ខេត្តកំពង់ស្ពឺ ៖ កម្មកររោងមាន់ម្នាក់ត្រូវបានថៅកែប្តឹងឱ្យសមត្ថកិច្ចឃាត់ខ្លួនបន្ទាប់ពីជនសង្ស័យធ្វើសកម្មភាពលួចយកពងមាន់អស់៩០គ្រាប់ ។ ក្រោយឃាត់ខ្លួនសមត្ថកិច្ចបានរកឃើញថា ជនសង្ស័យមានពាក់ព័ន្ធករណីគ្រឿងញៀនទៀតផង ។ ការឃាត់ខ្លួននេះធ្វើឡើងកាលពីវេលាម៉ោង១០និង០០នាទី ថ្ងៃទី២០ ខែតុលា ឆ្នាំ២០១៨ នៅភូមិបាត់ដឹង ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ ។
ជនសង្ស័យមានឈ្មោះ យ៉ាន លៀង ភេទប្រុស អាយុ២២ឆ្នាំ រស់នៅភូមិច្រាបកន្ទួត ឃុំពាម ស្រុកសាមគ្គីមានជ័យ ខេត្តកំពង់ឆ្នាំង ។ ម្ចាស់កសិដ្ឋានរោងមាន់ឈ្មោះ តាំង ឆេងលីម ភេទប្រុស អាយុ៥៤ឆ្នាំ រស់នៅភូមិបាត់ដឹង ឃុំក្សេមក្សាន្ត ស្រុកឧដុង្គ បានប្តឹងកម្មកររបស់គាត់ដែលជាជនសង្ស័យខាងលើថា បានលួចយកពងមាន់នៅកសិដ្ឋានរបស់គាត់ចំនួន៩០គ្រាប់យកទៅលក់ ។
ប្រភពបន្តថា ក្រោយពីទទួលពាក្យបណ្តឹងកម្លាំងអធិការដ្ឋាននគរបាលស្រុកឧដុង្គបានឃាត់ជនសង្ស័យខាងលើ រួមទាំងដកហូតបានម្សៅក្រាមពណ៍សជាគ្រឿងញៀនចំនួន១កញ្ចប់តូច(នៅជាប់នឹងកន្ទោងជក់) ។
តាមចម្លើយសារភាពរបស់ឈ្មោះ យ៉ាន លៀង ខាងលើថា ខ្លួនពិតជាបានលួចពងមាន់ចំនួន៩០គ្រាប់ពិតមែន ដោយលក់បាន២០០០០០៛ ហើយលុយនោះគេយកទៅទិញគ្រឿងញៀនពីឈ្មោះ ម៉ៅ រ៉ាម៉ន ភេទប្រុស អាយុ២៧ឆ្នាំ រស់នៅភូមិទំនប់ទឹក ឃុំចាន់សែន ស្រុកឧដុង្គ អស់ចំនួន៤០០០០៛ បានមួយកញ្ចប់តូច ។ បន្ទាប់ពីឃាត់ខ្លួនជនសង្ស័យខាងលើសារភាព និងចង្អុលបង្ហាញមុខសញ្ញាជួញដូរ អោយសមត្ថកិច្ចទៀតផង ។
ក្រោយស្តាប់ចម្លើយសារភាពរបស់ជនសង្ស័យរួចមកសមត្ថកិច្ចបានសុំយោបល់ពីលោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺដើម្បីអនុវត្តន៍ ដោយទទួលបានយោបល់ពីលោកស្នងការសមត្ថកិច្ចបានបន្តឃាត់ឈ្មោះ ម៉ៅ រ៉ាម៉ន ខាងលើនៅនឹងផ្ទះរបស់គេនៅចំណុចខាងលើតែម្តង ។
ក្នុងការឃាត់មុខសញ្ញាជួញដូរនេះដែរសមត្ថកិច្ចដកហូតបាន១-កាំភ្លើងច្នៃប្រើខ្យល់ចំនួន១ដើម, ២-ដបកែច្នៃសំរាប់ជក់គ្រឿងញៀនចំនួន៣ដប, ៣-ដែកកេះចំនួន៤, ៤-ទុយោកែច្នៃសំរាប់ចូកគ្រឿងញៀនចំនួន១, ៥-ទូរស័ព្ទចាស់១គ្រឿង និង៦-ថង់សំរាប់ច្រកគ្រឿងញៀនមួយចំនួនទៀត ។
នៅរសៀលថ្ងៃដដែលបន្ទាប់ពីឃាត់ខ្លួនជនសង្ស័យរួចមកជំនាញកំពុងកសាងសំណុំរឿងដើម្បីបញ្ជូនទៅកាន់ការិយាល័យប្រឆាំងគ្រឿងញៀនចាត់ការតាមនីតិវិធី ៕
ចែករំលែកព័តមាននេះ