រាជធានីភ្នំពេញ ៖ បុគ្គលិកមីក្រូហិរញ្ញវត្ថុម្នាក់ ត្រូវបានកម្លាំងសមត្ថកិច្ចនគរបាលខណ្ឌ៧មករា ឃាត់ខ្លួនកាលពីថ្ងៃទី១៩ តុលា ពាក់ព័ន្ធបទរំលោភលើទំនុកចិត្ត ស៊ីដាច់ប្រាក់មីក្រូហិរញ្ញវត្ថុជិត១០ម៉ឺនដុល្លារអាមេ
រិក ។
ជនសង្ស័យឈ្មោះ កាន់ សុវ៉ាត ភេទប្រុស អាយុ២៨ឆ្នាំ មានទីលំនៅភូមិចំការឪឡឹក សង្កាត់កាកាប ខណ្ឌពោធិសែនជ័យ រាជធានីភ្នំពេញ ។
តាមមន្ត្រីនគរបាលខណ្ឌ៧មករាបានឲ្យដឹងថា ដើមបណ្តឹងឈ្មោះ ឃាវ សុខលួង ភេទប្រុស អាយុ៣០ឆ្នាំ មុខរបរជានាយកក្រុមហ៊ុនហ្វូលាង បាននាំខ្លួនបុគ្គលិករបស់ក្រុមហ៊ុនម្នាក់គឺឈ្មោះ កាន់ សុវ៉ាត មកប្រគល់ឲ្យសមត្ថកិច្ចដើម្បីចាត់ការតាមផ្លូវច្បាប់ ពាក់ព័ន្ធករណីស៊ីដាច់់ប្រាក់ជិត១០ម៉ឺនដុល្លារអាមេរិកនេះ ។
តាមពាក្យបណ្តឹងរបស់នាយកក្រុមហ៊ុនបានបញ្ជាកថា ឈ្មោះ កាន់ សុវ៉ាត បានចូលបម្រើការងារជាបុគ្គលិកឥណ្ឌទានហ្វូលាន មីក្រូហិរញ្ញវត្ថុ តាំងពីខែធ្នូ ២០១៧ ។ ក្នុងអំឡុងពេលនៅធ្វើការងារ ឈ្មោះ កាន់ សុវ៉ាត បានឃុបឃិតជាមួយបុគ្គលិកម្នាក់ទៀតធ្វើឯកសារបន្លំយកប្រាក់មីក្រូហិរញ្ញវត្ថុអស់ប្រមាណ៩៣.៤៨៩ដុល្លារអាមេរិក ។
ដោយមានការសង្ស័យ នាយកក្រុមហ៊ុនជាដើមបណ្តឹង បានឆែកគណនេយ្យអតិថិជនតាមប្រពន្ធវីង ដែលជនសង្ស័យទទួលយកប្រាក់នោះ ទើបរកឃើញអតិថិជន២៧នាក់ បានបង់ប្រាក់ឲ្យេជនសង្ស័យរួចអស់ហើយ ។ ប៉ុន្តែប្រាក់នោះជនសង្ស័យមិនបានបង្វិលចូលក្រុមហ៊ុនទេ គឺទុកប្រើប្រាស់ និងចាយវាយ(ស៊ីដាច់)ខ្លួនឯង ហើយបើតាមគេដឹងជនសង្ស័យបានយកប្រាក់នេះ ទៅលេងល្បែងនៅកាស៊ីណូទៀតផង ។
ចម្លើយសារភាពជនសង្ស័យបានសមត្ថកិច្ចឲ្យដឹងថា ខ្លួនពិតជាបានឃុបឃិតជាមួយមនុស្សម្នាក់លួចប្រាក់មីក្រូហិរញ្ញវត្ថុនោះមែន ។ ល្បិចលួចនោះគឺខ្លួនបានបង្កើតអតិថិជនខ្មោចប្រមាណ៨៧នាក់ ដើម្បីក្លែងឯកសារយកទៅឲ្យនាយកក្រុមហ៊ុន សម្រាប់បង់រំលោះទូរស័ព្ទតាមហាង ដែលគិតជាទឹកប្រាក់មានចំនួន៩៣.៤៨៩ អាមេរិក ។
យោងតាមពាក្យបណ្តឹង និងស្តាប់ចម្លើយជនសង្ស័យពិតជាមានបទល្មើស ដែលអាចធ្វើឲ្យសមត្ថកិច្ច
កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញដើម្បីចាត់ការតាមនីតិវិធី ៕
ចែករំលែកព័តមាននេះ