ទីក្រុងបាងកក ៖ ទិន្នន័យក្រសួងពាណិជ្ជកម្មបានឲ្យដឹងកាលពីថ្ងៃចន្ទថា ការនាំចេញដែលគិតពន្ធរួចរបស់ប្រទេសថៃនៅខែកញ្ញាបានធ្លាក់ចុះជាលើកដំបូងក្នុងកំឡុងពេល១៩ខែមកនេះ ខុសពីការគិតទុករបស់អ្នកវិភាគ ។
ការនាំចេញគឺជាកត្តាជំរុញដ៏សំខាន់នៃការលូតលាស់របស់ប្រទេសថៃ ហើយវាបានធ្លាក់ចុះ ៥,២%នៅខែកញ្ញា បើធៀបនឹងឆ្នាំមុន ។ កាលពីខែសីហា ការនាំចេញបានកើនឡើងដល់ទៅ ៦,៦៨% បើធៀបនឹងឆ្នាំមុន ។
ក្រសួងពាណិជ្ជកម្មបានឲ្យដឹងទៀតថា ការធ្លាក់ចុះនៃកើតមានឡើង ព្រោះតែការនាំចេញនៅឆ្នាំមុនមានកម្រិតខ្ពស់ពេក សង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិន រួមទាំងមកពីបញ្ហាសេដ្ឋកិច្ចរបស់ដៃគូពាណិជ្ជកម្មរបស់ប្រទេសថៃផងដែរ។
ការនាំចេញទៅកាន់សហរដ្ឋអាមេរិកបានកើនឡើង១,២%កាលពីខែកញ្ញា ខណៈដែលការនាំចេញទៅកាន់ប្រទេសចិន ធ្លាក់ចុះដល់ទៅ ១៤,១%។ ក្រសួងខាងលើបានបន្តថា ការនាំចេញយានយន្ត និងគ្រឿងបន្លាស់ កុំព្យូទ័រនិងគ្រឿងបន្លាស់ បានធ្លាក់ចុះ ៧,៤%ផងដែរ បើធៀបនឹងឆ្នាំមុន ខណៈដែលផលិតផលជ័រធ្លាក់ចុះ២,៤% ។
ប្រទេសថៃមានអតិរេកពាណិជ្ជកម្មសរុបប្រមាណ៤៩០លានដុល្លារនៅខែកញ្ញា ទាបជាងការព្យាករដែលស្មើ១,៦ប៊ីលានដុល្លារ។ ក្នុងអំឡុងពេលពីខែមករាដល់ខែកញ្ញា ការនាំចេញរបស់ប្រទេសថៃបានកើនឡើង ៨,១៣% ខណៈដែលការនាំចូលកើនឡើងបាន ១៥,២% ។
ក្រសួងពាណិជ្ជកម្មបានបន្ថែមថា ពួកគេនៅតែចង់សម្រេចគោលដៅការលូតលាស់បាន៨%នៅឆ្នាំនេះដដែល បន្ទាប់ពីប្រទេសថៃមើលឃើញការលូតលាស់ដល់ទៅ៩,៩%កាលពីឆ្នាំមុន ៕
ចែករំលែកព័តមាននេះ