ខេត្តបន្ទាយមានជ័យ ៖ បុរសម្នាក់បានលង់ទឹកស្លាប់បង្កភ្ញាក់ផ្អើលនៅចំណុចអាងអូរខៃដន ស្ថិតក្នុងភូមិកូនដំរី សង្កាត់និមិត្ត ក្រុងប៉ោយប៉ែតកាលពីរសៀលថ្ងៃទី២១ តុលា ២០១៨។
ជនរងគ្រោះដែលស្លាប់ឈ្មោះហុង ហន អាយុ២២ឆ្នាំ ជាជាងដែក ស្នាក់នៅជាមួយម្តាយមីងក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត មានទីលំនៅស្រុកពារាំង ខេត្តព្រៃវែង។
ប្រភពពីកន្លែងកើតហេតុនិយាយថា ជនរងគ្រោះ និងមិត្តភក្តិ៥នាក់ផ្សេងទៀតសរុប៦នាក់បាននាំគ្នាទៅលេងអាងអូរខៃដន ក្រោយម៉ោងសម្រាកការងារថ្ងៃត្រង់។
ប្រភពដដែលបន្តថា ពេលទៅដល់កន្លែងកើតហេតុ មិត្តភក្តិចំនួន៥នាក់បានចុះលេងទឹក ដោយឡែកជនរងគ្រោះមិនទៅជាមួយទេព្រោះមិនចេះហែលទឹក។
លុះមិត្តភក្តិវិលត្រឡប់ពីហែលទឹកលេងវិញ ស្រាប់តែបាត់ជនរងគ្រោះ ក៏នាំគ្នាភ្ញាក់ផ្អើលរកមើលជុំវិញមិនឃើញ ដោយការសង្ស័យក៏នាំគ្នាចុះរាវក្នុងទឹកប្រហែលកន្លះម៉ោង ទើបឃើញជនរងគ្រោះ តែហួសពេលទៅហើយ ។
ក្រោយពីសមត្ថកិច្ចធ្វើការត្រួតពិនិត្យ និងកោសល្យវិច្ច័យរួច សពត្រូវបានប្រគល់ឲ្យសាច់ញាតិដើម្បីយកទៅធ្វើបុណ្យតាមប្រពៃណី៕
ចែករំលែកព័តមាននេះ