រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងបកស្រាយអំពីប្រវត្តិពិតនៃដំណើររឿងនៃកិច្ចព្រមព្រៀងទីក្រុងប៉ារីស២៣ តុលា ឆ្នាំ១៩៩១ នៅយប់ ថ្ងៃទី២៣ តុលា ឆ្នាំ២០១៨ ឈានចូលថ្ងៃទី២៤ តុលានេះ នៅក្នុងប្រទេសស្វីស ។
សម្តេចតេជោបានសរសេរលើបណ្តាញសង្គមនៅមុននេះបន្តិចយ៉ាងដូច្នេះថា អបអរសាទរខួបទី២៧ នៃកិច្ចព្រមព្រៀងសន្តិភាពក្រុងប៉ារីស ២៣ តុលា ថ្ងៃទី២៣ តុលា ឆ្នាំ២០១៨ នេះ គឺខួប២៧ឆ្នាំ (២៣ តុលា ១៩៩១ -២៣ តុលា ២០១៨) នៃកិច្ចព្រមព្រៀងសន្តិភាពក្រុងប៉ារីស ។
នៅក្នុងថ្ងៃរំលឹកខួប២៣ តុលា ថ្ងៃនេះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងជម្រាបជូនបងប្អូនជនរួមជាតិអំពីប្រវត្តិពិតនៃដំណើររឿងជាប្រវត្តិសាស្ត្រនេះ ដែលនឹងផ្សាយផ្ទាល់ (LIVE ) លើផេកសម្តេចតេជោពីទីក្រុងហ្សឺណែវ ប្រទេសស្វីស នៅថ្ងៃទី ២៣ តុលា (រវាងពីម៉ោង ៦និង០០ល្ងាចដល់១០និង00យប់) នៅស្វីស ត្រូវនឹងម៉ោង (១១និង០០យប់ ដល់៣និង០០យប់ ចូលដល់ថ្ងៃទី២៤ តុលា ម៉ោងនៅកម្ពុជា) ។
សម្តេចតេជោប្រមុខរដ្ឋាភិបាលខ្មែរបានលើកឡើងក្នុងពិធីសំណេះសំណាលជាមួយប្រជាពលរដ្ឋខ្មែរ ដែលកំពុងសិក្សា និងរស់នៅប្រទេសក្នុងតំបន់អឺរ៉ុបនាទីក្រុងប្រ៊ុចសែលប្រទេស ប៊ែលហ្សិក កាលពីថ្ងៃទី១៩ ខែតុលា ខណៈសម្តេចចូលរួមកិច្ចប្រជុំអាស៊ី- អឺរ៉ុប បានអះអាងថា សម្តេច គឺជាអ្នកដឹកនាំតាក់តែងកិច្ចព្រមព្រៀង ក្រុងប៉ារីស និងជាអ្នកចុះហត្ថលេខាលើកិច្ចព្រមព្រៀងនេះផ្ទាល់ដៃ ។ ជាកិច្ចព្រមព្រៀងដែលភាគីខ្មែរនៅគ្រានោះយល់ព្រម បញ្ចប់ជម្លោះនឹងខ្មែរគ្នាឯង ។ ជាមួយគ្នានោះសម្តេចតេជោហ៊ុន សែន បានចំអកឲ្យអ្នកដែលធ្លាប់បកស្រាយខ្លឹមសារនៃកិច្ចព្រមព្រៀងនេះកន្លងមកថា មិនដឹងកិច្ចព្រមព្រៀងនេះបែរមុខទៅណានោះទេ ។ លើសពីនេះទៀតសម្តេច ហ៊ុន សែន អះអាងថា កិច្ចព្រមព្រៀងក្រុងប៉ារីស គឺជាមរតករបស់សម្តេចក្នុងចំណោមមរតកជាច្រើនទៀត រួមមានការផ្តួលរំលំរបបខ្មែរក្រហម ឆ្នាំ ១៩៧៩ និងការចរចាបញ្ចប់សង្គ្រាមស៊ីវិលបានទាំងស្រុងជាមួយខ្មែរក្រហមក្នុងឆ្នាំ១៩៩៨ ។
តាមការកត់សម្គាល់បញ្ហាកិច្ចព្រមព្រៀងក្រុងប៉ារីសនេះ ត្រូវបានអ្នកនយោបាយខ្មែរបានយកមកបកស្រាយជាថ្មីផ្សេងទៀត ពិសេសនោះនៅពេលដែលមានការរំលាយគណបក្សសង្គ្រោះ ជាតិ ។ លើសពីនេះសម្រាប់អតីតគណបក្សប្រឆាំង និងអ្នកវិភាគមួយចំនួនហៅការរំលាយ គណបក្សសង្គ្រោះជាតិ គឺជាការរំលោភរដ្ឋធម្មនុញ្ញ និងរំលោភកិច្ចព្រមព្រៀងទីក្រុងប៉ារីសផងពីសំណាក់បក្សកាន់អំណាច ។
ប៉ុន្តែកិច្ចព្រមព្រៀងក្រុងប៉ារីស ដែលមានខ្លឹមសារធានាពីដំណើរការលទ្ធិប្រជាធិបតេយ្យសេរី ពហុបក្សនៅកម្ពុជា ។ ដោយសំអាងលើខ្លឹមសារនេះ អ្នកនយោបាយនៃអតីតគណបក្សសង្គ្រោះជាតិបានស្នើឲ្យប្រទេសជាម្ចាស់ហត្ថលេខីនៃកិច្ចព្រមព្រៀងក្រុងប៉ារីសកោះប្រជុំឡើងវិញ ដើម្បីដោះស្រាយ បញ្ហានយោបាយនៅកម្ពុជាបច្ចុប្បន្ន ។ ទោះបីជាមានចង់បែបណាក្តីខាងរដ្ឋាភិបាលកម្ពុជាអះអាងថា មិនអាចធ្វើទៅរួចនោះឡើយ ដោយសារខ្លឹមសារនៃកិច្ចព្រមព្រៀងទីក្រុងប៉ារីស ត្រូវបញ្ចូលអស់ហើយ ទៅក្នុងខ្លឹមសារនៃរដ្ឋធម្មនុញ្ញកម្ពុជារួចហើយ ។
ទាក់ទិននឹងកិច្ចព្រមព្រៀងទីក្រុងប៉ារីសនេះដែរ លោកសម រង្ស៊ី អតីតប្រធានគណបក្សសង្គ្រោះជាតិបានលើកឡើងថា ថ្ងៃ២៣ តុលានេះជាខួបលើកទី២៧ នៃការចុះហត្ថលេខា លើកិច្ចព្រមព្រៀងទីក្រុងប៉ារីសស្តីពីកម្ពុជា កាលពីថ្ងៃទី២៣ តុលា ១៩៩១ ។ លោកបញ្ជាក់ថា «ពិភពលោកទាំងមូលឃើញយ៉ាងច្បាស់ថា កិច្ចព្រមព្រៀងទីក្រុងប៉ារីសនេះ គឺជាស្នាព្រះហស្ថរបស់សម្តេចព្រះនរោត្តមសីហនុដែលជាព្រះបិតាបង្រួបបង្រួមជាតិ និងឯកភាពជាតិ» ៕
ចែករំលែកព័តមាននេះ