រាជធានីភ្នំពេញ ៖ រថយន្តឡិចស៊ីស៤៧០មួយគ្រឿង ពេលធ្វើដំណើរបត់ត្រឡប់ក្រោយមិនប្រយ័ត្ន ត្រូវម៉ូតូមួយគ្រឿងទៀតបើកបរដោយបុរសម្នាក់ធ្វើដំណើរបញ្ច្រាសទិសគ្នាក្នុងល្បឿនលឿនទៅបុកចំក្បាលរថ
យន្តពេញទំហឹង បណ្តាលអោយប៉ើងផ្លោងបោកនឹងថ្នល់រងរបួសធ្ងន់។
ហេតុការណ៍នេះបានកើតឡើងកាលពីវេលាម៉ោង១០យប់ថ្ងៃទី២៣ ខែតុលា នៅតាមបណ្តោយផ្លូវ៣៧១ ទល់មុខនឹងរោងចក្រផលិតទឹកស៊ីអុីវ ផេង លី សង្កាត់ស្ទឹងមានជ័យ២ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថាមុនកើតហេតុ គឺមានរថយន្តមួយគ្រឿងម៉ាកឡិចស៊ីស៤៧០ ពណ៌ស្ករ ពាក់ស្លាកលេខ ភ្នំពេញ ២H-៦៦៣៣ បើកបរដោយស្ត្រីម្នាក់ ធ្វើដំណើរតាមបណ្ដោយផ្លូវ៣៧១ ក្នុងទិសដៅពីលិចទៅកើត មកឈប់នៅមុខហាង កោសខ្យល់ និងម៉ាស្សាធ្វើសរសៃមួយកន្លែងនៅទល់មុខកន្លែងកើតហេតុ ហើយបានចូលទៅខាងក្នុងមួយសន្ទុះក្រោយមកក៏ចេញមកវិញ ។
លុះស្ត្រីខាងលើឡើងបើករថយន្តចេញទៅ ដោយគាត់បានបត់រថយន្តត្រឡប់ក្រោយវិញ ពេលនោះស្រាប់
តែម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ ១FQ-១៨៨៥ បើកបរដោយបុរសម្នាក់ ធ្វើដំណើរក្នុងទិសបញ្ច្រាសគ្នាទៅបុកចំក្បាលរថយន្តឡិចស៊ីស៤៧០ពេញទំហឹង បណ្តាលអោយប៉ើងផ្លោងអ្នកបើកម៉ូតូបោកនឹងថ្នល់រងរបួសធ្ងន់សន្លប់ស្ដូកស្ដឹង ចំណែករថយន្តខូចខាតមួយកំណាត់មុខ ហើយម៉ូតូក៏ខូចខាតមួយកំណាត់មុខដូចគ្នា។
បន្ទាប់ពីកើតហេតុ ភាគីខាងរថយន្តបានបើករថយន្តអែបខាង ហើយចុះទៅមើលជនរងគ្រោះភ្លាមៗ ហើយក៏បានទាក់ទងហៅរថយន្តសង្គ្រោះមកដឹកជនរងគ្រោះទៅសង្គ្រោះភ្លាមៗនៅមន្ទីរពេទ្យ និងទៅតាមមើលជនរងគ្រោះដល់មន្ទីរពេទ្យផងដែរ ។
ក្នុងហេតុការណ៍នេះដែល ភាគីខាងរថយន្តបង្កបានប្រាប់ថា គាត់មិនរត់ទៅណាទេ គាត់នឹងនៅទទួលខុសត្រូវចំពោះជនរងគ្រោះគ្រប់បែបយ៉ាង តាមដែលអាចធ្វើទៅបាន។
ក្រោយកើតហេតុ ជនរងគ្រោះត្រូវបានរថយន្តសង្គ្រោះបន្ទាន់គ្លីនិកឯកជនមកដឹកទៅសង្គ្រោះភ្លាមៗ ហើយភាគីខាងម្ចាស់រថយន្តក៏តាមទៅមើលជនរងគ្រោះដល់មន្ទីរពេទ្យដែរ ។
ចំណែកឯរថយន្តនិងម៉ូតូត្រូវបានខាងកម្លាំងសមត្ថកិច្ចជំនាញចរាចរណ៍ធ្វើការវាស់វែងយកទៅរក្សាទុកបណ្តោះអាសន្ននៅអធិការដ្ធាននគរបាលខណ្ឌមានជ័យ រងចាំដោះស្រាយគ្នានៅពេលក្រោយ ៕
ចែករំលែកព័តមាននេះ