រាជធានីភ្នំពេញ ៖ សមាគមរោងចក្រកាត់ដេរនៅកម្ពុជា(GMAC) តំណាងរោងចក្រកាត់ដេរសម្លៀកបំពាក់និងស្បែកជើងនាំចេញទាំងអស់ក្នុងប្រទេសកម្ពុជា បានសរសេរលិខិតមួយច្បាប់ផ្ញើជូនលោកស្រី Cecilia Malmström ស្នងការពាណិជ្ជកម្មគណៈកម្មការអឺរ៉ុប ដើម្បីឲ្យលោកស្រីពិចារណាឲ្យបានល្អិតល្អន់ជុំវិញបញ្ហាការកំណត់នីតិវិធីព្យួរ ឬដកការអនុគ្រោះពន្ធ…
រាជធានីភ្នំពេញ ៖ សមាគមរោងចក្រកាត់ដេរនៅកម្ពុជា(GMAC) តំណាងរោងចក្រកាត់ដេរសម្លៀកបំពាក់និងស្បែកជើងនាំចេញទាំងអស់ក្នុងប្រទេសកម្ពុជា បានសរសេរលិខិតមួយច្បាប់ផ្ញើជូនលោកស្រី Cecilia Malmström ស្នងការពាណិជ្ជកម្មគណៈកម្មការអឺរ៉ុប ដើម្បីឲ្យលោកស្រីពិចារណាឲ្យបានល្អិតល្អន់ជុំវិញបញ្ហាការកំណត់នីតិវិធីព្យួរ ឬដកការអនុគ្រោះពន្ធ EBA ចេញពីកម្ពុជា ។
លិខិតដែលចុះហត្ថលេខាដោយ លោក ខេន លូ អគ្គលេខាធិការនៃសមាគមរោងចក្រកាត់ដេរនៅកម្ពុជា កាលពីថ្ងៃទី២០ តុលា កន្លងមក បានបញ្ជាក់យ៉ាងពិស្ដារថា វិស័យរបស់យើងផ្តល់ការងារដោយផ្ទាល់ដល់ប្រជាពលរដ្ឋប្រមាណ៧០ ម៉ឺននាក់ ដែលជាង៨៥%ជាស្ត្រីមកពីបណ្តាខេត្តជនបទ និងប្រជាពលរដ្ឋ២លាននាក់ដទៃទៀតក្នុងចំណោមប្រជាពលរដ្ឋសរុប១៦លាននាក់ពឹងផ្អែកលើ វិស័យរបស់យើង ។ ជារៀងរាល់ខែ ប្រាក់ខែជាង១៥០លានដុល្លារអាមេរិកត្រូវបានចំណាយទៅលើកម្មករទាំងនេះ ។
ដោយសារកិច្ចខិតខំប្រឹងប្រែងជាប់ជានិច្ចពីភាគីពាក់ព័ន្ធទាំងអស់នៅក្នុងវិស័យរបស់យើងរួមទាំងនិយោជក កម្មករ សហជីព សង្គមស៊ីវិល ដៃគូអភិវឌ្ឍន៍ និងរាជរដ្ឋាភិបាលកម្ពុជា វិស័យផលិតសម្លៀកបំពាក់និងស្បែកជើង បានរីកចម្រើន និងរួមចំណែកយ៉ាងខ្លាំងដល់កំណើនសេដ្ឋកិច្ច និងកែលម្អជីវភាពរបស់កម្មករយើង ។ ស្ត្រីកម្ពុជាក្រីក្ររាប់លាននាក់ និងគ្រួសាររបស់ពួកគេត្រូវបានទាញចេញពីភាពក្រីក្រ។ នៅក្នុងដំណើរការនេះ យើងក៏បានយកចិត្តទុកដាក់យ៉ាងប្រុងប្រយ័ត្នដើម្បីធានាថា ស្តង់ដាការងារ សង្គម និងបរិស្ថាន ដែលជាស្នូលនៃគោលការណ៍ណែនាំនៃប្រព័ន្ធអនុគ្រោះពាណិជ្ជកម្ម(GSP)របស់សហភាពអឺរ៉ុប ត្រូវបានរក្សា និងពិតណាស់ត្រូវបានលើកកម្ពស់ ។
សហភាពអឺរ៉ុបជាដៃគូពាណិជ្ជកម្មសំខាន់មួយសម្រាប់កម្ពុជា ហើយជាពិសេសចំពោះវិស័យសម្លៀកបំពាក់និងស្បែកជើង។ ជាង៤៦%នៃការនាំចេញសរុបនៃសម្លៀកបំពាក់និងស្បែកជើងរបស់យើងគឺទៅសហភាពអឺរ៉ុប ហើយយើងទន្ទឹងរង់ចាំបង្កើនចំនួននេះបន្ថែមទៀតនាឆ្នាំខាងមុខ ។
ការប្រកាសនាពេលថ្មីៗ ដែលធ្វើឡើងដោយសហភាពអឺរ៉ុបដែលបង្ហាញអំពីលទ្ធភាពក្នុងការព្យួរបណ្តោះអាសន្ននៃគម្រោងគំនិតផ្តួចផ្តើមស្តីពីការនាំចូលទំនិញគ្រប់ប្រភេទលើកលែងតែអាវុធ(EBA)សម្រាប់កម្ពុជា គឺជាការភ្ញាក់ផ្អើលសម្រាប់វិស័យឯកជនរួមទាំងវិនិយោគិន កម្មករ ព្រមទាំងអ្នកបញ្ជាទិញដែលទិញពីកម្ពុជា ។ ទោះយ៉ាងណាក្តី យើងនៅតែមានសុទិដ្ឋិនិយមថា វិស័យរបស់យើងនឹងមិនស្ថិតនៅក្នុងការដាក់ទណ្ឌកម្មណាមួយ និងមិនស្ថិតនៅក្នុងគោលដៅដាក់ទណ្ឌកម្មឡើយ ។ កំណត់ត្រារបស់យើងក្នុងការលើកកម្ពស់អនុសញ្ញាចំនួន១៥ពាក់ព័ន្ធនឹងសិទ្ធិមនុស្សនិងការងារស្នូល ព្រមទាំងអនុសញ្ញាចំនួន១២ពាក់ព័ន្ធនឹងបរិស្ថាន អភិបាលកិច្ចល្អ និងការប្រយុទ្ធប្រឆាំងការជួញដូរ និងផលិតគ្រឿងញៀនដែលសង្កត់ធ្ងន់នៅក្នុងគោលការណ៍ណែនាំរបស់លោកស្រី បង្ហាញពីការប្តេជ្ញាចិត្តរបស់យើងនៅក្នុងវិស័យនេះ ។
ក្រៅពីការផ្តល់សច្ចាប័នលើអនុសញ្ញាភាគច្រើនបំផុតក្នុងចំណោមអនុសញ្ញាដែលបានលើកឡើងខាងលើ កម្ពុជាជាប្រទេសឈានមុខគេសម្រាប់ការភ្ជាប់ការងារជាមួយពាណិជ្ជកម្ម។ គម្រោងរោងចក្រកាន់តែប្រសើរនៅកម្ពុជា(BFC) ដែលជាប្រព័ន្ធពិសេសមួយក្នុងការតាមដានរោងចក្រ ដែលគ្រប់គ្រងដោយអង្គការអន្តរជាតិខាងការងារ(ILO)បានដំណើរការតាំងពីឆ្នាំ២០០១ ។ គម្រោងនេះតម្រូវឲ្យរោងចក្រកាត់ដេរសម្លៀកបំពាក់នាំចេញទាំងអស់ស្ថិតនៅក្រោមការចុះពិនិត្យតាមដានរោងចក្រដោយឯករាជ្យ ដោយមិនមានការជូនដំណឹងជាមុនពីបុគ្គលិកBFC ហើយរបាយការណ៍វាយតម្លៃត្រូវបានដាក់បង្ហាញជាសាធារណៈនៅលើគេហទំព័ររបស់ពួកគេ ។
យើងប្តេជ្ញាចិត្តចំពោះដំណើរការកែលម្អជាប់ជានិច្ចសម្រាប់វិស័យរបស់យើង និងសម្រាប់កម្មកររបស់យើង ។ យើងត្រូវការការគាំទ្រពីដៃគូទាំងអស់របស់យើង រួមទាំងសហភាពអឺរ៉ុប ដើម្បីធ្វើឲ្យវាកើតឡើង ។ ការព្យួរបណ្តោះអាសន្ននៃគម្រោង EBA ឬទណ្ឌកម្មឯកតោភាគីរយៈពេលខ្លីណាមួយអាចមានផលប៉ះពាល់អវិជ្ជមានរយៈពេលវែងដល់ជីវិតរបស់កម្មករយើង និងគ្រួសាររបស់ពួកគេ ។ ភាពរីកចម្រើនទាំងអស់ដែលកម្ពុជាសម្រេចបានក្នុងរយៈកាល២ទសវត្សរ៍កន្លងមកនេះតាមរយៈកិច្ចខិតខំប្រឹងប្រែងពីភាគីពាក់ព័ន្ធទាំងអស់រួមទាំងដៃគូអភិវឌ្ឍន៍ដូចជា សហភាពអឺរ៉ុប អាចត្រូវបានបំផ្លាញយ៉ាងលឿន។
អាស្រ័យហេតុនេះ យើងអំពាវនាវឲ្យមានចំណាត់ការយកចិត្តទុកដាក់និងការសម្រេចប្រកបដោយការពិចារណាពីលោកស្រី។ សមាគមត្រៀមខ្លួនរួចជាស្រេចដើម្បីផ្តល់ការពិតបន្ថែមទៀតដល់លោកស្រីនៅពេលលោកស្រីតម្រូវក្នុងអំឡុងដំណើរការតាមដានរបស់លោកស្រី ។
យើងសូមថ្លែងអំណរគុណសហភាពអឺរ៉ុបនិងប្រជាពលរដ្ឋរបស់លោកស្រីចំពោះការគាំទ្រកម្ពុជារហូតមកដល់ពេលនេះទាំងក្នុងវិស័យពាណិជ្ជកម្ម និងជំនួយ ហើយទន្ទឹងរង់ចាំពាណិជ្ជកម្មទ្វេភាគីរយៈពេលជាច្រើនឆ្នាំបន្ថែមទៀត ៕
ចែករំលែកព័តមាននេះ