ប្រទេសអារ៉ាប៊ីសាអ៊ូឌីត ៖ ក្រោយការសារភាពរបស់អារ៉ាប៊ីសាអ៊ូឌីត អំពីការលូកដៃរបស់ខ្លួនក្នុងការសម្លាប់អ្នកកាសែតប្រឆាំងលោកJAMAL KHASHOGGI ការសង្ស័យខ្លាំងនានានៅតែមាន លើការបិទបាំងការធ្វើឃាតនេះ។ លោកDAVID RIGOULET ROZEអ្នកជំនាញការម្នាក់ពីទំនាក់ទំនងអន្តរជាតិ កាលពីថ្ងៃទី២១តុលាបានធ្វើការវិភាគពីបណ្ដាផលវិបាកនៃការធ្វើឃាតនោះដោយនិយាយថា រឿងនេះក្លាយជាវិបត្តិអន្តរជាតិធំមួយ។
អាជ្ញាធរអារ៉ាប៊ីសាអ៊ូឌីតទីបំផុតបានសារភាពកាលពីថ្ងៃទី២០តុលាថា ខ្លួនបានលូកដៃចូលក្នុងការសម្លាប់អ្នកកាសែតរូបនេះ ក្នុងស្ថានកុងស៊ុលអារ៉ាប៊ីសាអ៊ូឌីតប្រចាំក្រុងអ៊ីស្តង់ប៊ុលតួកគី កាលពីថ្ងៃទី២តុលា។ ទោះបីយ៉ាងណាសហគមន៍អន្តរជាតិនៅតែពុំជឿ លើការបកស្រាយរបស់ក្រុងរីយ៉ាដដែលថា រូបគេត្រូវស្លាប់ពេលមានការឈ្លោះដាល់តប់គ្នានៅក្នុងស្ថានកុងស៊ុល។
អ្នកវិភាគរូបនេះបន្តថាសម្រាប់អារ៉ាប៊ីសាអ៊ូឌីតវិបត្តិនោះមិនបញ្ចប់ត្រឹមហ្នឹងឡើយ វាអាចធ្វើឲ្យមុខមាត់ប្រទេសនេះខូចធ្ងន់ធ្ងរដូចកាលពីការវាយប្រហារភេរវកម្មថ្ងៃទី១១កញ្ញាដូច្នោះដែរ។អ្នកកាសែតម្នាក់ត្រូវធ្វើឃាតក្នុងបរិវេណស្ថានកុងស៊ុលបរទេសមួយជារឿងពុំធ្លាប់មានពីមុនមកឡើយ។
ទោះជាក្រុងវ៉ាស៊ិនតោនដែលមានផលប្រយោជន៍ច្រើនជាមួយអារ៉ាប៊ីសាអ៊ូឌីត ចាត់ទុកការសារភាពរបស់ក្រុងរីយ៉ាដថា គួរឲ្យជឿក្ដី តែប្រទេសផ្សេងៗទៀតដូចជា អាល្លឺម៉ង់ បារាំងអង់គ្លេសជាដើម វាយតម្លៃថាការបកស្រាយរបស់ក្រុងរីយ៉ាដពុំគ្រប់គ្រាន់ឡើយ។
ក្នុងសេចក្ដីប្រកាសរួមមួយកាលពីថ្ងៃទី២១តុលា ប្រទេសទាំង៣ ទាមទារថា គេត្រូវឲ្យមានការបំភ្លឺជាបន្ទាន់មួយអំពីការសម្លាប់អ្នកកាសែតអាយុ៥៩ឆ្នាំរូបនេះក្នុងស្ថានកុងស៊ុលអារ៉ាប៊ីសាអ៊ូឌីត ដែលលាក់ទាំងសាកសពរបស់គេ។ អាល្លឺម៉ង់នាថ្ងៃទី២២តុលាបានប្រកាសពីការផ្អាកលក់អាវុធ ដល់អារ៉ាប៊ីសាអ៊ុឌីត រហូតដល់មានការបំភ្លឺច្បាស់លាស់។
ប្រធានាធិបតីតួកគីលោករីស៊ីបតៃយីបអ័រដូហ្គាន កាលពីថ្ងៃទី២១តុលាបានសន្យាថា នឹងលាតត្រដាងរាល់ការពិត ហើយលោកថានឹងធ្វើសេចក្ដីថ្លែងការណ៍មួយពីរឿងនេះក្នុងសភានាថ្ងៃទី២៣តុលា។ ម្យ៉ាងទៀតអាជ្ញាធរតួកគីបានសម្រេចដាក់លោកស្រី HATIGE CENGIZ ស្រីស្នេហ៍ជនជាតិតួកគីរបស់អ្នកកាសែតរូបនោះ ឲ្យស្ថិតក្រោមកិច្ចការពាររបស់ប៉ូលិសតួកគី២៤ម៉ោងលើ២៤ម៉ោង។
ព្រះមហាក្សត្រអារ៉ាប៊ីសាអ៊ូឌីតSALMANEនិងព្រះអង្គម្ចាស់រជ្ជទាយាទMOHAMMED BEN SALMANE នាថ្ងៃទី២២តុលាបានហៅកូនប្រុសរបស់អ្នកកាសែតត្រូវគេសម្លាប់រូបនោះមកជួប ដើម្បីសម្ដែងការចូលរួមមរណៈទុក្ខជាមួយគ្រួសាររបស់គេ៕
ចែករំលែកព័តមាននេះ