រាជធានីភ្នំពេញ ៖ ដើម្បីគេចផុតពីវិបត្តិសេដ្ឋកិច្ច ឬគេចពីបញ្ហាដែលនឹងទទួលរងក្រោយសហគមន៍អឺរ៉ុបដកការអនុគ្រោះពន្ធពាណិជ្ជកម្ម«អ្វីគ្រប់យ៉ាងលើកលែងតែអាវុធ»ឬហៅកាត់ថាEBAពីកម្ពុជា សេដ្ឋវិទូ និងជាទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានផ្ដល់ទស្សនទានមួយចំនួនដល់រាជរដ្ឋាភិបាល និងអ្នកពាក់ព័ន្ធទាំងអស់ ជាពិសេសវិនិយោគិនដែលកំពុងបណ្ដាក់ទុននៅកម្ពុជា ។
លោកបណ្ឌិតបានមានប្រសាសន៍ថា តាំងពីក្រោយឆ្នាំ១៩៩៣ ប្រទេសកម្ពុជាត្រូវពឹងលើការផលិត និងនាំចេញផលិតផលសម្លៀកបំពាក់ ហើយកម្ពុជាក៏បាននាំចេញផលិតផលសម្លៀកបំពាក់ទៅកាន់បណ្ដាប្រទេសជាច្រើន រហូតដល់សហគមន៍អឺរ៉ុបបានផ្ដល់ការអនុគ្រោះពន្ធដល់កម្ពុជា ក្នុងគោលបំណងចូលរួមកាត់បន្ថយភាពក្រីក្ររបស់ប្រជាជនកម្ពុជា ។ លោកថ្លែងថា ៖« ដោយសារតែកម្ពុជា មានអំណោយផលល្អ ទើបបណ្ដាវិនិយោគិនជាច្រើនចូលមកវិនិយោគ និងបានផ្លាស់ប្តូរកម្ពុជាពីប្រទេសកសិកម្មទៅជាប្រទេសពឹងលើឧស្សាហកម្មផង និងកសិកម្មផង និងបានធ្វើឲ្យសេដ្ឋកិច្ចមានការផ្លាស់ប្តូរខ្លាំង » ។
លោកបន្តថា កាលពីមុន កម្ពុជាបានពឹងផ្អែកលើទីផ្សារសហរដ្ឋអាមេរិក និងអឺរ៉ុប ដោយសារតែមានការអនុគ្រោះពន្ធ ក៏ប៉ុន្តែក្នុងស្ថានភាពការអនុគ្រោះពន្ធនេះកំពុងមានការគំរាមកំហែងពីប្រទេសផ្ដល់ឲ្យ កម្ពុជាបាននិងកំពុងធ្វើពិពិធកម្មផលិតផល និងទីផ្សារទៅកាន់ប្រទេសផ្សេងៗទៀត ដូចជា ចិន និងបណ្ដាប្រទេសធំៗជាច្រើនទៀត ។ លោកបណ្ឌិតថា ៖« នៅថ្ងៃអនាគត កម្ពុជាមិនគួរនៅតែបែបនេះទៀតទេ គឺត្រូវធ្វើពិពិធកម្មបន្ថែមទៀត និងគួរងាកទៅផលិតនូវទំនិញណាដែលលក់បានថ្លៃ និងមានទីផ្សារច្រើននៅក្រៅប្រទេស ដើម្បីគេចផុតពីទណ្ឌកម្មរបស់បរទេសដែលធ្លាប់ផ្ដល់ជូន »។
លោកបន្តទៀតថា ក្នុងពេលបច្ចុប្បន្ននេះ គឺជាពេលវេលាដែលត្រូវផ្លាស់ប្តូរបណ្ដើរៗហើយ មានន័យថា ផលិតផលសម្លៀកបំពាក់នៅតែធ្វើ តែគួរធ្វើរបស់ណាដែលមានតម្លៃខ្ពស់ជាងនេះ ហើយពេលនេះក៏បានឃើញថា មានផលិតថ្មីមួយទៀតដែលយើងកំពុងធ្វើរួចហើយនោះគឺ ផលិតផលធ្វើដំណើរ ( Traveling Goods ) និងកំពុងតែមានទីផ្សារផងដែរទៅកាន់អាមេរិក និងបណ្ដាប្រទេសជាច្រើន ។ អីចឹងរយៈពេលដែលខ្លួនកំពុងទទួលបានការអនុគ្រោះពន្ធនេះ យើងត្រូវស្វែងរកអ្វីដែលថ្មីៗបន្ថែមឲ្យបានច្រើន ។
លោកបណ្ឌិតបន្ថែមថា ៖« បើសិនជាយើងមិនពិពិធកម្មទាំងទីផ្សារ និងផលិតផល ហើយនៅតែពឹងលើខោអាវដូចបច្ចុប្បន្ន យើងអាចនឹងមានបញ្ហា ពីព្រោះថា កូនកសិករមួយចំនួនបានមកចាប់យករបរជាអ្នកផលិតខោអាវ ធ្វើការនៅរោងចក្រ និងលះបង់ស្រែចំការចោលបណ្ដើរៗហើយ ។ អីចឹង បើសិនជាគេឈប់ផ្ដល់អនុគ្រោះពន្ធ មានន័យថាទំនិញយើងនឹងឡើងថ្លៃនៅលើទីផ្សារលក់រាយប្រទេសទាំងនោះ ដូចនេះអាចនឹងបាត់បង់អ្នកទិញ ឬគេឈប់ទិញពីយើង គេទៅទិញពីប្រទេសណាដែលលក់តម្លៃទាបជាងយើង នោះហើយដែលធ្វើឲ្យកម្មករត្រូវបាត់បង់ការងារ និងងាកទៅស្រែវិញ ជួនកាលស្រែចំការធ្វើមិនបានផលទៀត ដែលជាហេតុធ្វើឲ្យមានបញ្ហាកើតឡើង » ។
លោកបណ្ឌិតបញ្ជាក់ថា ជុំវិញបញ្ហាEBA វាមានពាក់ព័ន្ធច្រើនវិស័យ មិនមែនតែកម្មករផ្ទាល់នោះទេ ពោលគឺវានឹងទាញដល់ធនាគារ មីក្រូហិរញ្ញវត្ថុ និងវិស័យដឹកជញ្ជូន ឲ្យមានបញ្ហាជាមួយផងដែរ ក៏ប៉ុន្តែត្រូវចាំថា «ប្រទេសកម្ពុជា នឹងមិនស្លាប់ទេ ព្រោះកន្លងមក កម្ពុជា បានជួបរឿងអាក្រក់ៗជាច្រើនហើយ តែនៅតែដោះស្រាយបាន។ ខ្ញុំជឿថាកម្ពុជានឹងដោះស្រាយ ដោយហែលឆ្លងនូវបញ្ហាទាំងនេះផុតក្នុងពេលឆាប់ៗ »។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានថ្លែងទៅកាន់បងប្អូនខ្មែររស់នៅទ្វីបអឺរ៉ុបពីទីក្រុងប្រ៊ុចសែល ប្រទេសប៊ែលស៊ិចផងដែរថា ពាក់ព័ន្ធការអនុគ្រោះពន្ធទំនិញពីសហភាពអឺរ៉ុប កម្ពុជាមិនទាន់បាត់បង់អ្វីទាំងអស់ ។ បញ្ហានេះ ត្រូវបានគេយកធ្វើជាសង្គ្រាមចិត្តសាស្ត្រវាយប្រហារលើរាជរដ្ឋាភិបាលប៉ុណ្ណោះ ។
សម្តេចតេជោបន្តថា ប្រព័ន្ធអនុគ្រោះពន្ធសម្រាប់ទំនិញរបស់កម្ពុជាពីសហភាពអឺរ៉ុបគង់តែបាត់បង់ទេ នៅពេលក្លាយជាប្រទេសមានសេដ្ឋកិច្ចខ្ពស់ ប៉ុន្តែសម្តេចបានធ្វើការមួយជំហានជាមួយជប៉ុន ចិន និងធនាគារអភិវឌ្ឍន៍អាស៊ី ឲ្យបន្តផ្តល់អត្រាការប្រាក់អនុគ្រោះរយៈពេល១០ឆ្នាំ ហើយលទ្ធភាពសងរយៈពេល៤០ឆ្នាំ ។
សម្ដេចបញ្ជាក់ថា ៖« កម្ពុជានៅមានលទ្ធភាពខ្ពស់ក្នុងការខ្ចីថវិកាពីបរទេស ប៉ុន្តែកម្ពុជាកំណត់អត្រាកម្ចីបរទេសត្រឹម២៣%ប៉ុណ្ណោះ ធៀបជាមួយចំណូលសេដ្ឋកិច្ចជាតិ ពោលកម្ពុជាមានលទ្ធភាពក្នុងការដោះស្រាយបញ្ហារបស់ខ្លួនលើបញ្ហាផ្សេងៗជាច្រើន មិនមែនសុទ្ធតែពឹងលើបំណុលបរទេសនោះទេ »៕
ចែករំលែកព័តមាននេះ