រាជធានីភ្នំពេញ ៖ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានវាយតម្លៃពីការរីកចម្រើនលើវិស័យសិទ្ធមនុស្សនៅកម្ពុជា ហើយគ្រោងនឹងបញ្ចូលក្នុងរបាយការសិទ្ធិមនុស្សស្តីពីកម្ពុជា និងបន្តសហការ និងគាំទ្រដល់កម្ពុជា ។
នេះបើតាមលោកស្រី មីសែល បាសែឡែត (Michelle Bachelet ) ឧត្តមស្នងការអង្គការសហប្រជាជាតិទទួលបន្ទុកសិទ្ធមនុស្ស ។ ក្នុងជំនួបពិភាក្សាការងារជាមួយសម្តេចអគ្គមហាសេនាបតីតេ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី២២ តុលា លោកស្រី មីសែល បាសែឡែត (Michelle Bachelet ) ឧត្តមស្នងការអង្គការសហប្រជាជាតិទទួលបន្ទុកសិទ្ធមនុស្សបានមានប្រសាសន៍ថា ការិយាល័យរបស់ឧត្តមស្នងការសិទ្ធិមនុស្សរបស់អង្គការសហប្រជាជាតិប្រចាំកម្ពុជា គឺជាការិយាល័យដែលមានវ័យចំណាស់ជាងគេ ។
លោកស្រី ក៏សូមអរគុណជូនចំពោះរាជរដ្ឋាភិបាលកម្ពុជា ពិសេសសម្តេចតេជោនាយករដ្ឋមន្ត្រី ដែលបានបន្តអាណត្តិរបស់ការិយាល័យរបស់ខ្លួន រយៈពេល២ឆ្នាំ ក្នុងប្រទេសកម្ពុជា ។ យោងតាមបណ្តាញសង្គមហ្វេសប៊ុកសម្តេចតេជោចេញផ្សាយ នៅថ្ងៃទី២៣ តុលានេះ បានឲ្យដឹងក្នុងកិច្ចសន្ទនាគ្នានោះដែរ លោកស្រីបានធ្វើការកត់សម្គាល់ពីការរីកចម្រើនរបស់ប្រទេសកម្ពុជាលើវិស័យសិទ្ធមនុស្ស ពិសេសសិទ្ធរបស់ស្ត្រីកុមារកម្មករកម្មការិនី អប់រំ និងការមិនរើសអើង ។
លោកស្រីក៏បានទទួលស្គាល់ដែរថា បើទោះបីជាប្រទេសទាំងអស់មានការរីកចម្រើនយ៉ាងណាក៏នៅមានបញ្ហាប្រឈមទៅនឹងចំណុចផ្សេងៗផងដែរ តាមរយៈចំណុចល្អរបស់កម្ពុជា លោកស្រីបានឲ្យដឹងថា លោកស្រីនឹងបញ្ចូលទៅក្នុងរបាយការណ៍របស់ឧត្តមស្នងការសិទ្ធិមនុស្សស្តីពីកម្ពុជា ។ លោកក៏បានសង្កត់ធ្ងន់ថា អ្វីដែលឧត្តមស្នងការសិទ្ធមនុស្សរបស់លោកស្រីអាចជួយបានលោកស្រីនឹងបន្តសហការ និងផ្តល់នូវការគាំទ្រដល់ប្រទេសកម្ពុជា ។
ក្នុងជំនួបនោះដែរសម្តេចតេជោមានប្រសាសន៍ថា នៅថ្ងៃ២២ តុលាសម្តេចបានធ្វើទស្សនកិច្ច នៅទីស្នាក់កណ្តាលពីររបស់អង្គការសហប្រជាជាតិ ក្នុងនោះទី១-នៅទីស្នាក់ការកណ្តាលរបស់ឧត្តមស្នងការអង្គ ការពាណិជ្ជកម្មពិភពលោក និងទី២-នៅទីស្នាក់ការកណ្តាលរបស់ឧត្តមស្នងការសិទ្ធិមនុស្សរបស់អង្គការសហប្រជាជាតិ ។ បើទោះបីជាការិយាល័យសិទ្ធិមនុស្សរបស់អង្គការសហប្រជាជាតិប្រចាំកម្ពុជាពិតជាមានលក្ខណៈពិសេសនោះសម្តេចតេជោ សូមអញ្ជើញលោកជំទាវអញ្ជើញមកបំពេញទស្សនកិច្ចផ្លូវការនៅកម្ពុជា តាមពេលវេលាសមស្រប ។
សម្តេចបន្តថា បើទោះបីយើងមានគោលជំហរខុសគ្នា ប៉ុន្តែកិច្ចសហប្រតិបត្តិការរវាងកម្ពុជាជាមួយអង្គការសហប្រជាជាតិទៅលើបញ្ហាសិទ្ធិមនុស្សនៅតែបន្តទៅមុខទៀត ពិសេសការបន្តនូវអាណត្តិ២ឆ្នាំទៅមុខទៀតរបស់ការិយាល័យសិទ្ធមនុស្សប្រចាំកម្ពុជា ។ ក្នុងជំនួបទ្វេភាគីនោះដែរ សម្តេចបានស្នើឲ្យមានកិច្ចសហការលើបញ្ហាសិទ្ធមនុស្សរវាងអង្គការសហប្រជាជាតិ ជាមួយនឹងកម្ពុជា ដើម្បីធ្វើយ៉ាងណាឲ្យមានការយល់គ្នាឲ្យបានច្បាស់ មុននឹងវាយតម្លៃដែលមិនបានធ្វើការសហការគ្នា និងមិនបាននិយាយជាមួយគ្នាជាមុននោះ ៕
ចែករំលែកព័តមាននេះ