ADផ្ទាំងផ្សព្វផ្សាយពាណិជ្ជកម្ម

សូមសម្តេចតេជោ មេត្តាជួយទិញដីមួយកន្លែងសម្រាប់សាងសង់វត្តរកាធំផង

5 ឆ្នាំ មុន

ត្បូងឃ្មុំ
២២ ខែ តុលា ឆ្នាំ ២០១៨ ម៉ោង ១៨:៣៤

ខេត្តត្បូងឃ្មុំ ៖ គ្រោះធម្មជាតិពីមួយឆ្នាំទៅមួយឆ្នាំច្រាំងទន្លេមេគង្គ បានបាក់ស្រុតបន្តបបន្ទាប់ សូម្បីតែកុដិឈើរបស់ចៅអធិការវត្តរកាធំ ស្ថិតនៅភូមិរកាធំ ឃុំជីរោទិ៍ទី១ ស្រុកត្បូងឃ្មុំ ដោយសល់ចម្ងាយតែជាង១០ម៉ែត្រប៉ុណ្ណោះ ច្រាំងនឹងបាក់ដល់ហើយ។ ជាមួយនោះ ក្តីកង្វល់របស់គណៈកម្មការវត្ត ក៏ដូចជាចៅអធិការវត្តមិនដឹងជាទៅរកដីមកពីណា សាងសង់ទីអារាមថ្មីនោះទេ ដោយពួកគាត់បានលើកដៃម្រាមដប់សំពះសូមឲ្យសម្តេចតេជោសែន ជួយទិញដីមួយកន្លែងថ្មីសម្រាប់បង្កើតវត្តថ្មី ឆ្ងាយពីច្រាំងទន្លេ។

លោក សួន មួក អាយុ៤៩ឆ្នាំ ជាពុទ្ធបរិស័ទចំណុះជើងវត្តរកាធំ ប្រាប់ឲ្យដឹងនៅព្រឹកថ្ងៃទី២២ តុលា ២០១៨ ថា ទីអារាមនេះត្រូវបានបង្កើតឡើង ចាប់តាំងពីសម័យសង្គមរាស្ត្រនិយមមកម្លេះ ដែលកាលណោះដីវត្តមានធីធ្លាធំទូលាយថែមទៀតផង។ ដោយឆ្លងកាត់នូវរបបប្រល័យ ពូជសាសន៍៣ឆ្នាំ៨ខែ និង២០ថ្ងៃ វត្តរកាធំត្រូវបានគេវាយបំផិ្លចបំផ្លាញចោល នៅសល់តែគ្រឹះខាងក្រោមប៉ុណ្ណោះ។ លោក សួន មួក ប្រាប់បន្តថា ប៉ុន្តែនៅក្រោយថ្ងៃទី០៧ មករា ឆ្នាំ១៩៧៩ ពុទ្ធបរិស័ទនៅគ្រប់ទិសទីបានមតិគ្នាដោយបានសម្រេចកសាងនូវទីអារាមថ្មី សម្រាប់គោរពប្រណិប័តន៍តាមឱវាទព្រះពុទ្ធ។

ក្រោយមកច្រាំងទន្លេបានបាក់បន្តិចបន្តួច និងបានដុះវិញ ។ តែមកដល់ឆ្នាំ២០១៨ ច្រាំងបានបាក់ខ្លាំងនៅសល់តែជាង១០ម៉ែត្រប៉ុណ្ណោះនឹងបាក់ដល់កុដិឈើ ចៅអធិការវត្ត គាត់ព្រួយថា ថ្ងៃខាងមុខវត្តនឹងអស់ដី។ អ្នកស្រី ពេជ្រ ស្រ៊ន់ អាយុ៦៨ឆ្នាំ គណៈកម្មការវត្តរកាធំ មានប្រសាសន៍ឲ្យដឹងថា គណៈកម្មការវត្តចៅអធិការវត្តរួមនឹងពុទ្ធបរិស័ទ ចំណុះជើងវត្ត កំពុតែមានក្តីព្រួយបារម្ភខ្លាំងដោយសារតែច្រាំងបានបាក់កាន់តែ មកកៀកកុដិចៅអធិការវត្តហើយ។

មិនដឹងជាបានដីមកពីណាសាងសង់វត្តនោះទេ ព្រោះថានៅថ្ងៃមុនបានទៅសួរដីភូមិរកាធំ មានចម្ងាយប្រមាណ១.០០០ម៉ែត្រពីវត្ត ម្ចាស់ដីនោះលក់ក្នុងតំលៃ១០ម៉ឺនដុល្លារដីទំហំ២ហិកតា មិនដឹងជាបានបច្ច័យមកពីណានោះទេ ដូច្នេះមានតែម្រាមដៃដប់សំពះសុំក្តីសណ្តោសពីសម្តេចតេជោសែន មេត្តាជួយដល់វត្តរកាំធំដែលកំពុងតែរងគ្រោះនេះផង។ ពួកគាត់សង្ឃឹមថា សម្តេចនឹងមានមេត្តាធម៌ ជួយដល់វត្តនេះមិនខានឡើយ៕