រាជធានីភ្នំពេញ ៖ រថយន្តមួយគ្រឿងបើកលឿនបុកឃឿនពុះចែកទ្រូងផ្លូវខូចខាតអស់ចំនួន២ផ្ទាំង បង្កឲ្យមានការភ្ញាក់ផ្អើល កាលពីវេលាម៉ោង៧យប់ ថ្ងៃទី២៣ ខែតុលា ឆ្នាំ២០១៨ នៅមុខព្រលានយន្តហោះអន្តរជាតិភ្នំពេញ ដែលស្ថិតនៅតាមបណ្ដោយផ្លូវសហព័ន្ធរុស្ស៊ី ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។
រថយន្តបង្កខាងលើពណ៌ស្ករ ពាក់ស្លាកលេខ ភ្នំពេញ 2H – 8279 បើកបរដោយបុរសម្នាក់ក្នុងទិសដៅពីកើតទៅលិចក្នុងល្បឿនលឿន ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុគេឃើញរថយន្តបង្កបើកបរដោយបុរសម្នាក់ក្នុងទិសដៅពីកើតទៅលិចក្នុងល្បឿនយ៉ាងលឿនបានរេចង្កូតបុកឃឿនពុះចែកទ្រូងផ្លូវខូចខាតអស់ចំនួន២ផ្ទាំង ចំណែករថយន្តបង្កខាងលើនោះដែរបានខ្ទៀតទៅផ្នែកខាងស្ដាំទទឹងផ្លូវ បណ្តាលឲ្យកកស្ទះចរាចរណ៍ផងដែរ ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយប្រាប់ថា ទីតាំងខាងលើ មានឃឿនពុះចែកទ្រូងផ្លូវចំនួន២ ដែលពិបាកក្នុងការបើកបរបណ្តាលឲ្យរថយន្តជាច្រើនគ្រឿងរងគ្រោះថ្នាក់ជាញឹកញាប់ផងដែរម្យ៉ាងទៀតទីតាំងខាងលើ ទ្រូងផ្លូវពុំមានភ្លើងបំភ្លឺជា សញ្ញាសម្គាល់នោះឡើយ ។
បើតាមសម្តីបុរសជាតៃកុងរថយន្តបង្កខាងលើបាននិយាយប្រាប់ថា នៅមុនពេលកើតហេតុ ដោយមានម៉ូតូចំនួន២គ្រឿងបានបើកជែងគ្នា ហើយគាត់បានគេចទៅផ្នែកខាងឆ្វេងទើប
បណ្តាលឲ្យបុកខឿនពុះចែកផ្លូវតែម្តង ។
ក្រោយពេលកើតហេតុសមត្ថកិច្ចជំនាញចរាចរណ៍ខណ្ឌពោធិ៍សែនជ័យបានមកដល់ ហើយបានប្រគល់ឲ្យជំនាញចរាចរណ៍នៃការិយាល័យចរាចរណ៍ផ្លូវគោករាជធានីភ្នំពេញ ដើម្បីវាស់វែង និងយករថយន្តបង្កខាងលើយកទៅរក្សាទុក ដើម្បីរង់ចាំការដោះស្រាយថ្ងៃក្រោយ៕
ចែករំលែកព័តមាននេះ