ខេត្តកំពង់ធំ ៖ តាមសេចក្តីរាយការណ៍បានឲ្យដឹងថា ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១៤និង៥៧នាទីរសៀលថ្ងៃទី២១ ខែតុលា ឆ្នាំ២០១៨ នៅលើកំណាត់ផ្លូវលំ ក្រាលគ្រួសក្រហមមួយខ្សែស្ថិតនៅភូមិខោល ឃុំទំរីង ស្រុកសណ្តាន់ ខេត្តកំពង់ធំ ។
សមត្ថកិច្ចប្រាប់ថា ករណីគ្រោះថ្នាក់ចរាចរណ៍រថយន្តបុកម៉ូតូក្នុងទិសដៅផ្ទុយគ្នាខាងលើនេះ បណ្តាលឲ្យមនុស្សស្លាប់ម្នាក់ដែលបង្កឡើងដោយរថយន្តម៉ាកសាំងយ៉ុង ពណ៌ស ពាក់ស្លាកលេខភ្នំពេញ 2AJ-7745 បើកបរដោយឈ្មោះ សូត បូរី ភេទប្រុស អាយុ២៨ឆ្នាំ នៅភូមិគោកទ្រាលិច ឃុំល្វា ស្រុកព្រៃឈរ ខេត្តកំពង់ចាម ត្រូវបានឃាត់ខ្លួននាំទៅកាន់អធិការដ្ឋាននគរបាលស្រុកសណ្តាន់ ក្រោយពីបានបើករថយន្តទៅម៉ូតូម៉ាកវេវ ពណ៌ក្រហម គ្មានស្លាកលេខ អ្នកបើកបរមិនស្គាល់ឈ្មោះ និងអាសយដ្ឋានបានស្លាប់នៅកន្លែងកើតហេតុ (មិនពាក់មួកសុវត្ថិភាព) ។
សមត្ថកិច្ចបញ្ជាក់ថា ករណីខាងលើមូលហេតុជាបឋមបង្កឡើងដោយអ្នកបើកបររថយន្តបើកមិនប្រកាន់ស្តាំទៅបុកម៉ូតូដែលកំពុងចរាចរណ៍ នៅក្នុងគន្លងផ្ទុយទិសរបស់ខាងម៉ូតូ បន្ទាប់ពីវាស់វែងរួចវត្ថុតាងរក្សាទុកនៅអធិការដ្ឋាននគរបាលស្រុកសណ្តាន់ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ