ខេត្តបាត់ដំបង ៖ សមត្ថកិច្ចនៅមិនទាន់កំណត់បាននូវមុខសញ្ញាក្រុមជនដៃដល់ ដែលជិះម៉ូតូដេញកាប់គ្នាកណ្ដាលយប់ក្នុងក្រុងបាត់ដំបង ដែលបណ្ដាលឲ្យរបួសធ្ងន់៣នាក់នៅឡើយទេ តែសមត្ថកិច្ចបាននិងកំពុងតាមចាប់ខ្លួនក្រុមនេះ តាមរយៈការចង្អុរបង្ហាញពីសាក្សីនានា និងជនរងគ្រោះ។
លោកឈឿង គឹមសុង នាយរងការិយាល័យព្រហ្មទណ្ឌកំរិតស្រាលបានឲ្យដឹងថា ពេលនេះ យើងមិនទាន់កំណត់មុខសញ្ញាក្រុមជនដៃដល់បានជាក់លាក់នៅឡើយទេ តែកន្លងជំនាញកំពុងតាមស៊ើបអង្កេតក្រុមនេះ ដែលសាក្សី និងជនរងគ្រោះបានចង្អុលបង្ហាញ ។ លោកបានបញ្ជាក់ថា ក្រុមជនដៃដល់មានគ្នាយ៉ាងតិច៤នាក់ ប្រដាប់ដោយកាំបិតនិងដំបងបានជិះម៉ូតូដេញកាប់ភាគីម្ខាងទៀត ដែលកំពុងជិះម៉ូតូដែរបណ្ដាលឲ្យរងរបួសធ្ងន់ធ្ងរចំនួន៣នាក់។
នៅក្នុងរបាយការណ៍សមត្ថកិច្ចបានឲ្យដឹងថា ហេតុការណ៍ក្រុមក្មេងអន្ធពាលដេញកាប់គ្នានេះ បានកើតឡើង កាលពីវេលាម៉ោង១០ និង៤៥នាទីយប់ថ្ងៃទី២១តុលា នៅចំណុចមុខធនាគារជាតិ ស្ថិតក្នុងភូមិ២០ឧសភា សង្កាត់ស្វាយប៉ោ ក្រុងបាត់ដំបង ។ ភាគីរងគ្រោះដោយសារគេកាប់ទាំង៣នាក់នោះមាន ១-ឈ្មោះ យ៉ា អាយុ១៧ឆ្នាំ នៅភូមិរហាលសួង ឃុំព្រែកហ្លួង ស្រុកឯកភ្នំ រងរបួសក្បាល ២-ឈ្មោះ សាន់ អាយុ១៧ឆ្នាំ នៅភូមិសំរោងតាកុក ឃុំសំរោងក្នុង ស្រុកឯកភ្នំ រងរបួសក្បាលដេរ៧ថ្នេ និង៣-ឈ្មោះយីន ភេទប្រុស អាយុ២០ឆ្នាំ នៅភូមិរហាលសួង ឃុំព្រែកខ្ពប ស្រុកឯកភ្នំ រងរបួសក្បាលដេរ៥ថ្នេ និងរបួសស្មាឆ្វេង។
បើតាមចម្លើយក្រុមជនរងគ្រោះបាននិយាយថា ខ្លូនមិនធ្លាប់ស្គាល់ក្រុមដែលដេញកាប់ពួកខ្លួននោះទេ ហើយក៏គ្មានរឿងអ្វីជាមួយក្រុមនោះដែរ តាំងពីដើមមកនិងមុនពេលកើតហេតុ ស្រាប់តែសុខៗក្រុមនោះជិះម៉ូតូមកតាមកាប់ពួកខ្លួនតែម្ដង។
លោកឈឿង គឹមសុង នាយរងការិយាល័យព្រហ្មទណ្ឌកំរិតស្រាល បានប្រាប់ថា បើតាមការបំភ្លឺខ្លះពីសាក្សី ក្រុមនេះអាចជាក្រុមក្មេងទំនើងដូចគ្នាហើយក៏អាចមានការប៉ះទង្គិចគ្នាមុនពេលកើតហេតុដែរ ដូច្នេះហើយទើបឈានដល់ការជិះម៉ូតូតាមកាប់គ្នាបែបនេះ។ ទោះយ៉ាងណាបច្ចុប្បន្ននេះ ក្រុមអន្តរាគមន៍បង្ការ បង្ក្រាប កំពុងតែធ្វើការស្រាវជ្រាវ ដើម្បីតាមចាប់ខ្លួនជនសង្ស័យ ។
ចែករំលែកព័តមាននេះ