ខេត្តបាត់ដំបង ៖ ជនសង្ស័យម្នាក់ក្នុងចំណោម២នាក់ ត្រូវកម្លាំងនគរបាលព្រហ្មទណ្ឌកំរិតធ្ងន់ នៃស្នងការដ្ឋានខេត្ត ធ្វើការស្រាវជ្រាវឃាត់ខ្លួនបាន ថែមទាំងដកហូតបាននូវត្ថុតាងមួយចំនួនផង កាលពីវេលាម៉ោង៧យប់ថ្ងៃទី២៣ តុលា នៅចំណុចភូមិដំណាក់ហ្លូង សង្កាត់វត្តគរ ក្រុងបាត់ដំបង ដែលជាប់ពាក់ព័ន្ធនឹងករណីចូលលួចគ្រឿងសង្ហារឹមជាច្រើនរបស់មន្ត្រីនគរបាលម្នាក់ ស្ទើរអស់ពីផ្ទះ។
ជនសង្ស័យដែលត្រូវឃាត់ខ្លួន ឈ្មោះភន តុប ហៅម៉ៅ អាយុ២៤ឆ្នាំ ជាកម្មករបណ្ដុះផ្សិត និងស្នាក់នៅបណ្ដោះអាសន្នក្នុងភូមិ-សង្កាត់កើតហេតុខាងលើ ។ មន្ត្រីដដែលបានប្រាប់ថា ជននេះ និងបក្សពួកម្នាក់ទៀត ឈ្មោះណាប់ ដែលកំពុងគេចខ្លួនត្រូវជាប់សង្ស័យថា បានធ្វើសកម្មភាពចូលលួចគ្រឿងសង្ហារឹមជាច្រើនប្រភេទពីក្នុងផ្ទះមន្ត្រីនគរបាលម្នាក់ឈ្មោះបែន វ៉ាន់ថន ហៅតូ អាយុ២៩ឆ្នាំ កាលពីយប់ថ្ងៃទី២១តុលា នៅចំណុចខាងលើ ខណៈម្ចាស់មិនបានស្នាក់នៅ ដោយជននេះបានដឹកជញ្ជូនតាមរទេះសណ្ដោងពីក្រោយម៉ូតូជាច្រើនជើង។
បើតាមរបាយការណ៍បឋម ដែលម្ចាស់ផ្ទះរងគ្រោះបានរាយការណ៍ប្រាប់សមត្ថកិច្ចថា គ្រឿងសង្ហារឹមដែលបានបាត់បង់រួមមាន រូបចម្លាក់ត្រីនាគ រូបតាកំប៉ោង ហង្សតេ គ្រែនិងពូកដេក អាគុយ ម៉ូទ័រ ទូរទស្សន៏ និងសម្ភារៈមួយដទៃទៀតដែលទុកនៅក្នុងផ្ទះ។ ម្ចាស់ផ្ទះបានបញ្ជាក់ថា លំនៅឋាននោះកំពុងសាងសង់ដែលមិនទាន់មានទ្វាឬជញ្ជាំងបិតត្រិមត្រូវ តែពេលខ្លួនចេញផុតបន្តិចក៏ត្រូវចោរចូលលួចតែម្ដង។
ពាក់ព័ន្ធនឹងករណីលួចដឹកជញ្ជូនគ្រឿងសង្ហារឹមរបស់មន្ត្រីនគរបាលខាងលើនេះ បើតាមជនសង្ស័យឈ្មោះ
ភន តុប ហៅម៉ៅ បានរៀបរាប់ថា នៅយប់កើតហេតុនោះ ខ្លួននិងឈ្មោះណាប់ មិនមានគោលបំណងដើរទៅលួចគ្រឿងសង្ហារឹមនោះទេ តែពួកខ្លួនបានធ្វើឡើងដោយចៃដន្យ។ លោកចោរចិត្តស្លុយនេះ បាននិយាយថា ពួកខ្លួនបានដើរចាប់ត្រីតាមប្រឡាយ ក្រោយពីនាំគ្នាប្រើប្រាស់ថ្នាំញៀនរួច។
ពេលនោះ ពួកខ្លួនបានដើរទៅក្បែរផ្ទះជនរងគ្រោះ បានឃើញគ្រឿងសង្ហារឹមជាច្រើន ហើយគ្មានមនុស្សនៅទេ ថែមទាំងគ្មានទ្វារ និងជញ្ជាំងបិទជិតទៀតផង។ ជននេះ បានសារភពថា ឃើញឱកាសល្អបែបនេះ ពួកខ្លួន ក៏ចូលលួចរូបចម្លាក់ត្រីនាគមុន យកមកទុកលើផ្លូវ រួចបន្តចូលលួចគ្រឿងសង្ហារឹមគ្រប់ប្រភេទទៀត ស្ទើរអស់ពីក្នុងផ្ទះយកមកគរទុកលើថ្នល់ខាងមុខផ្ទះដែរ។
ឈ្មោះតុប ហៅម៉ៅ បានបញ្ជាក់ថា ក្រោយពីជញ្ជួនចេញពីផ្ទះអស់ពួកគេក៏នាំគ្នាជិះម៉ូតូទៅខ្ចីរទេះគេ ដើម្បីយកមកដឹកជញ្ជូនគ្រឿងសង្ហារឹមនេះ និងបានដឹកជាច្រើនជើងយកទៅលាក់ទុកនៅក្នុងបន្ទប់ជួលស្នាក់នៅរបស់ឈ្មោះណាប់។ ជននេះបានបន្ថែមថា ក្រោយពីប្រមូលយកទៅលាក់ទុក ពួកខ្លួនក៏បានលក់រូបសចម្លាក់អស់មួយចំនួន តែគ្រឿងសង្ហារឹមមួយចំនួនមិនទាន់បានលក់ទេ។
ចែករំលែកព័តមាននេះ