ខេត្តកណ្តាល ៖ រដូវទឹកសម្រក់គឺជារដូវប្រជាកសិករចាប់ផ្តើមបង្កបង្កើនផលស្រែចំការសាបព្រោះដើម្បីចិញ្ចឹមជីវិត ដោយឡែកប្រជាកសិកររស់នៅក្នុងភូមិសំរោងក្អែ ឃុំសំរោងធំ ស្រុក កៀនស្វាយ ខេត្តកណ្តាល កំពុងជួបការលំបាកយ៉ាងខ្លាំងក្នុងការដឹកជញ្ជូនស្រូវពូជយកទៅសាបព្រោះ ដោយសារតែបុគ្គលម្នាក់បានលើកទំនប់បិទជិតប្រព័ន្ធរំដោះទឹកពីមុខស្ពានជប៉ុនបណ្តាលឲ្យទឹកចាលហូរមកកាត់ផ្លូវលំច្រុះដាច់3កន្លែងមិនឃើញមានអាជ្ញាធរណាមួយចុះមកដោះស្រាយជូនពួកគាត់សោះ ។
ប្រជាកសិករបានលើកឡើងថា ផ្លូវលំមួយខ្សែនេះគឺជាសរសៃឈាមសេដ្ឋកិច្ចដ៏សំខាន់សម្រាប់ពួកគាត់ក្នុងការដឹកជញ្ជូនខែទឹកស្រក់ទៅសាបព្រោះ ដល់ខែប្រមូលផលស្រូវដឹកកសិផលឡើងមកផ្ទះ ។ ជាយូរឆ្នាំមកហើយមិនដែលរងការខូចខាតទេ ទើបតែឆ្នាំនេះមានបុគ្គលម្នាក់ឈ្មោះ ស៊ិន ចាន់ណារី ហៅឡាក់ ដែលជាអ្នកមានលុយមានអំណាចនៅរាជធានីភ្នំពេញបានមកអះអាងថា ដីត្រង់ចំណុចមុខស្ពានគឺជាដីកម្មសិទ្ធិរបស់គេទិញពីប្រជាពលរដ្ឋតាំងពីមុនស្ពានមិនទាន់មាន ។ ហើយបានលើកទំនប់បិតជិតផ្លូវរំដោះទឹកចំពីមុខស្ពានជប៉ុននេះទើបបណ្តាលឲ្យទឹកចាលហូរកាត់មកលើផ្លូវច្រុះដាច់ជ្រៅៗ2ទៅ3កន្លែងធ្វើឲ្យពួកគាត់ជួបការលំបាកបែបនេះ ។
ប្រជាកសិករបានបញ្ជាក់បន្ថែមទៀតថា កាលពីឆ្នាំ2000ជាឆ្នាំដែលទឹកធំសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់កម្លាំងទ័ពមកកាយផ្តាច់ថ្នល់ជាតិលេខ1ត្រង់ចំណុចនេះបើកផ្លូវរំដោះទឹកជំនន់ទន្លេមេគង្គឲ្យហូរចេញទៅបឹង ព្រោះខ្លាចមានគ្រោះថ្នាក់ប៉ះពាល់ដល់ការរស់នៅរបស់ប្រជាជន ជាពិសេសដើម្បីបញ្ចៀសកុំឲ្យលិចទីក្រុងភ្នំពេញ ។
បន្ទាប់ពីសម្តេចបានធ្វើការអភិវឌ្ឍន៍ពង្រីកផ្លូវជាតិលេខ1 និងបានធ្វើស្ពានបើកផ្លូវទឹកនៅចំណុចនេះព្រមទាំងបានដោះស្រាយគោលនយោបាយពីផលប៉ះពាល់ដីរួចរាល់ចប់សព្វគ្រប់អស់ហើយ ស្រាប់តែឥឡូវបែរជាបុគ្គលឈ្មោះ ស៊ិន ចាន់ណារី ហៅឡាក់ នេះនៅតែមកអះអាងថា គឺជាដីរបស់គេទៀត ។
ចំពោះបញ្ហានេះកន្លងមកពួកគាត់ធ្លាប់បានធ្វើការតវ៉ាមួយលើកជាពីរលើករហូតដល់អាជ្ញាធរស្រុកចុះមកពិនិត្យ និងបានធ្វើកិច្ចសន្យាឲ្យឈ្មោះ ស៊ិន ចាន់ណារី ហៅឡាក់ នេះត្រូវដាក់លូឲ្យធំៗត្រង់ចំណុចផ្លូវខាងត្បូង និងខាងជើងដើម្បីរំដោះទឹកកុំឲ្យហូរកាត់ផ្លូវប៉ះពាល់ដល់ការដឹកជញ្ជូនទៅមកព្រមទាំងឲ្យកាយបើកផ្លូវទឹកខាងមុខស្ពានឲ្យធំដើម្បីឲ្យទូកអ្នកនេសាទបានចេញចូលផង ។
ប៉ុន្តែបុគ្គលម្នាក់នេះមិនព្រមអនុវត្តតាមការណែនាំរបស់អាជ្ញាធរនោះទេគឺលើកទំនប់បិទជិតសូម្បីតែលូមួយកង់ក៏មិនដាក់ដែរ ឥឡូវដាច់ផ្លូវអស់តើអ្នកណាទទួលខុសត្រូវ ។ មិនតែប៉ុណ្ណោះមិនបាច់ថា មនុស្សដើរឆ្លងកាត់នោះទេ សម្បីតែសត្វគោក្របីរបស់ប្រជាពលរដ្ឋដើរកាត់ប៉ះពាល់ខូចខាតឥវ៉ាន់គេបន្តិចបន្តួចក៏គេចាប់យកលុយចាប់ពី10ម៉ឺនរៀលទៅ15ម៉ឺនរៀលទៀតផង ។
ពាក់ព័ន្ធបញ្ហានេះបើតាមលោក សុខ ពិសិដ្ធ អភិបាលរងស្រុកកៀនស្វាយក៏ធ្លាប់បានប្រាប់ភ្នាក់ងារយើងអោយដឹងកាលពីពេលចុះមកដោះស្រាយកន្លងមកថា ដីនេះគឺឈ្មោះ ស៊ិន ចាន់ណារី ហៅឡាក់ បានមានឯកសារទិញលក់ពីពលរដ្ឋតាំងពីមិនទាន់អភិវឌ្ឍន៍ស្ពានពិតប្រាកដមែន ។
ប៉ុន្តែរឿងសំណងគោលនយោបាយរបស់រាជរដ្ឋាភិបាលបែបណានោះលោកមិនបានដឹងទេព្រោះគាត់ទើបតែឡើងកាន់តំណែងជាអភិបាលរងស្រុកក្រោយនេះទេ ។ ហើយបើតាមលោកដឹងដំណោះស្រាយគោលនយោបាយនេះប្រហែលតាំងពីជំនាន់លោក ឃឹម បូរ គាត់ធ្វើជាអភិបាលខេត្តកណ្តាលមកម្លេះ តែឥឡូវគាត់ស្លាប់បាត់ហើយ ។
រីឯលោក ជុន ប៉េងឡុង ប្រធានមន្ទីរធន់ធានទឹកក៏ធ្លាប់បានប្រាប់អោយដឹងនាពេលកន្លងមកដែរថា ពាក់ព័ន្ធរឿងនេះលោកបានឲ្យស្រុកគេចុះធ្វើហើយ ។ ប៉ុន្តែមកដល់បច្ចុប្បន្ននៅតែដដែល ហើយបុគ្គលម្នាក់នោះថែមទាំងសាងសង់សំណង់រឹងផ្ទះថ្មមួយល្វែងនៅជាប់គល់ស្ពានទៀតផង។
ទោះយ៉ាងណាប្រជាកសិករសូមសំណូមពរឲ្យលោក ម៉ៅ ភិរុណ អភិបាលខេត្តកណ្តាលមេត្តាជួយជួសជុលផ្លូវឲ្យពួកគាត់បានដូចដើមវិញផងដើម្បីងាយស្រួលក្នុងការដឹកជញ្ជូនកសិផលព្រោះមុខរបររបស់ពួកគាត់មានតែធ្វើស្រែចំការបន្តិចបន្តួចនេះទេ គ្រាន់ផ្គត់ផ្គង់ជីវភាពក្នុងគ្រួសារឲ្យកូនបានរៀនសូត្រ ៕
ចែករំលែកព័តមាននេះ