ADផ្ទាំងផ្សព្វផ្សាយពាណិជ្ជកម្ម

ព្រោះតែជម្លោះគ្រោះថ្នាក់ចរាចរ ជនរងគ្រោះក្លាយទៅជាជនបង្ក

5 ឆ្នាំ មុន

ភ្នំពេញ
២៣ ខែ តុលា ឆ្នាំ ២០១៨ ម៉ោង ២៣:៣៩

រាជធានីភ្នំពេញ ៖ បុរសជាសន្តិសុខរបស់ក្រុមហ៊ុនឯកជនម្នាក់ ត្រូវបានកម្លាំងនគរបាលប៉ុស្តិ៍ចតុមុខ ចាប់វាយខ្នោះដៃទាំងពីរ ខណៈដែលរូបគាត់កំពុងតែជិះម៉ូតូម៉ាក ZOOMER-X មួយគ្រឿងពីក្រោយ កូនស្រីរបស់គាត់ឌុបចេញពីធ្វើការទៅផ្ទះ ហើយត្រូវបានម៉ូតូម៉ាកស្គូពីមួយគ្រឿង ដែលបើកបរដោយ យុវជនម្នាក់ឌុបបងស្រីរបស់ខ្លួនម្នាក់ទៀតពីក្រោយដែរនោះ។ បានបោះពួយក្នុងល្បឿន យ៉ាងលឿនក្នុង ទិសដៅបញ្ច្រាសទៅបុកម៉ូតូរបស់គាត់ចំពីមុខពេញទំហឹង បណ្តាលឲ្យដួលហើយកូនស្រីរបស់គាត់ ក៏រងរបួសងើបមិនរួច ចំណែករូបគាត់ក៏រងរបួសជើងម្ខាង ទើបបង្កជាជម្លោះ និងឈានទៅដល់ការ ប្រើអំពើហិង្សា ដោយរូបគាត់បានស្ទុះទៅទាត់ធាក់ទៅលើយុវជនម្នាក់នោះ ជាច្រើនជើងបណ្តាលឱ្យ រូបគេចុករមួលរងរបួសធ្ងន់ និងត្រូវបានគេបញ្ជូនទៅកាន់មន្ទីរពេទ្យភ្លាមៗនោះ។

ហេតុការណ៍នេះដែរ បានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៥ និង១៥នាទីល្ងាច ថ្ងៃទី២៣ ខែតុលា ឆ្នាំ ២០១៨ នៅចំណុចភ្លើងស្តុប ផ្លូវព្រះសុធារស កែងនឹងផ្លូវព្រះសុរាម្រិត ក្នុងសង្កាត់ចតុមុខ ខណ្ឌដូនពេញ។ តាមប្រពភព័ត៌មានពីនគរបាលបានប្រាប់ឱ្យដឹងថា បុរសជាជនដៃដល់ដែលបានចាប់ ឃាត់ខ្លួនមានឈ្មោះ ឈុន ចិត្ត្រា អាយុ៤០ឆ្នាំ មុខរបជាសន្តិសុខឯកជនរបស់ក្រុមហ៊ុន ព្រះខ័នរាជ្យ ស្នាក់នៅក្នុងសង្កាត់ផ្សារដើមថ្កូវ ខណ្ឌចម្ការមន។

ចំណែកឯយុវជនរងគ្រោះមានឈ្មោះ វ៉ាន់ ចាន់រ៉ា អាយុ ១៤ឆ្នាំ។ មុនពេលកើតហេតុ បុរសជាជនដៃដល់ត្រូវបានកូនស្រី របស់គាត់ដែលមានអាយុ ១៩ឆ្នាំ ម្នាក់ជិះម៉ូតូម៉ាក ZOOMER-X ពណ៌ស ពាក់ស្លាកលេខ ភ្នំពេញ ១DQ-១៣៨៩ មួយគ្រឿង ទៅឌុបពីកន្លែងធ្វើការរបស់គាត់ទៅផ្ទះ។ លុះមកដល់ចំណុចកើតហេតុខាងលើ ខណៈដែលកូនស្រី របស់គាត់កំពុងតែឌុបក្នុងល្បឿនយឺតៗនោះ ក៏ត្រូវបានម៉ូតូម៉ាកស្គូពី ពណ៌ស ពាក់ស្លាកលេខ ភ្នំពេញ ១AS-២៥៨០ មួយគ្រឿង ដែលបើកបរដោយយុវជនម្នាក់ខាងលើ ដោយមាននារីម្នាក់ជាបងម្នាក់ជិះ ពីក្រោយ ផងដែរនោះ បានបោះពួយក្នុងល្បឿនយ៉ាងលឿនបាន បើកបញ្ច្រាសផ្លូវទៅបុកចំពីមុខ បណ្តាលឲ្យដួលទាំងពីរគ្រឿងតែម្តង។

តាមប្រភពដដែលបានប្រាប់បន្តទៀតថា ពេលដែលម៉ូតូរបស់ យុវជនម្នាក់នោះ បើកមកបុកម៉ូតូរបស់គាត់ដួលទាំងពីរគ្រឿងនោះ ក៏បានបណ្តាលឲ្យកូនស្រីរបស់គាត់ រងរបួសដោយងើបមិនរួច ហើយរូបគាត់ក៏រងរបួសជើងម្ខាងផងដែរ។ ក្រោយពីម៉ូតូទាំងពីរគ្រឿង បុកគ្នាដួលរួចហើយនោះ ទើបឈានទៅដល់ការឈ្លោះប្រកែកជជែកតឹងសរសៃក ក៏ស្រាប់តែបុរសជា សន្តិសុខនោះក្នុងសម្លៀកបំពាក់ស៊ីវិលម្នាក់នោះ រួមទាំងមនុស្សមួយចំនួនផ្សេងទៀតមិនដឹងជាមកពីណា បាននាំគ្នាស្ទុះទៅទាត់ធាក់ទៅលើខ្លួនយុវជនម្នាក់ខាងលើត្រូវជាច្រើនជើងទើបបណ្តាលឲ្យរូបគេមានការចុករមួលរងរបួសពេញខ្លួន និងត្រូវបានក្រុមគ្រួរសារបញ្ជូនយកទៅកាន់គ្លីនិកមួយដើម្បីធ្វើការព្យាបាល ភ្លាមៗតែម្តង។

ក្រោយពេលកើតហេតុ កម្លាំងមានសម្ថកិច្ចមូលដ្ឋានក៏បានចុះមកដល់កន្លែង គ្រោះថ្នាក់ចរាចរណ៍ ធ្វើការវាស់វែងរកខុសត្រូវ រួចយកម៉ូតូទាំងពីរគ្រឿងយកទៅរក្សារទុក នៅប៉ុស្តិ៍នគរបាលចតុមុខ។ ដោយសារតែករណីគ្រោះថ្នាក់ចរចរណ៍នេះ ឈានទៅ ដល់ការប្រើអំពើហិង្សាបង្ករបួសស្នាមទៅដល់ភាគីម្ខាងទៀតឲ្យរងរបួសធ្ងន់នោះ។ ទើបកម្លាំងមានសម្ថកិច្ចសម្រេចចិត្តចាប់វាយខ្នោះបុរសជាសន្តិសុខដៃដល់ និងធ្វើកំណត់ហេតុបញ្ជូនខ្លួនទៅកាន់អធិការដ្ឋាននគរបាលខណ្ឌដូនពេញ ដើម្បីចាត់ការទៅតាមផ្លូវច្បាប់ជាបន្តទៅទៀត៕