ខេត្តតាកែវ ៖ ប្រជាពលរដ្ឋនៅក្នុងសង្កាត់បារាយណ៍ក្រុងដូនមានការសប្បាយចិត្តត្រេចអរគ្រប់ៗគ្នា ខណៈពេលដែលមានក្រុមហ៊ុនឯកជនមួយបានចុះមកវាស់វែងនឹងយកគ្រឿងចក្រមកឈូសឆាយធ្វើផ្លូវ១ខ្សែនេះ ដែលរងការខូចខាត ដែលប្រជាពលរដ្ឋពិបាកធ្វើដំណើរទៅមកជាង៣០ឆ្នាំមកហើយនោះ ។
ដោយមិនមានអាជ្ញាធរខេត្ត ឬស្ថាប័នណាមួយអើរពើរខ្វល់ខ្វាយដល់ទុក្ខលំបាករបស់ប្រជាជនឡើយ ហើយនៅពេលឃើញមានក្រុមហ៊ុនយកគ្រឿងចុះមកនេះប្រជាពលរដ្ឋទាំងអស់មានកាសារទយ៉ាងខ្លាំង តែជាអកុសលនោះ ក្រុមហ៊ុនមួយនេះមិនដឹងជាមានមូលហេតុអីទេ យកគ្រឿងចក្រឈូសឆាយឲ្យផ្លូវ១ខ្សែនេះកាន់ពិបាកធ្វើដំណើរ ហើយស្រាប់តែដកគ្រឿងចក្រចេញវិញ អស់គ្មានសល់ឡើយ នៅពេលថ្មីៗនេះ ។
ប្រជាពលរដ្ឋរស់នៅសង្កាត់បារាយណ៍បានឲ្យដឹងថា ចំពោះផ្លូវ១ខ្សែនេះ ដែលមានប្រវែងចាប់គល់ស្ពាន ភូមិចុងទៅដល់ភូមិធន់មន់ ដែលមានប្រវែង តែជាង៨០០០ម៉ែត្រ ហើយចំពោះកំណាត់ផ្លូវដែលដែលទទួលរងការខូចខាតធ្វើឲ្យប្រជាពលរដ្ឋធ្វើដំណើរស្ទើតែមិនកើតនោះ គឺចាប់ពីគល់ស្ពាន ភូមិចុងថ្នល់មកដល់ខ្លោងទ្វាវត្តបារាយណ៍មានប្រវែងតែជិត១០០០ម៉ែត្រដែលទទួលរងការខូចខាតចូល៦អាណត្តិហើយ ដែលគ្មានអាជ្ញាធខេត្ត ឬស្ថាប័នណាខ្វល់ចំពោះបញ្ហានេះឡើយ នរណាពិបាកអីក៏ពិបាកទៅមិនខ្ចីខ្វល់ឡើយ ។
ប្រជាពលរដ្ឋដដែលបានបន្តទៀតថា ហើយមុនថ្ងៃបុណ្យភ្ជុំបិណ្ឌកន្លងទៅនេះ មានក្រុមហ៊ុនឯកជនមួយបានចុះមកធ្វើការវាស់វែងជាង២ខែ ទើបគេបានដាក់គ្រឿងចក្រមកធ្វើការឈូសឆាយផ្លូវខាងលើធ្វើឲ្យប្រជាពលរដ្ឋរស់នៅអមសងខាងផ្លូវ ព្រមទាំងអ្នកធ្វើដំណើរមានចិត្តសប្បាយចិត្តគ្រប់ៗគ្នាថា ផ្លូវដែលទទួលរងការខូចខាតពិបាកក្នុងការធ្វើដំណើរយ៉ាងវេទនានោះ លែងលំបាកបន្តទៀតហើយ ព្រោះមានក្រុមហ៊ុនឯកជនគេចុះមកធ្វើដោយចាក់ក្រាលកៅស៊ូងាយស្រួលក្នុងការធ្វើចរាចរណ៍ទៅមករបស់ពួកគាត់បន្តទៀត ។
អាជ្ញាធសង្កាត់បារាយណ៍បាននាំគ្នានិយាយថា បើតាមពួកគាត់បានដឹងនោះផ្លូវ១ខ្សែខាងលើនេះ ជាថវិការបស់គំរោងអេ ឌី ប៊ី តាមរយៈក្រសួងអភិវឌ្ឍន៍ជនបទជាអ្នកគ្រប់គ្រង ហើយមើលមកសកម្មភាពមុនភ្ជុំបិណ្ឌកន្លងទៅគេដាក់គ្រឿងមកធ្វើការឈូសឆាយផ្លូវនឹងធ្វើការបោះទីតាំងធ្វើក្រុមការងារសម្រាប់ស្នាក់យ៉ាងសកម្មបំផុត តែជាអកុសលនៅសប្តាហ៍មុននេះស្រាប់តែក្រុមហ៊ុននោះបានដកគ្រឿងចក្រចេញអស់គ្មានសល់ឡើយ មិនដឹងជា មូលហេតុអីឡើយ បើតាមកាសន្និដ្ឋាននោះអាចជាប់ទាក់ទងនឹងទាលុយទឹកតែនេះ ។
លោកមូល វិចិត្រ អភិបាលក្រុងដូនកែវបានប្រាប់កោះសន្តិភាពយើងតាមទូរស័ព្ទថា លោកគ្រាន់តែបានដឹងថា ក្រុមហ៊ុនដែលចុះមកធ្វើផ្លូវក្នុងសង្កាត់បារាយណ៍នេះ ជាក្រុមហ៊ុនចិនហើយក្រោមការគ្រប់គ្រងរបស់មន្ទីអភិវឌ្ឍន៍ជនបទខេត្ត ហើយចំពោះក្រុមហ៊ុនដែលគេដាក់គ្រឿងចក្រមកធ្វើផ្លូវនេះគេមិនបានប្រាប់មកលោក១មាត់ដែរ ហើយនៅពេលដកចេញទៅក៏លោកមិនដឹងដែរ ។
លោកលីវ សំណាង ប្រធានមន្ទីរអភិវឌ្ឍន៍ជនបទខេត្តបានប្រាប់កោះសន្តិភាពយើងតាមទូរស័ព្ទដោយមានទាំងមាន់រងាវថា លោកអត់ដឹងថា ក្រុមហ៊ុននោះឈ្មោះអីទេ គ្រាន់តែដឹងថាជាក្រុមហ៊ុនចិនដែលគេបានដេញថ្លៃនៅក្រសួង ហើយលោកគ្រាន់តែចាំសម្របសម្រួលតែប៉ុណ្ណោះ ៕
ចែករំលែកព័តមាននេះ