ទីក្រុងប៉េកាំង ៖ ទិន្នន័យផលិតផលក្នុងស្រុកថ្មីៗរបស់ប្រទេសចិនបង្ហាញថា ប្រទេសនេះនឹងជួបការលំបាកក្នុងការសម្រេចគោលដៅការអភិវឌ្ឍន៍សេដ្ឋកិច្ចដែលមានគុណភាពខ្ពស់ខណៈដែលមានសង្គ្រាមពាណិជ្ជកម្មជាមួយនឹងសហរដ្ឋអាមេរិក ។
ដោយសង្គ្រាមពាណិជ្ជកម្មរវាងសេដ្ឋកិច្ចធំជាងគេទាំងពីររបស់ពិភពលោកកាន់តែតានតឹងឡើងៗ អ្នកដឹកនាំរបស់ប្រទេសចិនអាចត្រូវបង្ខំឲ្យបោះបង់ការធ្វើកំណែទម្រង់កាត់បន្ថយហានិភ័យហិរញ្ញវត្ថុដែលកំពុងតែប៉ះពាល់ដល់ការលូតលាស់សេដ្ឋកិច្ច ។
អ្នកវិភាគមួយចំនួនបានព្រមានថា ប្រទេសចិនអាចមើលឃើញសេដ្ឋកិច្ចអន់ថយ ខណៈដែលអត្រាអតិផរណាកើនឡើង ។ ករណីនេះនឹងប៉ះពាល់ដល់សេដ្ឋកិច្ចពិភពលោកដែលត្រូវបានជំរុញដោយកំណើនតម្រូវការក្នុងស្រុករបស់ប្រទេសចិន ។
យោងតាមទិន្នន័យដែលបង្ហាញកាលពីថ្ងៃសុក្រ បានឲ្យដឹងថា សេដ្ឋកិច្ចរបស់ប្រទេសចិនលូតលាស់បាន៦,៥%ក្នុនអំឡុងពីខែកក្កដាដល់កញ្ញា ប៉ុន្តែល្បឿននៃការលូតលាស់បែរជាយឺតជាងគេតាំងពីត្រីមាសទី១នាឆ្នាំ២០០៩មក ។
គួរបញ្ជាក់ដែរថា ប្រទេសចិននិងសហរដ្ឋអាមេរិកបានបរាជ័យក្នុងការដោះស្រាយជម្លោះពាណិជ្ជកម្មតាមរយៈការចរចា ។ លើសពីនេះទៅទៀត ភាពតានតឹងបែរជាកាន់តែធ្ងន់ធ្ងរឡើង ព្រោះសហរដ្ឋអាមេរិកមានភាពម៉ឺងម៉ាត់ក្នុងការគ្រប់គ្រងឥទ្ធិពលសេដ្ឋកិច្ច និងនយោបាយរបស់ប្រទេសចិន ។
លោកប្រធានាធិបតី ស៊ី ជិនពីង (Xi Jinping) របស់ប្រទេសចិន បានផ្តោតសំខាន់លើការអភិវឌ្ឍន៍សេដ្ឋកិច្ចដោយមានគុណភាពខ្ពស់ និងបានប្រកាសថា នឹងដោះស្រាយបញ្ហាហានិភ័យហិរញ្ញវត្ថុ ភាពក្រីក្រ និងកង្វក់បរិយាកាស។
ការរក្សាលំនឹងនៃប្រព័ន្ធហិរញ្ញវត្ថុ និងទំនាក់ទំនងល្អជាមួយសហរដ្ឋអាមេរិក ជាកត្តាដ៏សំខាន់ក្នុងការសម្រេចគោលដៅនេះ ប៉ុន្តែក្នុងស្ថានការណ៍បច្ចុប្បន្ន សេដ្ឋវិទូជាច្រើននៅប្រទេសចិនគិតថា លោកXiត្រូវបោះបង់ការធ្វើកំណែទម្រង់សិន ៕
ចែករំលែកព័តមាននេះ