រាជធានីភ្នំពេញ ៖ មន្ត្រីរដ្ឋលេខាធិការដ្ឋានអាកាសចរណ៍ស៊ីវិលកម្ពុជាឱ្យដឹងថា រាជរដ្ឋាភិបាលកម្ពុជាដាក់ផែនការរៀបចំកែលំអអាកាសយានដ្ឋានចំនួន៣កន្លែង ដើម្បីត្រៀមខ្លួនបម្រើដល់កំណើនភ្ញៀវទេសចរចិនសម្រាប់ឆ្នាំខាងមុខ ។ លោក ស៊ិន ចាន់សេរីវុត្ថា រដ្ឋលេខាធិការ…
រាជធានីភ្នំពេញ ៖ មន្ត្រីរដ្ឋលេខាធិការដ្ឋានអាកាសចរណ៍ស៊ីវិលកម្ពុជាឱ្យដឹងថា រាជរដ្ឋាភិបាលកម្ពុជាដាក់ផែនការរៀបចំកែលំអអាកាសយានដ្ឋានចំនួន៣កន្លែង ដើម្បីត្រៀមខ្លួនបម្រើដល់កំណើនភ្ញៀវទេសចរចិនសម្រាប់ឆ្នាំខាងមុខ ។
លោក ស៊ិន ចាន់សេរីវុត្ថា រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិលមានប្រសាសន៍ថា រាជរដ្ឋាភិបាលបានរៀបចំផែនការពង្រីកគោលដៅអាកាសយានដ្ឋានដូចជា នៅភ្នំពេញ និងខេត្តព្រះសីហនុ ហើយបើភ្ញៀវចិនមានកំណើនខ្ពស់ថែមទៀតនោះ គឺគម្រោងស្ថាបនាព្រលានយន្តនៅស្រុកកណ្ដាលស្ទឹង ខេត្តកណ្ដាល នឹងចាប់ផ្ដើមសាងសង់ឡើងថែមទៀត ។
លោកបានឱ្យដឹងថា កម្ពុជាមានទិសដៅទទួលភ្ញៀវទេសចរណ៍ចិនឱ្យបាន២លាននាក់នៅក្នុងឆ្នាំ២០២០ខាងមុខ ក៏ប៉ុន្តែយោងតាមសន្ទុះភ្ញៀវទេសចរចិនដែលមកលេងកម្ពុជាពេលបច្ចុប្បន្ន គឺអាចកើនលើសពីចំនួននេះទៅទៀត ។ ក្រសួងទេសចរណ៍បានរៀបចំទាក់ទាញទេសចរចិន តាមរយៈការចេញសៀវភៅស និងការបង្កើតផ្ទះសំណាក់ប្រភេទ Home stay តំបន់ទេសចរណ៍ធម្មជាតិ និងបាតសមុទ្រ ។ លោក ប៉ាក សុខុម រដ្ឋលេខាធិការក្រសួងទេសចរណ៍ធ្លាប់មានប្រសាសន៍ កាលពីខែសីហាថា បច្ចុប្បន្ននេះទីផ្សារទេសចរណ៍ចិនមានកំណើនយ៉ាងខ្លាំងនៅលើពិភពលោក ។ នៅឆ្នាំ២០២០ អ្នកទេសចរចិននឹងចេញកម្សាន្តក្រៅប្រទេស ប្រមាណ២០០លាននាក់ ឬច្រើនជាងនេះ ហើយអាចនឹងចំណាយប្រាក់ប្រមាណ៤២០ប៊ីលានដុល្លារអាមេរិក ។
មន្ត្រីដដែលបន្តថា នៅឆ្នាំ២០៣០អ្នកទេសចរចិននឹងចេញដើរកម្សាន្តនៅលើពិភពលោកប្រមាណ៣០០លាននាក់ទៅ៥០០លាននាក់ ហើយការចំណាយប្រាក់កើនដល់ប្រមាណ៨៥០ប៊ី លានដុល្លារអាមេរិក ៕
ចែករំលែកព័តមាននេះ