ប្រទេសអាហ្វហ្គានីស្ថាន ៖ ពលរដ្ឋអាហ្វហ្គានីស្ថានជាច្រើនពាន់នាក់ នាថ្ងៃទី២១ តុលាបន្តមកបោះឆ្នោតសភា នាថ្ងៃទី២ទៀត ទោះមានការភ័យខ្លាច ក្រោយការអាក់ខានពុំបានបោះឆ្នោតក្នុងការិល័យជាច្រើនកាលពីថ្ងៃទី២០ តុលា មកពីអំពើហិង្សា និងកិច្ចមិនដំណើរការ។
បណ្ដាអ្នកបោះឆ្នោតទោះមានការភ័យខ្លាចដល់អាយុជីវិត ប្រឈមមុខនឹងពួកតាលីបង់និងក្រុមរដ្ឋអ៊ិស្លាម នៅតែបង្ខំចិត្តមកកាន់ការិយាល័យបោះឆ្នោតប្រមាណជា២៥៣កន្លែងដែលបើករហូតដល់ម៉ោង១៦ម៉ោងក្នុងស្រុក។ ការិយាល័យបោះឆ្នោតប្រមាណជា១៥០កន្លែងទៀត ពុំអាចបើកបាន ព្រោះហេតុផលសន្តិសុខ ។
យោងតាមគណៈកម្មាធិការបោះឆ្នោតឯករាជ្យដែលរៀបចំការបោះឆ្នោតថា អ្នកដែលអាចទៅបោះឆ្នោតបានកាលពីចុងសប្ដាហ៍ប្រមាណ៤លាននាក់ ក្នុងចំណោមអ្នកចុះឈ្មោះជិត៩លាននាក់ ។
ពុំមានឧប្បត្តិហេតុហិង្សាទាក់ទិននឹងការបោះឆ្នោតណាមួយ កើតមាននាថ្ងៃទី២១ តុលា ជាថ្ងៃទី២ នៃការបោះឆ្នោតឡើយ។ សម្រាប់ថ្ងៃទី២០ តុលា ថ្ងៃដំបូងនៃការបោះឆ្នោត អាជ្ញាធររៀបរាប់ពីមនុស្សស្លាប់១៧នាក់ និងរបួស៥៤នាក់ ដោយសារការវាយប្រហារដាច់ដោយឡែកពីគ្នា១៩៣លើក។ ប៉ុន្តែតួលេខនេះតាមពិតមានខ្ពស់ អ្នកស្លាប់អាចមានដល់៦៥នាក់ ភាគច្រើនជាជនស៊ីវិល ហើយមនុស្ស២២៥នាក់រងរបួស ៕
ចែករំលែកព័តមាននេះ