រាជធានីភ្នំពេញ ៖ តាមសេចក្តីរាយការណ៍បឋមបានឲ្យដឹងថា មានករណីគ្រោះថ្នាក់ចរាចរណ៍រវាងរថយន្ត និងម៉ូតូមួយកើតឡើង បណ្តាលឲ្យយុវជនម្នាក់បានស្លាប់នៅកន្លែង នៅលើផ្លូវជាតិលេខ៤ មុខសាលាក្តីខ្មែរក្រហម ដែលកើតហេតុនៅវេលាម៉ោង១និង២០នាទីរសៀលថ្ងៃទី២២ ខែតុលានេះ នៅភូមិព្រៃបឹង ខណ្ឌពោធិ៍សែនជ័យ រាជធានីភ្នំពេញ ។
សេចក្តីរាយការណ៍បានបន្តថា គ្រោះថ្នាក់ខាងលើកើតឡើងរវាងម៉ូតូម៉ាក ZOOMER-X ពណ៍ខ្មៅលាយទឹកក្រូច ពាក់ស្លាកលេខភ្នំពេញ ១GE-១៩០២ បើកបរដោយយុវជនដែលស្លាប់ខាងលើ ក្នុងទិសដៅពីកើតទៅលិច បានជែងរថយន្តនៅពីមុន តែក៏ត្រូវបុកជាមួយរថយន្តម៉ាកហីយ៉ានដាយ សណ្តោងរ៉ឺម៉ក ពណ៍លឿង ពាក់ស្លាកលេខភ្នំពេញ ៣C -០៩៤៩ ដែលរថយន្តនេះបើកបរក្នុងទិសដៅពីលិចទៅកើតបញ្ច្រាសគ្នា ។
ក្រោយពេលបើកបរអ្នកបើកបានរត់គេចខ្លួនបាត់ ។ ជនរងគ្រោះខាងលើមានឈ្មោះ យ៉ន លីហួរ អាយុ១៨ឆ្នាំ មុខរបររៀនជាងទូរស័ព្វ ស្នាក់នៅ ភូមិអណ្តូង ឃុំបែកចាន ស្រុកអង្គស្នួល ខេត្តកណ្តាល ។
បញ្ជាក់ៈ ជនរងគ្រោះបានពាក់មួកសុវត្ថិភាព បានត្រឹមត្រូវ តែដោយគ្រោះថ្នាក់បុកពេញទំហឹងខ្លាំងពេក ខណៈពេលនោះក៏បានចូលក្រោមរថយន្តកិនស្លាប់តែម្តង ៕
ចែករំលែកព័តមាននេះ