រដ្ឋមន្ត្រីការបរទេសជប៉ុន លោក SEIJI MAEHARA ប្រកាសពីការសុំលាលែងពីតំណែងរបស់លោកកាលពីថ្ងៃទី៦ មីនា បន្ទាប់ពី លោកទទួលស្គាល់ថា បានទទួលអំណោយជាប្រាក់ពីនារីជនជាតិបរទេសម្នាក់រស់នៅក្នុងប្រទេសជប៉ុនដែលផ្ទុយនឹងច្បាប់របស់ជប៉ុន។ លោក SEIJI MAEHARA អាយុ៤៨ឆ្នាំ ទើបកាន់តំណែងនេះបាន៦ខែប៉ុណ្ណោះ។ ជាមនុស្សលេចធ្លោម្នាក់ក្នុងផ្ទៃនៃគណបក្សប្រជាធិបតេយ្យជប៉ុន PDJ ដែលកំពុងកាន់អំណាចលោក SEIJI ត្រូវបានចាត់ទុកថា ជាអ្នកអាចបន្តតំណែងពីនាយករដ្ឋមន្ត្រីលោកណាអូតូកាន។ បន្ទាប់ពីបដិសេធរឿងនោះក្នុងគ្រាដំបូង លោក SEIJI MAEHARA ទទួលស្គាល់ថា លោកបានទទួលអំណោយជាប្រាក់ចំនួន៥០.០០០យេន(៤៣៤អឺរ៉ូ) ពីនារីម្នាក់ក្នុងចំណោមនារីដែលលោកស្គាល់ដែលនារីនោះជាជនជាតិកូរ៉េខាងត្បូងរស់នៅប្រទេសជប៉ុនចាប់តាំងពី ច្រើនឆ្នាំមកហើយ។ ច្បាប់ស្តីពីហិរញ្ញវត្ថុរបស់បណ្តាគណបក្សនយោបាយហាមឃាត់ដល់បណ្តាអ្នកទទួលខុសត្រូវខាងនយោបាយជប៉ុនមិនឱ្យទទួលយកអំណោយពីពលរដ្ឋ ឬមនុស្សទាំងឡាយមានដើមកំណើតបរទេស។
ក្នុងឱកាសនៃសន្និសីទសារព័ត៌មានមួយកាលពីយប់ថ្ងៃទី៦ មីនា នៅទីក្រុងតូក្យូ រដ្ឋមន្ត្រីដែលសុំលាលែងរូបនេះថ្លែងថា «ខ្ញុំសូមអភ័យទោសដើម្បីដាក់ការសុំលាលែងរបស់ខ្ញុំក្រោយកាន់តំណែងនេះបានត្រឹមតែ៦ខែ ហើយដែលបានធ្វើឱ្យបាត់ទំនុកចិត្តលើបញ្ហាហិរញ្ញវត្ថុនយោបាយទោះបីជាខ្ញុំធ្លាប់បានលើកពីនយោបាយស្អាតស្អំមួយក្តី។ ខ្ញុំមានការសោកស្តាយយ៉ាងជ្រាលជ្រៅដែលបានបង្កបញ្ហាបែបនេះមកពីការខុសឆ្គងផ្ទាល់របស់ខ្ញុំ» ៕
ចែករំលែកព័តមាននេះ