រាជធានីភ្នំពេញ ៖ សេចក្តីរាយការណ៍បឋមឱ្យដឹងថា បុរសចំណាស់ម្នាក់តូចចិត្តខ្លួនមានជំងឺប្រចាំកាយ «មហារីកពោះវៀន» ដោយបានព្យាបាលយ៉ាងណាក៏ពុំជាសះស្បើយ ក៏សម្រេចចិត្តធ្វើអត្តឃាតដោយចង.កសម្លាប់ខ្លួនឯងស្លាប់ដូចតាមបំណង ក្រោមសំឡេងស្រែយំយ៉ាងសោកសៅពីក្រុមគ្រួសារ ។ ការប្រទះឃើញ និងបង្កការភ្ញាក់ផ្អើល កាលពីវេលាម៉ោង០៩ និង៣០នាទីព្រឹកថ្ងៃទី២៣ តុលា ស្ថិតនៅក្នុងបន្ទប់ទឹកជាន់ទី១ ផ្លូវបេតុង ស្ថិតនៅក្នុងភូមិតាងួន២ សង្កាត់កាកាប១ ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនរងគ្រោះខាងលើ ឈ្មោះ ចាន់ សារ៉េន អាយុ៥៨ឆ្នាំ ជាអតីតបុគ្គលិកបម្រើការងារនៅអាកាសយានដ្ឋានអន្តរជាតិភ្នំពេញ មានប្រពន្ធឈ្មោះ គឹម ភឿង អាយុ៤៧ឆ្នាំ មានកូន៣នាក់ សព្វថ្ងៃស្នាក់នៅក្នុងផ្ទះកើតហេតុខាងលើ។ គាត់កើតមានជម្ងឺមហារីកពោះវៀនអស់រយៈពេលច្រើនខែមកហើយ និងត្រូវបានគ្រូពេទ្យជួយព្យាបាលយ៉ាងណាក៏មិនបានជាសះស្បើយដែរ រហូតដល់ថ្នាក់វះកាត់សុងទុយោ បង្ហូរកាកសំណល់បន្ទោរបង់ចេញតាមពោះ ថែមទៀតផង។
ប្រភពដដែលបន្តទៀតថា បន្ទាប់ពីសម្រាកព្យាបាលនៅមន្ទីរពេទ្យជាច្រើនខែគាត់បានឲ្យក្រុមគ្រួសារនាំត្រឡប់មកផ្ទះវិញនិងបន្តព្យាបាលនៅផ្ទះវិញ។ដោយឡែកនៅមុនពេលកើតហេតុ គាត់បានសម្រាកនៅលើផ្ទះជាន់ទី១ ចំណែកក្រុមគ្រួសាររវល់ធ្វើការនៅជាន់ក្រោម លុះដល់វេលាម៉ោងខាងលើ កូនប្រុសម្នាក់ឡើងទៅជាន់លើ ស្រាប់តែប្រទះឃើញគាត់ចងកសម្លាប់ខ្លួននៅក្នុងបន្ទប់ទឹកបាត់ទៅហើយ។ខណៈនោះបាននាំគ្នាកាត់ខ្សែទម្លាក់ចុះ ដើម្បីនាំយកទៅសង្គ្រោះ ប៉ុន្តែគាត់ស្លាប់បាត់ទៅហើយទើប រាយការណ៍ប្រាប់អាជ្ញាធរ និងនគរបាលឲ្យចុះទៅពិនិត្យនិងកោសល្យវិច័យ៕
ចែករំលែកព័តមាននេះ