ខេត្តត្បូងឃ្មុំ ៖ ទីតាំងគល់ស្ពានគីហ្ស៊ុណាត្រើយខាងកើត ស្ថិតនៅឃុំទន្លេបិទ ស្រុកត្បូងឃ្មុំ បានក្លាយទៅជាទីលានចាក់សំរាម ដោយមានក្លិនស្អុយអសោចពេលដែលធ្វើដំណើរឆ្លងកាត់ ហើយក៏ស្ថិតនៅក្បែរប៉មទន្លេបិទផងដែរ ។ ហើយក៏មិនឃើញមានស្ថាប័នណាមួយ…
ខេត្តត្បូងឃ្មុំ ៖ ទីតាំងគល់ស្ពានគីហ្ស៊ុណាត្រើយខាងកើត ស្ថិតនៅឃុំទន្លេបិទ ស្រុកត្បូងឃ្មុំ បានក្លាយទៅជាទីលានចាក់សំរាម ដោយមានក្លិនស្អុយអសោចពេលដែលធ្វើដំណើរឆ្លងកាត់ ហើយក៏ស្ថិតនៅក្បែរប៉មទន្លេបិទផងដែរ ។ ហើយក៏មិនឃើញមានស្ថាប័នណាមួយ មានវិធានតាមចាប់អ្នកចាក់សំរាមទាំងនោះ ដើម្បីផាកពិន័យនូវឡើយ ជាមួយនោះអាជ្ញាធរបានធ្វើការព្រមាន ប្រសិនណាបើចាប់បាននឹងផាកពិន័យឲ្យបានធ្ងន់ ដើម្បីឲ្យអ្នកខូចនោះរាងចាល ។
ប្រជាពលរដ្ឋម្នាក់សូមមិនបញ្ចេញឈ្មោះបានប្រាប់ឲ្យដឹងនៅរសៀលថ្ងៃទី២៣ តុលា ២០១៨ថា នូវពេលដែលគាត់បានជិះម៉ូតូចេញមកពីផ្ទះកាត់តាមក្រោមស្ពានគីហ្ស៊ុណាត្រើយខាងកើតទន្លេបិទ ជួនបានឃើញពលរដ្ឋដែលមានផ្ទះនៅឆ្ងាយ ដោយក្នុងថង់មានច្រកសំរាម លុះពេលដែលមកដល់ទីនេះបានយកថង់សំរាមនោះចោលតែម្តង ។
ប្រជាពលរដ្ឋមិនបញ្ចេញអត្តសញ្ញាណប្រាប់បន្តថា តាមគំនិតរបស់គាត់មិនគាំទ្រចំពោះទង្វើបែបនេះទេ ព្រោះការធ្វើនេះប៉ះពាល់ដល់អនាម័យ ដែលប្រឈមនឹងជំងឺផ្សេងៗកើតឡើង ។ លុះពេលដែលឈឺបែរជាបន្ទោសទៅលើអាជ្ញាធរដីទៅវិញ គាត់មិនគាំទ្រនោះទេ ធ្វើយ៉ាងណាឲ្យចេះសំអាតបរិស្ថានទាំងអស់គ្នា ដែលនាំមកនូវសុខភាពល្អ ។ សំរាមចេះតែគរច្រើនឡើងៗ សូមឲ្យអាជ្ញាធរគ្រប់លំដាប់ថ្នាក់ត្រូវតែមានផែនការតាមចាប់ អ្នកចោលសំរាមនោះឲ្យខានតែបាន ។
លោកហ៊ូ សាអ៊ុន ជំទប់ទី១ ឃុំទន្លេបិទមានប្រសាសន៍ថា នូវពេលដែលរូបលោកបានធ្វើដំណើរឆ្លងកាត់ត្រង់ម្តុំគល់ស្ពានត្រើយទន្លេបិទផ្នែកខាងកើត ពិតជាបានឃើញគំនរសំរាមត្រូវបានពលរដ្ឋមួយចំនួនយកមកបោះចោលទីនោះមែន ហើយថែមទាំងមានក្លិនស្អុយថែមទៀតផង ។ បើនូវតែបន្តចាក់សំរាមទៀតអាចនឹងធ្វើឲ្យប៉ះពាល់ដល់ភ្ញៀវបរទេស ដែលបានធ្វើដំណើរមកមើលប៉មទន្លេបិទ ពេលដែលមានភ្ញៀវមកលេងច្រើននោះពលរដ្ឋដែលក់ដូរនៅក្បែរនោះក៏នឹងលក់ដាច់ផងដែរ ។ កាលណាគេមិនបានមកនឹងធ្វើឲ្យបាត់បង់នូវចំណូលថវិកាដោយសារ តែក្លិនសំរាមស្អុយពេក ។
ក្នុងនាមអាជ្ញាធរសូមអំពាវនាវដល់ពលរដ្ឋកុំឲ្យសំរាមមកចោលនៅគល់ស្ពានបន្តទៀតជាមួយនោះ រូបលោកនឹងដាក់ភ្ញាក់ងារចំនួន០៤នាក់ រង់ចាំតាមដាន បើឃើញចោល ឫបោះសំរាមនឹងត្រូវចាប់ផាកពិន័យ ឲ្យបានធ្ងន់រាងចាល ។
លោកហួរ ពិសិដ្ឋ ប្រធានមន្ទីរបរិស្ថានខេត្តវិញប្រាប់ឲ្យដឹងដែរថា យោងតាមអនុក្រិតលេខ១០៣ ដោយបានផ្ទេរការងារទៅឲ្យថ្នាក់ក្រោមជាតិ ដែលស្ថិតនៅលើក្រុង-ស្រុក ជាអ្នកដោះស្រាយលើកិច្ចការខាងលើ ហើយមន្ទីរវិញគ្រាន់តែជាអ្នកចាំពន្យល់ឲ្យការងារ បានប្រព្រឹត្តទៅមានប្រសិទ្ធភាព ៕
ចែករំលែកព័តមាននេះ