ខេត្តបាត់ដំបង ៖ គិតត្រឹមរសៀលថ្ងៃទី២២ តុលា មានសេចក្ដីរាយការណ៍ចុងក្រោយបន្ត ពាក់ព័ន្ធករណីចាប់ក្មេងស្រីចង ហើយប្លន់យកលុយនិងគ្រឿងអល័ង្ការ បើតាមលោកសុខ សារិន អធិការស្រុកបវេល បានឱ្យដឹងថា ករណីនេះអាចជារឿងប្រឌិតដែលរៀបចំឡើងដោយក្មេងស្រីឈ្មោះរូ រ៉ូស្សា នេះតែម្ដង ។ លោកបានប្រាប់ថា ជំហានដំបូងយើងគិតថា អាចជាករណីប្លន់ដែរ តែមានចំណុចខ្លះ គួរឱ្យសង្ស័យទើបមន្ត្រីជំនាញសួរដេញដោល ហើយក៏បែកធ្លាយរឿងប្រឌិតតែម្ដង។
បើតាមចម្លើយចុងក្រោយរបស់នាង រូ រ៉ូស្សា បានប្រាប់សមត្ថកិច្ចថា នាងបានប្រឌិតរឿងនេះឡើង ដើម្បីបញ្ចៀសការទទូលខុសត្រូវ ដែលនាងធ្លាប់បានលួចចិញ្ចៀនមាស២វង់របស់ជីដូននាង មុនថ្ងៃភ្ជុំបិណ្ឌ ។ ដូច្នេះហើយ ទើបនៅព្រឹកថ្ងៃទី២២ តុលា នេះ នាងយកខ្សែចងខ្លួនឯង និងយកកូនជ្រូកសន្សំលុយបោក រួចទូរស័ព្ទប្រាប់ជីដូននាងថា មានចោរ៣នាក់ចូលចាប់នាងចងរួចប្លន់យកចិញ្ចៀន និងលុយអស់តែម្ដងទៅ ។
លោកសុខ សារិន បានបញ្ជាក់ថា នេះជាចម្លើយរបស់នាងរ៉ូស្សា ដែលមន្ត្រីជំនាញឈ្លេចសួរចុងក្រោយ បន្ទាប់ពីមានការសង្ស័យ ។ ទោះយ៉ាងណា នៅមិនទាន់ចប់ការសួរនាំទេ មន្ត្រីជំនាញកំពុងធ្វើការស៊ើបអង្កេតលើករណីនេះបន្តទៀតនៅឡើយ ។
ចែករំលែកព័តមាននេះ