រាជធានីភ្នំពេញ៖សិល្បៈខ្មែរអមតៈនឹងធ្វើបទបង្ហាញស្តីទម្រង់វង់ភ្លេងកន្ទាំមីង(ភ្លេងកំដរសព)ដែលជាប្រភេទវង់ភ្លេងស្ទើរតែបាត់បង់ទៅហើយ ។ បទបង្ហាញនេះនឹងធ្វើឡើងនៅថ្ងៃអាទិត្យ ទី២៨ ខែតុលា ឆ្នាំ ២០១៨ នៅមជ្ឈមណ្ឌលបេតិកភណ្ឌក្នុងខេត្តសៀមរាបចាប់ពីម៉ោង២ដល់៤រសៀល ខណៈការចូលរួមទស្សនាដោយសេរី ។…
រាជធានីភ្នំពេញ៖សិល្បៈខ្មែរអមតៈនឹងធ្វើបទបង្ហាញស្តីទម្រង់វង់ភ្លេងកន្ទាំមីង(ភ្លេងកំដរសព)ដែលជាប្រភេទវង់ភ្លេងស្ទើរតែបាត់បង់ទៅហើយ ។ បទបង្ហាញនេះនឹងធ្វើឡើងនៅថ្ងៃអាទិត្យ ទី២៨ ខែតុលា ឆ្នាំ ២០១៨ នៅមជ្ឈមណ្ឌលបេតិកភណ្ឌក្នុងខេត្តសៀមរាបចាប់ពីម៉ោង២ដល់៤រសៀល ខណៈការចូលរួមទស្សនាដោយសេរី ។
វង់ភ្លេងកន្ទាំមីង ជាវង់ភ្លេងកំដរសព ដែលស្ទើរតែបាត់បង់ទៅហើយ ។ តាមរយៈសិក្ខាសាលាមួយនេះ ទស្សនិកជននឹងបានឈ្វេងយល់កាន់តែស៊ីជម្រៅ និងស្តាប់ការប្រគំវង់ភ្លេងដ៏កម្រមួយនេះ ។ បទបង្ហាញវង់ភ្លេងកន្ទាំមីងក៏នឹងបង្ហាញអ្នកចូលរួមនូវបច្ចុប្បន្នភាពនៃទម្រង់មួយនេះ និងឧបករណ៍ភ្លេងសម្រាប់លេងនៅក្នុងវង់ភ្លេងមួយនេះ ក្នុងពេលមិនសូវមានអ្នកស្គាល់វង់ភ្លេងប្រភេទនេះច្រើនឡើយ ។
តាមការសង្កេតមានមហាជនខ្មែរភាគតិចបំផុតស្ទើរតែគ្រប់វ័យតែម្តង ដែលធ្លាប់ឮឈ្មោះ ឬបានស្គាល់ពីវង់ភ្លេងបុរាណខ្មែរដ៏កម្រមួយមានឈ្មោះថា «វង់ភ្លេងកន្ទាំមីង» ខណៈបច្ចុប្បន្ននេះជិតបាត់បង់អ្នកអភិរក្សសម្រាប់ទុកជាកេរដំណែលហើយដែរ ។
វង់ភ្លេងកន្ទាំមីង គឺជាវង់ភ្លេងដែលស្ទើរតែបាត់បង់នូវអត្តសញ្ញាណទៅហើយ ខណៈពេលថ្មីៗនេះត្រូវបានលោក ផាទ្រីក ឃើសាឡេ (Patrick Kersale) ជាអ្នកស្រាវជ្រាវជាតិពន្ធុតូរ្យតន្ត្រីវិទ្យាបារាំង បានរកឃើញក្រុមវង់ភ្លេងនេះដោយបានជួបអ្នកចម្រៀងកន្ទាំមីង ដែលនៅសល់តែ១រូបគត់ពីក្រុមកន្ទាំមីងនៅវត្តត្រាច ស្ថិតនៅក្នុងខេត្តសៀមរាប។
ដោយសារយល់ឃើញថា សិល្បៈចម្រៀងបែបបុរាណគឺចម្រៀងកន្ទាំមីង ជិតអស់អ្នកស្នងទៅជំនាន់ក្រោយនោះ ទើបអង្គការសិល្បៈខ្មែរអមតៈ សហការជាមួយលោកគ្រូម្នាក់ដែលចេះច្រៀងគឺលោកគ្រូនឿម ឡាប មានវ័យប្រហែលជា៥០ឆ្នាំ ដើម្បីបើកបង្រៀនចម្រៀងកន្ទាំមីងរយៈពេល៣ខែ គឺចាប់ពីដើមខែសីហា ដល់ខែតុលា ឆ្នាំ ២០១៨ រៀនរាល់ថ្ងៃសៅរ៍ និងថ្ងៃអាទិត្យ ម៉ោង២កន្លះ ដល់៤កន្លះ ។
លោកគ្រូនឿម ឡាប នាពេលបច្ចុប្បន្ននៅឯវត្តត្រាច ក្នុងស្រុកប្រាសាទបាគងខេត្តសៀមរាប។
«ភ្លេងគងស្គរ» ជាឈ្មោះមួយសម្រាប់ហៅ ក្នុងចំណោមឈ្មោះជាច្រើន ដែលប្រើសម្រាប់ហៅវង់ភ្លេងនេះ ដែលគេអាចហៅបានថា កន្ទាំមីង ធម្មមីង ទ្រើមីង ទុមម៉ូង និងត្រៃលក្ខណ៍ ជាដើម ។ ឈ្មោះទាំងអស់នេះត្រូវបានហៅទៅតាមតំបន់ ។ អ្នកខ្លះលើកឡើងថា ភ្លេងគងស្គរជាភ្លេងរបស់ព្រះពុទ្ធសាសនា សម្រាប់ប្រគំក្នុងពិធីបុណ្យសព ដែលសមស្របទៅនឹងការពិចារណាអំពីភាពមិនទៀងទាត់នៃជីវិតសត្វលោក ។
ចំណែកអ្នកខ្លះទៀតអះអាងថាភ្លេងគងស្គរប្រៀបដូចជាបទបំពេចុងក្រោយនៃជីវិត គឺភ្លេងដែលជូនវិញ្ញាណក្ខន្ធ របស់អ្នកដែលបានស្លាប់ទៅ «ស្រុក» វិញ ដើម្បីឱ្យបដិសន្ធិនៅសុគតិភព ៕
ចែករំលែកព័តមាននេះ