ទីក្រុងញូដេលី ៖ យោងតាមការស្ទង់មតិក្រុមសេដ្ឋវិទូ បានឲ្យដឹងថា ទស្សនវិស័យការលូតលាស់ជុំវិញពិភពលោកសម្រាប់ឆ្នាំ ២០១៩ បានធ្លាក់ចុះជាលើកដំបូង ព្រោះតែសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិន រួមទាំងការរឹតបន្តឹងស្ថានការណ៍ហិរញ្ញវត្ថុ ។
នៅដើមឆ្នាំ២០១៨ សេដ្ឋវិទូដែលចូលរួមការស្ទង់មតិគិតថា ការលូតលាស់សេដ្ឋកិច្ចជុំវិញពិភពលោកនៅឆ្នាំក្រោយនឹងមានភាពរឹងមាំ ប៉ុន្តែការស្ទង់មតិសេដ្ឋវិទូចំនួន៥០០នាក់ដែលកើតមានឡើងកាលពីខែនេះ បែរជាខុសគ្នាទៅវិញ ។
ប្រធានសេដ្ឋវិទូ Janet Henry ប្រចាំ HSBC បានកត់សម្គាល់ថា ៖« កត្តាដែលកំពុងតែមានឥទ្ធិពលលើសេដ្ឋកិច្ចជុំវិញពិភពលោកនាពេលបច្ចុប្បន្ន គឺសេដ្ឋកិច្ចអាមេរិកបន្តលូតលាស់យ៉ាងលឿន ខណៈដែលប្រទេសដទៃជុំវិញពិភពលោកជួបប្រទះការអន់ថយ ឬការធ្លាក់ចុះ ។ សម្ពាធដែលបង្កឡើងដោយភាពខុសគ្នានេះកំពុងតែប៉ះពាល់ដល់ទីផ្សារថ្មីៗជាច្រើន »។
អ្នកស្រីបានបន្តថា ៖« ធនគារជាតិអាមេរិកដែលកំពុងតែបង្កើនអត្រាការប្រាក់ដើម្បីកាត់បន្ថយហានិភ័យក្នុងសេដ្ឋកិច្ចអាមេរិក គឺកំពុងតែប៉ះពាល់ដល់ជម្រើសគោលនយោបាយរបស់ប្រទេសដែលស្ថានការណ៍ហិរញ្ញវត្ថុកំពុងតែតូចចង្អៀត និងមានភាពតានតឹងផ្នែកពាណិជ្ជកម្មកាន់តែធ្ងន់ធ្ងរ។
សេដ្ឋវិទូភាគច្រើនក្នុងចំណោម១៥០នាក់គិតថា កត្តាដែលបង្កឲ្យសេដ្ឋកិច្ចពិភពលោកធ្លាក់ចុះរួមមានការធ្ងន់ធ្ងរឡើងនៃជម្លោះពាណិជ្ជកម្មរវាងសហរដ្ឋអាមេរិកនិងប្រទេសចិន និងការរឹតបន្តឹងស្ថានការហិរញ្ញវត្ថុ ។
លោក Nei Shearing ប្រធានសេដ្ឋវិទូនៅ Capital Economics បានឲ្យដឹងដែរថា មិនមានអ្នកឈ្នះក្នុងសង្គ្រាមពាណិជ្ជកម្មពិភពលោកទេ ទោះជាការខាតបង់នៅមានកម្រិត និងអាចជំរុញឲ្យសេដ្ឋកិច្ចបើកទូលាយជាងមុនពិតមែនក្តី តែប្រទេសទាំងអស់នឹងស្ថិតក្នុងស្ថានការណ៍អាក្រក់ជាងមុន ។
ការព្យាករលើការលូតលាស់ជុំវិញពិភពលោកនៅឆ្នាំនេះ មិនមានការផ្លាស់ប្តូរទេ គឺស្មើ ៣,៨% ប៉ុន្ដែសម្រាប់ឆ្នាំ២០១៩វិញ បានធ្លាក់ចុះមកស្មើតែ៣,៦%ប៉ុណ្ណោះ ៕
ចែករំលែកព័តមាននេះ