រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីថ្ងៃទី២៣ តុលា បានបញ្ជូនខ្លួនក្រុមជនសង្ស័យលួចរថយន្ត២នាក់ ទៅសាលាដំបូង ដើម្បីធ្វើការសាកសួរ និងចោទប្រកាន់ជាផ្លូវការ ។
ជនសង្ស័យទាំង២នាក់ខាងលើ ម្នាក់ឈ្មោះ ឈន សុភារម្យ ភេទប្រុស អាយុ៣០ឆ្នាំ មុខរបរលក់ដូរ មានទីលំនៅផ្ទះលេខ១០០ ផ្លូវលេខ៩ ភូមិត្រពាំងថ្លឹង១ សង្កាត់ចោមចៅ២ ខណ្ឌពោធិសែនជ័យ និងម្នាក់ទៀតឈ្មោះ តាំង ឈីវហុក ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅផ្ទះលេខ១៦៤ ផ្លូវលេខ១៣២z សង្កាត់ ទឹកល្អក់១ ខណ្ឌទួលគោក រាជធានីភ្នំពេញ ។
ចំណែកម្ចាស់រថយន្តឈ្មោះ វង្ស សម្ភស្សហាសស្តា ភេទប្រុស អាយុ៣៧ឆ្នាំ មុខរបរលក់ដូរស្នាក់នៅផ្ទះជួល ផ្លូវលេខ៩៣ ភូមិទួលសង្កែ សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ ។
ជនសង្ស័យទាំង២នាក់ខាងលើត្រូវបានកម្លាំងសមត្ថកិច្ចជំនាញ នៃការិយាល័យនគរបាលព្រហ្មទណ្ឌកម្រិតស្រាល សហការជាមួយនគរបាលខណ្ឌទួលគោក ក្រោមការសម្របសម្រួលពីសំណាក់លោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីថ្ងៃទី២០ តុលា បានចុះធ្វើការឆែកឆេរផ្ទះលេខផ្ទះលេខ២១z ផ្លូវលេខ២២៦ ក្រុម៤៧ ភូមិ១៣ សង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
វត្ថុភស្តុតាងចាប់យក រថយន្តមួយគ្រឿងម៉ាកកាម៉ារី ពណ៌ទឹកមាស ស៊េរីឆ្នាំ២០០២ ដែលមានពាក់ស្លាកលេខ ភ្នំពេញ២AI- ៩២៣៩ ប្រព្រឹត្តនៅចំណុចផ្ទះជួល ផ្លូវលេខ៩៣ ភូមិទួលសង្កែ សង្កាត់ទួលសង្កែ១ ខណ្ឌឬស្សីកែវ កាលពីថ្ងៃទី១៩ តុលា ឆ្នាំ២០១៨ នេះ ។
នៅពេលឆែកឆេរបានរកឃើញវត្ថុតាងបន្ថែមទៀតដូចជា សោចង្កូតរថយន្ត២ដើម, កូនកន្ត្រៃ១, កូនសោលេខ១០ចំនួន១, ក្បាលកូវអាគុយរថយន្តចំនួន១ និង រថយន្តមួយគ្រឿង ។
បច្ចុប្បន្ន រថយន្តម៉ាកកាមរីខាងលើត្រូវបានសមត្ថកិច្ចប្រគល់ឲ្យម្ចាស់វិញហើយដែរ ៕
ចែករំលែកព័តមាននេះ