ខេត្តពោធិ៍សាត់ ៖ កាលពីវេលាម៉ោង១០ និង២០នាទីព្រឹកថ្ងៃទី២២ ខែតុលា មានករណីអគ្គិភ័យមួយបានកើតឡើង បណ្ដាលឲ្យផ្ទះមួយខ្នងក្លាយជាផេះផង់ និងបាត់បង់ទ្រព្យសម្បត្តិផ្សេងទៀតអស់មួយចំនួនធំ ប៉ុន្តែមិនបណ្ដាលឲ្យមានគ្រោះថ្នាក់ដល់អាយុជីវិតមនុស្សទេ ។…
ខេត្តពោធិ៍សាត់ ៖ កាលពីវេលាម៉ោង១០ និង២០នាទីព្រឹកថ្ងៃទី២២ ខែតុលា មានករណីអគ្គិភ័យមួយបានកើតឡើង បណ្ដាលឲ្យផ្ទះមួយខ្នងក្លាយជាផេះផង់ និងបាត់បង់ទ្រព្យសម្បត្តិផ្សេងទៀតអស់មួយចំនួនធំ ប៉ុន្តែមិនបណ្ដាលឲ្យមានគ្រោះថ្នាក់ដល់អាយុជីវិតមនុស្សទេ ។ គ្រោះអគ្គិភ័យនេះ កើតឡើងនៅភូមិរវៀង ឃុំសំរោង ស្រុកភ្នំក្រវាញ ធ្វើឲ្យមានការភ្ញាក់ផ្អើលទាំងព្រឹកដល់អ្នកភូមិ និងអ្នកធ្វើដំណើរឆ្លងកាត់អាជ្ញាធរមូលដ្ឋាន និងសមត្ថកិច្ចនានា ។
បន្ទាប់ពីទទួលបានព័ត៌មាននេះភ្លាម លោកវរសេនីយ៍ឯក តាន់ គារិទ្ធ អធិការនគរបាលស្រុកភ្នំក្រវាញ បានដឹកនាំកម្លាំងអធិការដ្ឋាននិងប៉ុស្ដិ៍នគរបាលសំរោង នាំយករថយន្ដពន្លត់អគ្គិភ័យមួយគ្រឿងទៅជួយបាញ់ទឹកពន្លត់ និងមានការជួយអន្តរាគមន៍ពីរថយន្ដដឹកទឹកឯកជនរបស់ប្រជាពលរដ្ឋផងដែរ ។ លោកអធិការឲ្យដឹងថា ក្នុងប្រតិបត្តិការនេះយើងប្រើទឹកអស់ចំនួន៧រថយន្ដ ទើបភ្លើងរលត់ជាស្ថាពរ ក្នុងនោះទឹករបស់ថយន្ដអធិការដ្ឋាននគរបាលស្រុកចំនួនចំនួន២រថយន្ដ និងទឹករបស់រថយន្ដឯកជនចំនួន៥រថយន្ដ ។
ផ្ទះដែលក្លាយជាចំណីព្រះអគ្គីនេះមានទំហំ៦ម៉ែត្រគុណនឹង៨ម៉ែត្រ ថ្មក្រោម ឈើលើ ប្រក់ក្បឿង ក្រាលក្តារ ជញ្ជាំងក្តារ ម្ចាស់ ប្តីឈ្មោះ មាន ផា អាយុ៤៨ឆ្នាំ ប្រពន្ធឈ្មោះ ចៅ រីម អាយុ៤៦ឆ្នាំ ។ តុល្យភាពនៃការខូចខាត គឺឆេះមួយកំណាត់លើទាំងស្រុងនៅសល់តែជញ្ជាំងថ្ម និងក្រាលការ៉ូខាងក្រោមតែប៉ុណ្ណោះ ។ចំណែកទ្រព្យសម្បត្តិដែលមានក្នុងផ្ទះទាំងប៉ុន្មានក៏ត្រូវរលាយខ្ទេចខ្ទីគ្មានសល់ដែរ ក្នុងនោះមានទូឈើចំនួន១ គ្រែឈើចំនួន៤ និងសម្ភារប្រើប្រាស់សំខាន់ៗមួយចំនួនទៀត ។
ម្ចាស់ផ្ទះនិងអ្នកជិតខាង បានឃើញភ្លើងចាប់ផ្ដើមឆេះពីលើដំបូលមុនគេ ត្រង់ចំណុចផ្ទាំងសូឡា រួចហើយឆេះរាលកាន់តែធំឡើងៗរហូតគ្របដណ្ដប់ផ្ទះទាំងមូលតែម្ដង ។ ករណីនេះសមត្ថកិច្ចសន្និដ្ឋានថា មកពីឆ្លងចរន្ដអគ្គិសនីពីផ្ទាំងសូឡានោះ ។ មិនអាចរកការបំភ្លឺបានពីអ្នកជំនាញដំឡើងផ្ទាំងសូឡា ជុំវិញការឆ្លងក្លាយជាអគ្គីនេះទេ ហើយករណីនេះក៏មិនមែនលើកទី១ដែរ ៕
ចែករំលែកព័តមាននេះ