ខេត្តបន្ទាយមានជ័យ ៖ ជនជាតិចិន១៦នាក់ដែលឃាត់ខ្លួនត្រូវបានបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី២៣ ខែតុលា ឆ្នាំ២០១៨ ហើយកម្លាំងកំពុងស្រាវជ្រាវរកចាប់ខ្លួនក្រុមស្ទាវដែលបង្ករបួសស្នាមលើចិន ។
លោកឧត្តមសេនីយ៍ត្រី សិទ្ធិ ឡោះ ស្នងការរងនគរបាលខេត្តបន្ទាយមានជ័យបានប្រាប់ថា កាលពីវេលាម៉ោង១២យប់រំលងអធ្រាត្រឈានចូលថ្ងៃទី២២ ខែតុលា ឆ្នាំ២០១៨ នៅភូមិប៉ាលិលេយ្យមួយ សង្កាត់-ក្រុងប៉ោយប៉ែត កម្លាំងចម្រុះមានកម្លាំងអធិការដ្ឋាននគរបាលក្រុងប៉ោយប៉ែតបានឃាត់ខ្លួនជនជាតិចិន១៣នាក់ និងកម្លាំងកងរាជអាវុធហត្ថក្រុងប៉ោយប៉ែតឃាត់បានជនជាតិចិន៣នាក់ដែលចោទប្រកាន់ពីបទបង្កបក្ខពួកប្រមាណជាង២០នាក់ប្រដាប់ដោយដំបងដែកឈើគ្រប់ដៃបង្កអសន្តិសុខប៉ះពាល់សណ្តាប់ធ្នាប់ និងប្រឆាំងសមត្ថកិច្ចនៅពេលបង្ក្រាប ។
លោកបានបញ្ជាក់ថា កាលពីយប់ថ្ងៃទី២៩ ខែកញ្ញា ឆ្នាំ២០១៨ នៅសង្កាត់-ក្រុងប៉ោយប៉ែតមានជនជាតិចិនបានកាប់ចាក់គ្នាជាមួយក្មេងស្ទាវបណ្តាលជនជាតិចិនម្នាក់របួសស្រាលហើយនៅវេលាម៉ោង១០និង៣០នាទីយប់ថ្ងៃទី២១ ខែតុលា ឆ្នាំ២០១៨ នៅចំណុចខារ៉ាអូរខេមួយកន្លែងក្នុងសង្កាត់-ក្រុងប៉ោយប៉ែតមានជនជាតិចិន១ក្រុមមានគ្នា៤ទៅ៥នាក់បានទៅច្រៀងខារ៉ាអូរខេហើយក៏មានទំនាស់កើតឡើងជាមួយក្រុមក្មេងស្ទាវ១ក្រុមបានកាប់ចាក់បណ្តាលរបួសជនជាតិចិន២នាក់ ។
លោកឧត្តសេនីយ៍ត្រី សិទ្ធិ ឡោះ បានបញ្ជាក់ថា ក្រោយពេលជនជាតិចិនទំនាស់ស្ទាវ១ក្រុមបណ្តាលរបួសជនជាតិចិនហើយគេចខ្លួនអស់ ស្រាប់តែជិតកន្លះម៉ោងក្រោយជនជាតិចិនបានប្រមូលផ្តុំគ្នា១ក្រុមប្រមាណជាង២០នាក់ប្រដាប់ដោយដំបងដែក និងឈើគ្រប់ដៃបានដើរស្រែករកមុខអ្នកដែលបង្ករបួសស្នាមបក្ខពួករបស់ខ្លួនតាមដងផ្លូវទីប្រជុំជនក្រុងប៉ោយប៉ែតបណ្តាលអោយប្រជាពលរដ្ឋមានការភ័យក្លាចបានរាយការណ៍ជូនសមត្ថកិច្ចចម្រុះចុះបង្ក្រាបមានកម្លាំងនគរបាលក្រុងប៉ោយប៉ែតឃាត់បាន១៣នាក់ និងកម្លាំងកងរាជអាវុធហត្ថក្រុងឃាត់បាន៣នាក់នៅវេលាម៉ោង១២រំលងអធ្រាត្រចូលថ្ងៃទី២២ ខែតុលា ឆ្នាំ២០១៨ ស្ថិតសង្កាត់-ក្រុងប៉ោយប៉ែត ។
លោកបានបញ្ជាក់ថា ក្រោយពេលកម្លាំងនគរបាលក្រុងឃាត់ខ្លួនជនជាតិចិន១ក្រុមចំនួន១៦នាក់ដែលមានដំបងដែកនិ ងឈើគ្រប់ដៃហើយពេលដែលកម្លាំងចុះប្រតិបត្តិការបង្ក្រាបបានតដៃត្រូវបានបញ្ជូនមកស្នងការនគរបាលខេត្តបន្ទាយមានជ័យបានកសាងសំណុំរឿងបញ្ចូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី២៣ ខែតុលា ឆ្នាំ២០១៨ ហើយក្រុមស្ទាវដែលបង្ករបួសស្នាមត្រូវបានកម្លាំងនគរបាលជំនាញកំពុងស្រាវជ្រាវរកចាប់ខ្លួនដើម្បីអនុវត្តន៍តាមច្បាប់ ៕
ចែករំលែកព័តមាននេះ