រាជធានីភ្នំពេញ ៖ អង្គការពាណិជ្ជកម្មពិភពលោក (WTO) បានកោតសរសើរចំពោះប្រទេសកម្ពុជាតូច ហើយមានការអភិវឌ្ឍន៍តិចតួច ប៉ុន្តែជាប្រទេសដែលអនុវត្តជោគជ័យក្នុងចំណោមប្រទេសមានសេដ្ឋកិច្ចលូតលាស់លឿន ក្នុងចំណោមប្រទេសជាសមាជិក ។
នេះបើតាមការបញ្ជាក់ឲ្យដឹងពីអគ្គនាយក WTO ។ ក្នុងជំនួបពិភាក្សាទ្វេភាគីជាមួយសម្តេចតេជោ ហ៊ុន សែន នាយករដ្ឋមន្ត្រី កាលពីថ្ងៃទី២២ តុលានេះក្នុងប្រទេសស្វីល លោករ៉ូបេតូកាវ៉ាហូ អាសេវ៉េដូ (Robeto Cavatho Azevedo) អគ្គនាយកអង្គការពាណិជ្ជកម្មពិភពលោកបានលើកឡើងថា កម្ពុជា គឺជាប្រទេសដែលមានការអភិវឌ្ឍតិចតួច ប៉ុន្តែ គឺជាប្រទេសមួយដែលបានក្លាយជាសមាជិករបស់អង្គការពាណិជ្ជកម្មពិភពលោក(WTO) ដែលបានអនុវត្តដោយជោគជ័យក្នុងចំណោមប្រទេសមានសេដ្ឋកិច្ចលូតលាស់លឿនបំផុតនៅក្នុងពិភពលោក ។
លោកអគ្គនាយកសង្ឃឹមថា ទស្សនកិច្ចរបស់សម្តេចតេជោនាយករដ្ឋមន្ត្រីមកកាន់ទីក្រុងហ្សឺណែវ ពិសេសមកកាន់ទីស្នាក់ការកណ្តាលរបស់ WTO នៅពេលនេះ គឺមិនមែនជាលើកចុងក្រោយនោះទេ ។ ក្នុងជំនួបនោះដែរ សម្តេចតេជោនាយករដ្ឋមន្ត្រីបានមានប្រសាសន៍ថា កិច្ចសហការវាងកម្ពុជាជាមួយនឹងអង្គការពាណិជ្ជកម្មពិភពលោកនឹងមានកិច្ចសហប្រតិបត្តិការកាន់តែល្អប្រសើរឡើង ពិសេសសេដ្ឋកិច្ចរបស់កម្ពុជានឹងទទួលបាននូវការអភិវឌ្ឍ និងមានកិច្ចសហប្រតិបត្តិការល្អជាមួយប្រទេសដទៃទៀត រួមទាំង WTOផងដែរ ។
សម្តេចបានបន្តថា កម្ពុជាបានចូលជាសមាជិករបស់ WTO រយៈពេល១៤ឆ្នាំរួចមកហើយ ក្នុងរយៈពេលនេះសម្តេចសូមអរគុណចំពោះ WTO សម្រាប់កិច្ចសហប្រតិបត្តិការទាំងអស់ដែលបានផ្តល់ជូនដល់ប្រទេសកម្ពុជា ។ សម្តេចបន្តថា កន្លងមកកម្ពុជាបានដើរតួនាទីជាប្រទេសសម្របសម្រួល កាលពីឆ្នាំ២០១៧ ហើយនៅឆ្នាំ២០១៨ដល់ឆ្នាំ២០២០ កម្ពុជាស្ថិតនៅក្នុងយន្តការត្រីភាគីនៃក្របខណ្ឌនៃ WTO ដោយសង្ឃឹមថា កម្ពុជានឹងបន្តទទួលបាននូវជំនួយពី WTO ។
សម្តេចតេជោក៏បានលើកឡើងថា កន្លងមកកម្ពុជាបានបើកស្ថានបេសកកម្មរបស់ខ្លួនប្រចាំនៅ WTO បើទោះបីជាខ្លួនស្ថិតក្នុងសេដ្ឋកិច្ចមួយដែលមានភាពទន់ខ្សោយក៏ពិតមែន តែកម្ពុជាជំនះក្នុងការដាក់ឲ្យមានស្ថានឯកអគ្គរាជទូតពាណិជ្ជកម្មនៅហ្សឺណែវ ដើម្បីជួយសម្រួលការងាររវាងកម្ពុជាជាមួយ និង WTO ។
លោកអគ្គនាយក WTO បានលើកឡើងថា កម្ពុជាមានលក្ខណៈសកម្មរបស់ខ្លួនពោលក្នុងរយៈពេល១៤ឆ្នាំកន្លងមក ថ្វីត្បិតបើប្រៀបធៀបជាមួយប្រទេសដទៃទៀតនោះកម្ពុជាមានលក្ខណៈ សម្បត្តិគ្រប់គ្រាន់ និងជាប្រទេសទី១ ដែលបានចាត់តាំងឲ្យមានតំណាងអចិន្រៃ្តយ៍ពាណិជ្ជកម្មរបស់ខ្លួនប្រចាំ WTO ។ លោកក៏បានចាត់ទុកសម្តេចតេជោ គឺជាអ្នកដឹកនាំមួយរូបដែលមានភាពឈ្លាវៃ ពីព្រោះថា WTO គឺជាស្ថាប័នមួយដែលផ្តល់នូវការគាំទ្រនូវស្មារតី និងជំនួយជាច្រើនដល់សមាជិករបស់ខ្លួនដែលខុសពីប្រទេសដទៃទៀតមិនបានធ្វើការចាប់អារម្មណ៍យកចិត្តទុកដាក់ ។ ជាមួយគ្នានោះដែរលោកក៏បានកោតសរសើរដល់កម្ពុជាផងដែរក្នុងការដើរតួនាទីនៃការកសាងស្ពានសម្រាប់ប្រទេសផ្សេងទៀត ពិសេសការស្វែងយល់ពីប្រព័ន្ធរបស់ WTO ។
លោកអគ្គនាយកបញ្ជាក់ថា «បច្ចុប្បន្ននេះកម្ពុជាមិនមែន ស្ថិតនៅក្រៅប្រព័ន្ធនោះទេពោល គឺកម្ពុជា ស្ថិតនៅក្នុងប្រព័ន្ធនៃ WTO ដែលកម្ពុជាបានស្វែងយល់ និងចាប់យកឱកាសបានច្រើន ។ ដោយសារភាពវៃឆ្លាតរបស់កម្ពុជានេះហើយបានជាកម្ពុជាចាប់យកនូវជំនួយបច្ចេកទេសពី WTO ដែលចំណាយទៅលើការជួយដល់កម្ពុជាមានទឹកប្រាក់ប្រមាណ៧,៧លានដុល្លារ ចន្លោះពីឆ្នាំ២០១០ ដល់ឆ្នាំ២០១៨ ហើយក្នុងរយៈពេល៤ឆ្នាំចុងក្រោយនៃការកសាងសមត្ថភាព មន្ត្រីមានចំនួនរហូតដល់៤១១នាក់ ជាមន្ត្រីរបស់រាជរដ្ឋាភិបាលកម្ពុជាដែលបានធ្វើការបណ្តុះបណ្តាលនៅគ្រប់សកម្មភាពរបស់ WTO» ។
នៅក្នុងជំនួបពិភាក្សាទ្វេភាគីនោះដែរសម្តេចតេជោ និងលោកអគ្គនាយកបានធ្វើការពិភាក្សាគ្នាយ៉ាងស៊ីជម្រៅទាក់ទិនទៅនឹងសង្គ្រាមពាណិជ្ជកម្មពិភពលោក ពិសេសរវាងសហរដ្ឋអាមេរិក និងប្រទេសចិនដែលកំពុងកើនឡើងកម្តៅផងដែរ ៕
ចែករំលែកព័តមាននេះ