ខេត្តបន្ទាយមានជ័យ ៖ ស្នូរបាញ់ដោយកាំភ្លើងជាច្រើនគ្រាប់ ដោយសមត្ថកិច្ចក្នុងការធ្វើអន្តរាគមន៍ជម្លោះរវាងជនជាតិខ្មែរនិងចិនដែលប្រដាប់ដោយបំពង់ទីបនិងដែករៀងៗខ្លួនតែក្រោយការប្រឈមនោះ ក្រុមខ្មែរគេចអស់នៅសល់តែក្រុមចិន ។ ក្នុងការបង្ក្រាបជនជាតិចិនជាង១០នាក់ ត្រូវបានសមត្ថកិច្ចចម្រុះមាននគរបាលនិងអាវុធហត្ថក្រុងប៉ោយប៉ែត បង្ក្រាបនិងឃាត់ខ្លួននៅនឹងកន្លែង ប៉ុន្តែមិនទាន់ដឹងពីមូលហេតុនៃជម្លោះនេះច្បាស់លាស់ទេ ។
ករណីខាងលើដែលឈានដល់ការផ្ទុះអាវុធនិងបង្កការភ្ញាក់ផ្អើលកាលពីម៉ោងជិត១រំលងអធ្រាត្រចូលព្រឹកថ្ងៃទី២១ តុលា លើដងផ្លូវបេតុងជិតបុរីហ្គោតឡាក់ ក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។ តាមប្រភពព័ត៌មានថា ជនជាតិចិនដែលនគរបាលក្រុងប៉ោយប៉ែតឃាត់ខ្លួននេះ មានចំនួន១៣នាក់ ។
តាមប្រភពថា មុនកើតហេតុនេះជនជាតិចិនទាំងនេះមានជម្លោះជាមួយខ្មែរមួយក្រុម ប៉ុន្តែមិនដឹងមូលហេតុពិតប្រាកដទេ ដែលខ្លះថាអាចដោយសាររឿងស្រី តែក្រុមខ្មែរដែលមានជម្លោះនោះគេចខ្លួនអស់ ។
ប្រភពបន្តថា ដំបូងជនជាតិចិនមានគ្នា៤ទៅ៥នាក់ទេ លុះមានជម្លោះកើតឡើងក៏បានទូរស័ព្ទហៅគ្នាមកកាន់តែច្រើន ប្រដាប់ដោយបំពង់ទីបនិងដែកស្ទើរគ្រប់ដៃ សូម្បីសមត្ថកិច្ចដែលចូលបង្ក្រាប ក៏ពួកគេហាក់មិនស្តាប់ធ្វើឲ្យសមត្ថកិច្ចពិបាក ទើបឈានដល់ការបំផ្ទុះអាវុធឡើងលើគំរាមជាច្រើនគ្រាប់ ។
កោះសន្តិភាពមិនអាចទាក់ទងសុំការបំភ្លឺលម្អិតពីលោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតបានទេ ព្រោះទូរស័ព្ទទាក់ទងជាច្រើនដងគ្មានអ្នកទទួល ។ លោក ព្រំ ពិសិដ្ឋ អធិការរងទទួលផែនព្រហ្មទណ្ឌនៃអធិការដ្ឋាននគរបាលប៉ោយប៉ែតប្រាប់តាមទូរស័ព្ទថា ករណីខាងលើពេលនេះកំពុងសាកសួរពីជនជាតិចិនដែលឃាត់ខ្លួននៅឡើយ ហើយក៏មិនទាន់ដឹងមូលហេតុពិតប្រាកដនោះដែរ ព្រោះតែភាគីពាក់ព័ន្ធម្ខាងទៀតជាខ្មែរបានគេចខ្លួនអស់ ។
លោកបន្តថា ករណីនេះមិនទាន់ឈានដល់អំពើហិង្សាបង្ករបួសស្នាមលើបុគ្គលណាមួយនៅឡើយទេ ។
ប្រភពព័ត៌មានឲ្យដឹងថា កំណើនជនជាតិចិននៅក្រុងប៉ោយប៉ែតដែលជាសំបុកកាស៊ីណូក៏មិនតិចដែរ ដែលពួកគេមករកស៊ីនិងមកលេងល្បែងក្នុងកាស៊ីណូ ហើយជួលសណ្ឋាគារនិងផ្ទះសំណាក់ បើកល្បែងថែមទៀតផង ។ ចំពោះចំនួនជនជាតិចិនដែលហូរចូលក្រុងប៉ោយប៉ែត មិនត្រូវបានទទួលការបង្ហាញស្ថិតិពីមន្ត្រីប៉ូលិសអន្តោប្រវេសន៍ជាផ្លូវការច្បាស់លាស់ទេ ដែលស្រួលមិនស្រួលគ្មានស្ថិតិពិតក៏មិនដឹងដែរ ។
តាមប្រភពមិនបញ្ចេញឈ្មោះ កាលពីឆ្នាំ២០១៧ ជនជាតិចិនមាន២ពាន់នាក់ (គិតតែក្រុងប៉ោយប៉ែត) ឆ្នាំនេះ ការធ្វើជំរឿននិងបញ្ចប់នៅខែធ្នូខាងមុខដែលអាចកើនពី៤ទៅ៥ពាន់នាក់ ៕
ចែករំលែកព័តមាននេះ