រាជធានីភ្នំពេញ ៖ បុរសជនជាតិចិន២នាក់ស្រវឹងជោកបើករថយន្តម៉ាកហាំមើរ (HUMER) ក្នុងល្បឿនលឿនជ្រុលបុករបាំងថ្មពុះចែកទ្រូងផ្លូវបណ្តាលអោយរងការខូចខាត មនិងធ្វើអោយមនុស្សរងរបួសធ្ងន់ម្នាក់និងស្រាលម្នាក់ ។
ហេតុការណ៍នេះបានកើតឡើងកាលពីវេលាម៉ោង២និង២០នាទីរំលងអាធ្រាត្រឈានចូលថ្ងៃទី២៣ ខែតុលា ឆ្នាំ២០១៨ នៅចំណុចមុខធនាគារសហពាណិជ្ជក.អ ផ្លូវលេខ១៩៩ កែងនិងផ្លូវម៉ៅសេទុង ស្ថិត ក្នុងសង្កាត់ទួលស្វាយព្រៃទី២ ខណ្ឌចំការមន ។
តាមសាក្សីនៅកន្លែងកើតហេតុបានអោយដឹងថា មុនពេលកើតហេតុ គេបានឃើញរថយន្តម៉ាកហាំមើរ (HUMER) ពណ៌ស ពាក់ស្លាកលេខ ភ្នំពេញ ២Z-១៥៥៥ បើកបរដោយបុរសជនជាតិចិនម្នាក់ និងបុរសម្នាក់ទៀតរួមដំណើរជាមួយ បានធ្វើដំណើរតាមផ្លូវម៉ៅសេទុង ក្នុងទិសដៅពីត្បូងទៅជើងក្នុងល្បឿនលឿន ។
លុះមកដល់ចំណុចកើតហេតុក៏រេចង្កូតទៅបុករបាំងថ្មពុះចែកទ្រូងផ្លូវបណ្តាលអោយរងការខូចខាតអស់ចំនួន២កង់ ចំណែករថយន្តខ្ទេចផ្នែកខាងមុខកល់ជាប់ទៅមុខលែងរួច ព្រមទាំងធ្វើអោយអ្នកបើកបរ របួសស្រាល ចំណែកអ្នករួមដំណើររងរបួសធ្ងន់ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ និងទំនាក់ទំនងទៅជំនាញមកធ្វើការវាស់ស្ទូចយករថយន្តនិងអ្នកបើកបរទៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយតាមច្បាប់ ៕
ចែករំលែកព័តមាននេះ