ខេត្តកំពង់ស្ពឺ ៖ បុរសម្នាក់ខឹងឪពុកស្តីបន្ទោសរឿងដើរផឹកស៊ី និងសេពគប់តែជាមួយមិត្តភក្ដិមិនល្អ ក៏ស្ទុះទាញដែកកេះដុតផ្ទះខ្លួនឯងឆេះសន្ឋោសន្ឋៅ ហើយត្រូវឪពុកប្តឹងសមត្ថកិច្ចចាប់ឃាត់ខ្លួនចាត់ការតាមច្បាប់។
ហេតុការណ៍ខាងលើនេះបានកើតឡើងកាលពីម៉ោង១១និង៣០នាទីព្រឹកថ្ងៃទី២៣ ខែតុលា ឆ្នាំ២០១៨ ស្ថិតនៅភូមិកណ្តាល ឃុំវល្លិ៍ស ស្រុកសំរោងទង ខេត្តកំពង់ស្ពឺ។
កូនប្រុសជាជនសង្ស័យខាងលើឈ្មោះ គី សំណាង ភេទប្រុស អាយុ២៦ឆ្នាំ រស់នៅភូមិកើតហេតុខាងលើ។
ប្រភពព័ត៌មានពីឪពុករបស់ជនសង្ស័យឈ្មោះ ម៉ែន គន អាយុ៥៩ឆ្នាំ បានរៀបរាប់ប្រាប់សមត្ថកិច្ចថា ផ្ទះដែលឆេះនេះ មានទំហំ៤ម៉ែត្រគុណនឹង៥ម៉ែត្រ ជញ្ជាំងក្តារប្រក់ស័ង្កសី បណ្តាលឲ្យឆេះខូចខាតលុយខ្មែរចំនួន១០ម៉ឺនរៀល, ពូកចំនួន២, គ្រែចំនួន៣, ទូចំនួន២ និងសម្លៀកបំពាក់មួយចំនួន។
ប្រភពដដែលបានបន្តទៀតថា នៅមុនកើតហេតុ កូនប្រុសគាត់បានដើរផឹកស៊ីសេពគប់មិត្តភក្តិមិនល្អ បង្ករឿងជាញឹកញាប់ លុះនៅវេលាកើតហេតុ កូនប្រុសម្នាក់វិលចូលផ្ទះ ទាំងស្រវឹងអួទីនួទាំងព្រឹក ឃើញកាយវិការកូនបែបនេះ គាត់ក៏ស្តីប្រដៅឲ្យកូនកែខ្លួនមកដើរផ្លូវត្រូវវិញ ស្រាប់តែកូនប្រុសមិនព្រមស្តាប់ពាក្យប្រៀនប្រដៅ ក៏ស្ទុះយកដែកកដុតផ្ទះ ឆេះសន្ឋោសន្ឋៅ អ្នកភូមិជួយដងទឹកពន្លត់ដែរ តែមិនអាចជួយសង្គ្រោះបានឡើយ។
ដោយទ្រាំនឹងទង្វើកូនលែងបាន បុរសជាឪពុកមកប្តឹងសមត្ថកិច្ចឲ្យចុះឃាត់ខ្លួនចាត់ការតាមច្បាប់។
ប្រជាពលរដ្ឋ រស់នៅក្នុងភូមិកើតហេតុ បានសំណូមពរឲ្យសមត្ថកិច្ច ចាត់ការជនសង្ស័យខាងលើឲ្យបានធ្ងន់ធ្ងរទៅតាមច្បាប់៕
ចែករំលែកព័តមាននេះ