រាជធានីភ្នំពេញ ៖ ក្នុងគោលបំណងដោះស្រាយបញ្ហា និងសន្តិភាព និងការបង្រួបបង្រួមជាតិមានជំនួបជាច្រើនលើកច្រើនសារ រហូតដល់មានកិច្ចព្រមព្រៀងទីក្រុងប៉ារីស ២៣ តុលា ឆ្នាំ ១៩៩១…
រាជធានីភ្នំពេញ ៖ ក្នុងគោលបំណងដោះស្រាយបញ្ហា និងសន្តិភាព និងការបង្រួបបង្រួមជាតិមានជំនួបជាច្រើនលើកច្រើនសារ រហូតដល់មានកិច្ចព្រមព្រៀងទីក្រុងប៉ារីស ២៣ តុលា ឆ្នាំ ១៩៩១ ។
នៅក្នុងពិធីសំណេះសំណាលជាមួយប្រជាពលរដ្ឋនិស្សិតមកសហគមន៍អឺរ៉ុប កាលពីយប់ថ្ងៃទី២៣ តុលា ឈានចូលថ្ងៃទី២៤ សម្តចតេជោហ៊ុនសែនបានលើកឡើងទាក់ទងទៅនឹងកិច្ចព្រមព្រៀងសន្តិភាពទីក្រុងប៉ារីស ពីព្រោះថ្ងៃនេះជាថ្ងៃខួបលើកទី២៧ នៃកិច្ចព្រមព្រៀងសន្តិភាពប៉ារីស ។
សម្តេចតេជោ នាយករដ្ឋមន្ត្រីបានរំលឹកទាក់ទងទៅនឹងប្រវត្តិនៃការកើតឡើងនៃកិច្ចព្រមព្រៀងថ្ងៃទី២៣ តុលាយ៉ាងដូច្នេះ ៖ សម្តេចបានមានប្រសាសន៍ថា ដោយសារតែសង្គ្រាមនៅតែបន្តធ្វើឲ្យប្រជាជនរងទុក្ខវេទនាជាបន្តបន្ទាប់ ទើបមានកិច្ចព្រមទីក្រុងប៉ារីស ២៣ តុលា ១៩៩១ ។ កិច្ចព្រមព្រៀងក្នុងគោលបំណងស្វែងរកសន្តិភាព និងការបង្រួបបង្រួមជាតិ សម្តេចក៏បានស្វែងរកនូវដំណោះស្រាយនយោបាយមួយ ។ សម្តេចបន្តថា នៅឆ្នាំ១៩៨៤ នៅពេលដែលសម្តេចតេជោ ស្ថិតនៅជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស គឺមានការរៀបចំជំនួបរវាងសម្តេច និងសម្តេចព្រះនរោត្តមសីហនុព្រះមហាវីរក្សត្រនៅទីក្រុងប៉ារីស ប្រទេសបារាំងដែលជួយរៀបចំដោយរដ្ឋមន្ត្រីក្រសួងការបរទេសបារាំងនាពេលនោះ ។ ប៉ុន្តែជំនួបនេះត្រូវបានអាក់ខានអាស្រ័យដោយប្រទេសមួយចំនួន និងក្រុមខ្មែរក្រហមជំទាស់ ។ ការខិតខំលើកនេះ ប្រើរយៈពេលវែងបង្គួរ ដោយមានការជ្រោមជ្រែងពីមិត្តភក្តិបរទេស និងឥស្សរជនខ្មែរមួយចំនួនក្នុងនោះលោកស្រី ពុង ឈីវហ្កិច បច្ចុប្បន្នជាប្រធានអង្គការលីកាដូជាអ្នកប្រឹងប្រែងខ្លាំងជាងគេ ក្នុងទំនាក់ទំនងរវាងសម្តេចតេជោជាមួយសម្តេចព្រះនរោត្តមសីហនុពេលចរចានៅទីក្រុងប៉ារីស ។
សម្តេចតេជោក៏បានឲ្យដឹងថា ការចាប់ផ្តើមការចរចាដំបូង គឺនៅថ្ងៃទី២ ខែធ្នូ ឆ្នាំ១៩៨៧ នៅ FERE-EN-TARDENOIS នៅប្រទេសបារាំងដែលការចរចានេះមានសេចក្តីប្រកាសរួម ដែលឡាយព្រះហស្តលេខាដោយសម្តេចព្រះនរោត្តមសីហនុ និងសម្តេចតេជោ (ជំនួបចរចា សីហនុ-ហ៊ុនសែន នៅ FERE-EN-TARDENOIS ថ្ងៃទី២-០៤ ខែធ្នូ ឆ្នាំ១៩៨៧) ។ ការចរចា សីហនុ-ហ៊ុន សែន លើកទី២ ប្រព្រឹត្តឡើងនៅថ្ងៃទី២០-២១ ខែមករា ឆ្នាំ១៩៨៨ នៅ SAINT-GERMAIN-EN-LAYE ប្រទេសបារាំង ។ សម្តេចគូសបញ្ជាក់ថា ការចាប់ផ្តើមពីជំនួបបើកផ្លូវរវាងសីហនុ-ហ៊ុន សែន ទាំងពីរលើកចរន្តស្វែងរកដំណោះស្រាយនយោបាយនៅកម្ពុជាកាន់តែរីកធំឡើងវេទិកាចរចាត្រូវបានពង្រីករវាងភាគីកម្ពុជា និងមានការចូលរួមពីសំណាក់ប្រទេសមួយចំនូន ។
សម្តេចតេជោនាយករដ្ឋមន្ត្រីបានបន្តទៀតថា អ្វីៗស្ថិតនៅក្នុងស្ថានភាពល្អប្រសើរ ការប្រជុំក្រុមប្រឹក្សាជាតិ ជាន់ខ្ពស់ បូកប្រទេសធំទាំង៥ សហប្រធានសន្និសីទទីក្រុងប៉ារីស ដែលមានបារាំង និងឥណ្ឌូនេស៊ី ព្រមទាំងតំណាងពិសេសរបស់អគ្គលេខាអង្គការសហប្រជាជាតិបានបន្តធ្វើពីថ្ងៃទី២៦-៣០ ខែសីហា ឆ្នាំ១៩៩១ នៅប៉ាតាយ៉ាប្រទេសថៃ ។ ចំណុចនេះមិនត្រូវបានដោះស្រាយនៅទីក្រុងប៉ាតាយ៉ាទេ គឺសម្តេចតេជោបានមកពិភាក្សាជាមួយថ្នាក់ដឹកនាំនៅក្នុង ប្រទេស ហើយសម្រេចស្នើឡើងនូវរូបមន្តប្រព័ន្ធសមាមាត្រ តាមខេត្តហើយត្រូវបានភាគីទាំងអស់យល់ព្រមនៅទីក្រុងញូវយ៉ក ពេលប្រជុំអង្គការសហប្រជាជាតិចាប់ពីថ្ងៃ១៤-២១ ខែកញ្ញា ឆ្នាំ១៩៩១ ។
ប្រព័ន្ធសមាមាត្រតាមខេត្តកំពុងប្រើប្រាស់សម្រាប់ការបោះឆ្នោតជ្រើសរើសតំណាង រាស្ត្ររហូតដល់សព្វថ្ងៃនេះ ។ សម្តេចតេជោបានបន្តទៀតថា អ្វីៗដែលត្រូវដោះស្រាយរួចរាល់ គឺនៅពេលដែលអេសអ៊ិនស៊ី (SNC) ចូលកាន់កាប់អង្គការសហប្រជាជាតិ ក្នុងខែកញ្ញា ឆ្នាំ១៩៩១ រាប់ទាំងកំណត់យកថ្ងៃទី២៣ តុលា ឆ្នាំ១៩៩១ ជាថ្ងៃចុះហត្ថលេខានៅទីក្រុងប៉ារីសផងដែរ ។ សម្តេចបញ្ជាក់ថា «យើងបានឆ្លងកាត់ដំណាក់កាលសង្គ្រាមទាំងស្រុង ដំណាក់កាលវាយផង ចរចាផង និងដំណាក់កាលសន្តិភាពទាំងស្រុង ។ ជម្រើសចុងក្រោយសម្រាប់សន្តិភាពទាំងស្រុងនៅកម្ពុជា គឺការដាក់ចេញ និងអនុវត្តនូវនយោបាយឈ្នះៗដែលបានអនុវត្តដ៏ជោគជ័យពីឆ្នាំ១៩៩៦-១៩៩៨ ។ ចំណុចសំខាន់៣ នៃនយោបាយឈ្នះ-ឈ្នះ ១) ការធានាដល់អាយុជីវិត និងសុវត្ថិភាពរបស់អតីតគូបដិបក្ស២) ការផ្តល់ការងារ និងអាជីពដល់អ្នកដែលបានដាក់អាវុធ ៣) ការទទួលស្គាល់កម្មសិទ្ធិលើទ្រព្យ ជាពិសេសដី និងអគារដែលពួកគេកាន់កាប់»។ សម្តេចបន្ថែមថា «នេះជាសន្តិភាពដែលជនជាតិកម្ពុជាបានរួមគ្នាបង្កើតឡើងដោយខ្លួនឯង គ្មានអ្នកឈ្នះគ្មានអ្នកចាញ់ និងឯកភាពជាតិ ឯកភាពទឹកដី ជាលើកដំបូងក្នុងប្រវត្តិជាង៥០០ ឆ្នាំ ដែលកម្ពុជាជាប្រទេសមួយមានតំបន់ត្រួតត្រាមួយមានរដ្ឋធម្មនុញ្ញមួយមានមហាក្សត្រមួយ មានរាជរដ្ឋាភិបាលតែមួយ មានកម្លាំងប្រដាប់អាវុធតែមួយ គ្មានការបែងចែកដែលយើងទាំងអស់គ្នាត្រូវរួមគ្នារក្សានូវសន្តិភាពនេះ» ។
សម្តេចតេជោនាយករដ្ឋមន្ត្រី បានថ្លែងប្រាប់បងប្អូនខ្មែរនៅក្រៅស្រុកដែលបានចូលរួមដំណើរការប្រជាធិបតេយ្យតាមរយៈការអំពាវនាវឲ្យពលរដ្ឋទៅបោះឆ្នោត ។ ការបោះឆ្នោតជូនគណបក្សប្រជាជនកម្ពុជា គឺជាការជ្រើសរើសដ៏ត្រឹមត្រូវមានន័យថា ជាការបោះឆ្នោតជ្រើសរើសយកនូវសុខសន្តិភាព ការអភិវឌ្ឍ និងបន្តររក្សានូវកិច្ចខិតខំប្រឹងប្រែងរបស់ជីដូនជីតារបស់ខ្លួន ៕
ចែករំលែកព័តមាននេះ