ខេត្តកំពង់ស្ពឺ ៖ ស្ត្រីមេឆ្នោតដែលជាមេតូចតាចម្នាក់ ត្រូវកម្លាំងនគរបាលក្រុងច្បារមន ធ្វើការបង្ក្រាបជាក់ស្ដែងនិងដកហូតបានភស្ដុតាងមួយចំនួនផងដែរ ។ ការឃាត់មេឆ្នោតនេះ ក៏បានធ្វើឱ្យមហាជននាំគ្នារិះគន់ទៅលើសមត្ថកិច្ចយ៉ាងចាស់ដៃ ដោយអ្នកខ្លះលើកឡើងថា ចាប់បានតែគ្នាតូចតាច…
ខេត្តកំពង់ស្ពឺ ៖ ស្ត្រីមេឆ្នោតដែលជាមេតូចតាចម្នាក់ ត្រូវកម្លាំងនគរបាលក្រុងច្បារមន ធ្វើការបង្ក្រាបជាក់ស្ដែងនិងដកហូតបានភស្ដុតាងមួយចំនួនផងដែរ ។ ការឃាត់មេឆ្នោតនេះ ក៏បានធ្វើឱ្យមហាជននាំគ្នារិះគន់ទៅលើសមត្ថកិច្ចយ៉ាងចាស់ដៃ ដោយអ្នកខ្លះលើកឡើងថា ចាប់បានតែគ្នាតូចតាច ឯមេធំប្រចាំក្រុងច្បារមន ជាសមត្ថកិច្ចដែរនោះ មិនដែលឃើញបង្ក្រាបម្តងណាឡើយ ។
បើទោះជាមានការរិះគន់បេបនេះក្តី សមត្ថកិច្ចបានបញ្ជាក់ថា នេះគឺជាការអនុវត្ដន៍គោលនយោបាយ ចលនាភូមិ-ឃុំមានសុវត្ថិភាព លក្ខណៈសម្បត្តិ៩យ៉ាងរបស់រាជរដ្ឋាភិបាល ដែលបានដាក់ចុះមក ។ ការចាប់មេឆ្នោតនេះ ធ្វើឡើងកាលពីវេលាម៉ោង០២ និង៤០នាទី ថ្ងៃទី២២ តុលា ស្ថិតនៅចំណុចជាប់ផ្ទះល្វែងមួយកន្លែង ក្នុងភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ។
មេឆ្នោតកំបុិកកំប៉ុករូបឈ្មោះញ៉ីល ស្រីម ភេទស្រី អាយុ៤១ឆ្នាំ មានទីលំនៅភូមិដក់ពរ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។ ប្រភពមន្ត្រីនគរបាលបានប្រាប់ដែរថា ការឃាត់ស្ត្រីមេឆ្នោតនេះ ដឹកនាំដោយលោកវរសេនីយ៍ឯក អ៊ួច ហៀង អធិការនគរបាលក្រុងក្រុងច្បារមន សហការជាមួយជំនាញពាក់ព័ន្ធចុះបង្ក្រាបអ្នកកត់កន្ទុយលេខ( កូនកញ្ច្រែងកត់ឆ្នោតខុសច្បាប់ ) នៅចំណុចខាងលើ ។ ប្រភពបន្តថា មេឆ្នោតនេះ ត្រូវបានសមត្ថកិច្ចអះអាងថា បានធ្វើសកម្មភាពជាក់ស្ដែងកត់កន្ទុយលេខ ដែលច្បាប់ហាមឃាត់ប្រឆាំងគោលការណ៍ភូមិ-ឃុំសុវត្ថិភាពទៀតផង។
ក្នុងប្រតិបត្តិការដ៏ស្រួចស្រាវកម្លាំងដកហូតភស្តុតាងបានរួមមានក្រដាសរ៉ាមកត់ឆ្នោតសរសេរដោយដៃ ចំនួន២សន្លឹក មានលេខឆ្នោត ( ២ខ្ទង់ និង៣ខ្ទង់ ) លុយខ្មែរចំនួន២៤៣០០រៀល និងសម្ភារបំរើឲ្យការកត់ឆ្នោតមួយចំនួន។ បច្ចុប្បន្ន មុខសញ្ញាកត់លេខឆ្នោតខុសច្បាប់ ជំនាញក្រុងច្បារមនបានបញ្ជូនទៅការិយាល័យជំនាញខេត្ត ចាត់ការតាមនីតិវិធី ។
បើទោះជាបែបនេះក្តី ការបង្ក្រាបមេឆ្នោតនេះ ក៏រងនូវការរិះគន់យ៉ាងខ្លាំងពីសំណាក់មហាជនដោយម្នាក់ៗលើកឡើងថា សមត្ថកិច្ចហាក់បីដួចជាលម្អៀងពេកហើយចាប់បានតែគ្នាអ្នកតូចតាចអត់ខ្សែអត់ខ្នងចំណែកមេឆ្នោតធំៗប្រចាំក្រុងច្បារមន ដែលសុទ្ធតែមន្ត្រីប៉េអឹមវិញ មិនដែលឃើញអស់លោកបង្ក្រាបនោះទេ។
នៅក្រុងច្បារមនទាំងមូល អ្នកណាក៏ដឹងដែរថា «ធីប៉េអឹមជាមេធំប្រចាំក្រុងច្បារមនដែរ ហេតុអ្វីមិនបង្ក្រាបផង ឬមួយខ្លាចអំណាចគាត់ជាប៉េអឹម? » ការដែលសមត្ថកិច្ចបង្ក្រាបនេះ មហាជនដាក់ការសង្ស័យថាទំនងជាស្ត្រីមេឆ្នោតម្នាក់នេះ មិនមែនកត់អោយធីប៉េអឹមទេដឹង ទើបមិនមានវាសនាល្អដូចអ្នកផ្សេង?
ចែករំលែកព័តមាននេះ