កាសែតឌឹណេស្សិនរបស់ថៃផ្សាយជាភាសាអង់គ្លេសនៅថ្ងៃទី៧ មីនា ឱ្យដឹងថា ក្រសួងការបរទេសថៃពេលនេះកំពុងស្វះស្វែងរកការអនុញ្ញាតពីរដ្ឋាភិបាលកម្ពុជាដើម្បីបញ្ជូនវេជ្ជ បណ្ឌិតថៃទៅពន្ធនាគារព្រៃសក្នុងទីក្រុងភ្នំពេញ ដើម្បីពិនិត្យសុខភាពរបស់លោកវីរ៉ាក់ ស៊ុមខ្វាមឃីត មេដឹកនាំក្រុមអាវលឿង ដែលកំពុងត្រូវឃុំខ្លួននៅទីនោះ ។ កាសែតថៃនេះបានដកស្រង់សម្តីលោក Thani Thongphakdee អ្នកនាំពាក្យក្រសួងការបរទេសថៃ ដែលថ្លែងថា ស្ថានទូតថៃប្រចាំទីក្រុងភ្នំពេញ កំពុងរង់ចាំការសម្រេចចិត្តពីពន្ធនាគាររបស់កម្ពុជា ។
ប្រភពព័ត៌មានពីកាសែតឌឹណេស្សិនឱ្យដឹងទៀតថា ស្ថានទូតថៃប្រចាំរាជធានីភ្នំពេញ បានផ្ញើសំណើមួយទៅពន្ធនាគារព្រៃសក្រោយពីប្អូនប្រុសរបស់លោកវីរ៉ាក់ ទៅសួរសុខទុក្ខលោកវីរ៉ាក់ ហើយដឹងថា លោកវីរ៉ាក់ បានធ្លាក់ខ្លួនឈឺធ្ងន់ធ្ងរ។ លោក Thani ថ្លែងទៀតថា ប្រសិនបើពន្ធ នាគារព្រៃសមិនអនុញ្ញាតឱ្យវេជ្ជបណ្ឌិតរបស់ស្ថានទូតថៃចូលជួបលោកវីរ៉ាក់ទេ នោះស្ថានទូតនឹងស្វះស្វែងរកការអនុញ្ញាតឱ្យលោកវីរ៉ាក់ បានចេញក្រៅពន្ធនាគារដើម្បីទទួលការពិនិត្យសុខភាពនៅមន្ទីរពេទ្យ ។
ជាមួយគ្នានេះ ប្រភពព័ត៌មានពីកាសែតបាងកកប៉ុស្តិ៍ឱ្យដឹងដោយដកស្រង់សម្តីលោក Thani Thongphakdee ដែលថ្លែងនៅថ្ងៃទី៧ មីនា ថាស្ថានទូតថៃប្រចាំរាជធានីភ្នំពេញបានស្វះស្វែងរកការអនុញ្ញាតពីពន្ធនាគារព្រៃស ដើម្បីបញ្ជូនវេជ្ជ បណ្ឌិតចូលពិនិត្យសុខភាពរបស់លោកវីរ៉ាក់ ប៉ុន្តែមិនទាន់ទទួលបានការឆ្លើយតបនៅឡើយទេ ។ អ្នកវិភាគពីស្ថានការណ៍នយោបាយនៅក្នុងប្រទេសថៃនិយាយថា លោកវីរ៉ាក់ ស៊ុមខ្វាមឃីដ មេដឹកនាំក្រុមជ្រុលនិយមសៀមអាវលឿងប្រហែលធ្វើពុតជាឈឺ ដើម្បីបានចេញក្រៅពន្ធនាគារប៉ុណ្ណោះ ។
សូមរំលឹកថា លោកវីរ៉ាក់ ស៊ុមខ្វាមឃីដ ត្រូវបានចាប់ខ្លួនដោយអាជ្ញាធរកម្ពុជា កាលពីចុងខែធ្នូ ឆ្នាំ២០១០ កន្លងមក រួមជាមួយពលរដ្ឋថៃ៦នាក់ទៀត ក្នុងនោះម្នាក់ជាសមាជិកសភាគណបក្សប្រជាធិបតេយ្យកំពុងកាន់អំណាចរបស់លោកនាយករដ្ឋមន្ត្រីអាប់ភីស៊ីត ពីបទចូលទឹកដីកម្ពុជាដោយខុសច្បាប់ ប៉ុន្តែ៥នាក់ត្រូវបានតុលាការកម្ពុជាសម្រេចឱ្យនៅក្រៅឃុំតាមរយៈការបង់ប្រាក់ធានា ហើយរួចខ្លួនវិលទៅថៃវិញអស់ចំណែកលោកវីរ៉ាក់ និងស្ត្រីម្នាក់ជាលេខារបស់លោកត្រូវបានកាត់ទោសដាក់ពន្ធនាគារម្នាក់រយៈពេល៨ឆ្នាំ និងម្នាក់ទៀត៦ឆ្នាំពីបទចារកម្ម ៕
ចែករំលែកព័តមាននេះ