៈពេលយូរឆ្នាំមកហើយ រហូតឈានដល់ថ្នាក់ប៉ះពាល់ដល់សុខភាពមានមនុស្សចាស់ក្មេងក្នុងភូមិបានធ្លាក់ខ្លួនឈឺជាបន្តបន្ទាប់នោះ ទើបពួកគាត់នាំគ្នាផ្តិតមេដៃយកមកសាលាឃុំដើម្បីសូមឲ្យអាជ្ញាធរជួយដោះស្រាយ ។
ពលរដ្ឋបន្តថា ពួកគាត់មិនមែនមានចិត្តទៅច្រណែន ឬបិទសិទ្ធអាជីវកម្មគេរកស៊ីនោះទេគឺគ្រាន់តែសូមសំណូមពរឲ្យអាជ្ញាធរមេត្តាជួយណែនាំឲ្យម្ចាស់កសិដ្ឋាននេះកែប្រែធ្វើជាឡឧស្ម័ន ឬមានប្រព័ន្ធលូបញ្ចេញឲ្យបានត្រឹមត្រូវដើម្បីកុំឲ្យមានក្លិនស្អុយជះឆួលប៉ះពាល់បរិស្ថានពេញភូមិធ្វើឲ្យពលរដ្ឋពេលហូបបាយម្តងៗស្ទើរតែចង់ក្អួតចង្អោ ។
ជាពិសេសមនុស្សចាស់ក្មេងបានធ្លាក់ខ្លួនឈឺបណ្តើរៗទៀតផង ពីព្រោះពួកគាត់បានត្រាំត្រែងនឹងក្លិនស្អុយនេះរយៈពេលជាង10ឆ្នាំមកហើយ ដោយសារចេះតែនឹកឃើញអាណិតយល់ដល់ការងារមុខរបររកស៊ីរបស់គេ ។ ប៉ុន្តែម្ចាស់កសិដ្ឋាននេះដឹងតែពីផលប្រយោជន៍មិនអាណិតគិតគូរពីផលប៉ះពាល់ដល់សុខភាពរបស់ពលរដ្ឋឡើយបានបូមបង្ហូរទឹកលាមួកជ្រូកពីក្នុងដីឡូត៍គាត់បង្ហៀរចេញមកក្រៅពាសវាលពាសកាលបណ្តាលឲ្យខូចខាតដល់ផលដំណាំរបស់ពលរដ្ឋទៀតផង ។
គួរបញ្ជាក់ថា កសិដ្ឋានចិញ្ចឹមជ្រូកខាងលើដែលបង្កការប៉ះពាល់ដល់ការរស់នៅ និងសុខភាពរបស់ពលរដ្ឋរយៈពេលយូរឆ្នាំមកហើយនោះ កោះសន្តិភាព យើងបានចុះផ្សាយជាច្រើនលេខមកហើយ ប៉ុន្តែពលរដ្ឋលើកឡើងថា ពេលព័ត៌មានផ្សាយម្តងៗពួកគាត់សង្កេតឃើញតែមន្ត្រីបរិស្ថានស្រុកឧស្សាហ៍ចុះមកមួយភ្លែតៗជួបជាមួយម្ចាស់កសិដ្ឋានរួចទៅវិញបាត់ តែមិនមានចំណាត់ការអ្វីសោះក្លិនស្អុយកាន់តែឈួលពេញភូមិដដែលពិសេសរដូវខែខ្យល់បក់ស្អុយកាន់តែខ្លាំង ។
ពាក់ព័ន្ធបញ្ហានេះលោក ពេទ ឈួន មេឃុំសំរោងធំក៏បានផ្តល់បទសម្ភាសន៍ប្រាប់ កោះសន្តិភាព ថាប្រជាពលរដ្ឋរស់នៅក្នុងភូមិជ័យឧត្តម២ ឃុំសំរោងធំ ចំនួន២៥០គ្រួសារបាននាំគ្នាផ្តិតមេដៃដាក់ពាក្យមកសាលាឃុំដើម្បីសំណូមពរឲ្យអាជ្ញាធរជួយដោះស្រាយនូវទុក្ខកង្វល់រឿងក្លិនស្អុយអាចម៌ជ្រូកបង្កការប៉ះពាល់ដល់ការរស់នៅរបស់ពួកគាត់ ។
ជាលទ្ធផលពេញមួយព្រឹកក្នុងដំណោះស្រាយនេះដោយខាងម្ចាស់កសិដ្ឋានចិញ្ចឹមជ្រូកឈ្មោះ បេ ប៊ុនលី ហៅយាយឡ គាត់បានឯកភាពគ្នាជាមួយប្រជាពលរដ្ឋដោយឲ្យអាជ្ញាធរឃុំធ្វើកិច្ចសន្យាចាប់ពីពេលនេះទៅក្នុងខែវិច្ឆិកា និងខែធ្នូ ឆ្នាំ២០១៨ នេះគាត់(ម្ចាស់កសិដ្ឋាន)នឹងជួលឡានមកបូមអាចម៌ជ្រូកចេញដើម្បីកាត់បន្ថយកុំឲ្យស្អុយប៉ះពាល់ដល់ពលរដ្ឋទៀត ។
ហើយដល់រដូវប្រាំងរាំងស្ងួតក្នុងខែមករា ឬខែកុម្ភៈ ឆ្នាំ២០១៩ គាត់(ម្ចាស់កសិដ្ឋាន) នឹងកែប្រែជាថ្មីធ្វើឡឧស្ម័ន្មទៅតាមស្តុងដាបច្ចេកទេសមិនឲ្យមានជះក្លិនស្អុយប៉ះពាល់ពលរដ្ឋទៀតឡើយ ។ បើមិនដូច្នេះទេម្ចាស់កសិដ្ធានចិញ្ចឹមជ្រូកនិងទទួលខុសត្រូវចំពោះមុខច្បាប់ជាធរមាន ៕
ចែករំលែកព័តមាននេះ