រាជធានីភ្នំពេញ ៖ រថយន្តបែនដឹកដីមួយបានបើកប្រដេញ និងជែង រួចកៀររថយន្តក្រឡុកស៊ីម៉ង់ត៍មួយគ្រឿងបណ្តាលអោយជ្រុលចង្កូតឡើងសួនច្បារ និងបុកបង្គោលប៉ាណូផ្សាយពាណិជ្ចកម្មបាក់រាបដល់ដី ហើយរថយន្តដឹកដីនោះបានបើកគេចបាត់ស្រមោល។
ហេតុការណ៍នេះបានកើតឡើងកាលពីម៉ោង១១និង៤០នាទីថ្ងៃត្រង់ទី២៤ ខែតុលា ឆ្នាំ ២០១៨ នៅផ្លូវភ្នំពេញ ហាណូយ(១០១៩) ភូមិអន្លង់ក្ងាន សង្កាត់ឃ្មួញ ខណ្ឌសែនសុខ។
រថយន្តបើកឡើងសួនជាប្រភេទរថយន្តក្រឡុកស៊ីម៉ង់ត៍ ពាក់ស្លាក់លេខ ភ្នំពេញ ៥A-១០៣៥ បើកបរដោយឈ្មោះ ធី ចាន់រិទ្ធ អាយុ២១ឆ្នាំ មុខរបរបើកបររថយន្តលាយស៊ីម៉ង់ត៍ ស្នាក់នៅភូមិជំរៅ សង្កាត់គោករការ ខណ្ឌព្រែកព្នៅ។ចំណែករថយន្តបែនដឹកដី ពណ៌ត្រេអុីមិនចាំស្លាកលេខបានបើកគេចទៅបាត់។
តាមប្រភពព័ត៌មានបានឲ្យដឹងថា មុនកើតហេតុ គេឃើញរថយន្តក្រឡុកស៊ីម៉ង់ត៍ខាងលើបានបើកបរក្នុងទិសដៅពីត្បូងទៅជើង លុះមកដល់កន្លែងកើតហេតុ ស្រាប់តែមានរថយន្តបែនដឹកដីមួយគ្រឿងពណ៌ត្រេអុីមិនចាំស្លាកលេខ បើកជែងប្រដេញគ្នា រួចកៀរ បណ្តាលអោយរថយន្តក្រឡុកស៊ីម៉ង់ត៍រេចង្កូតទៅឆ្វេងដៃឡើងសួនច្បារ និងបុកស្លាកប៉ាណូ បណ្តាលអោយបាក់រាបដល់ដី។
ចំណែករថយន្តរថយន្តក្រឡុកស៊ីម៉ង់ត៍បែកកញ្ចក់ផ្នែកខាងមុខ និងបែកកង់មុខខាងឆ្វេង តែសំណាងល្អមិនបណ្តាលអោយមនុស្សណាម្នាក់រងរបួសនោះទេ ។ បន្ទាប់ពីបើកកៀររថយន្តក្រឡុងស៊ីម៉ង់ត៍រួច រថយន្តបែនដឹកដីបានបើកគេចបាត់ស្រមោល ។
ក្រោយកើតហេតុ រថយន្តក្រឡុកស៊ីម៉ង់ត៍ខាងលើត្រូវបានសមត្ថកិច្ចចុះវាស់វែង និងយកទៅរក្សាទុកនៅការិយាល័យនគរបាលចរាចរណ៍ជើងគោករង់ចាំដោះស្រាយសងការខូចខាត៕
ចែករំលែកព័តមាននេះ