ខេត្តកំពង់ចាម ៖ បុរសម្នាក់រងរបួសធ្ងន់ហើយក៏បានស្លាប់ ដោយសារគ្រោះថ្នាក់ចរាចរណ៍រវាងម៉ូតូបុកជាមួយរថយន្តបានកើតឡើងកាលពីវេលាម៉ោង១១និង២០នាទីយប់ថ្ងៃទី២០ តុលា ២០១៨ ស្ថិតនៅភូមិទី១៥ សង្កាត់កំពង់ចាម ក្រុងកំពង់ចាម ។
ជនរងគ្រោះដែលស្លាប់ឈ្មោះសៅ ចំរើន ភេទប្រុស អាយុ២៣ឆ្នាំ ជាអ្នកលក់ប្រេងឥន្ធនៈឱ្យគេ និងជាអ្នកបើកបរម៉ូតូ រស់នៅភូមិកំពង់ឪជ្រឹក ឃុំពង្រ ស្រុកកោះសូទិន ។ ចំណែកអ្នកបើកបររថយន្តឈ្មោះ ប៊ុណ្ណា រិទ្ធ ភេទប្រុស អាយុ៣២ឆ្នាំ នៅភូមិទី១០ សង្កាត់កំពង់ចាម ក្រុងកំពង់ចាម ។
តាមប្រភពព័ត៌មានពីលោករាំង សៅ អាយុ៤៦ឆ្នាំ ត្រូវជាឪពុកជនរងគ្រោះ ប្រាប់ឲ្យដឹងថា នៅពេល
ដែលកូនប្រុសរបស់គាត់រងគ្រោះដោយគ្រោះថ្នាក់ចរាចរណ៏ ភ្លាមៗ គាត់មិនបានដឹងនោះទេ ដោយបាន
កម្លាំងនគរបាលចរាចរណ៏ក្រុងកំពង់ចាម យកទូរស័ព្ទរបស់កូនចុចមកប្រាប់គាត់ដែលកំពុងតែដេកនៅ
ឯផ្ទះគ្រាន់តែឮកូនរងគ្រោះថ្នាក់នោះ ក្នុងចិត្តរបស់គាត់មានក្តីរន្ធត់អាណិតដល់កូនប្រុស ។
ឪពុកជនរងគ្រោះបានប្រាប់បន្តថា ក្រោយពីបានទទួលនូវដំណឹងនេះភ្លាម គាត់បានធ្វើដំណើរតាមម៉ូតូជាមួយនឹងមិត្តភ័ក្ត្រកូនប្រុសរបស់គាត់ ដែលប្រកបរបរលក់សាំងឲ្យគេនៅជិតស្ថានីយនាគព័ន្ធ ។ គាត់បានធ្វើដំណើរ មកដល់មន្ទីរពេទ្យខេត្ត បានឃើញកូនប្រុសឈ្មោះ ចំរើន នៅអគារសង្គ្រោះបន្ទាន់ ដោយសារតែស្ថាភាពរបួសកូនប្រុសត្រូវធ្ងន់ពេកនោះ ក៏ត្រូវបានបញ្ជូនបន្តមកសង្គ្រោះនៅមន្ទីរពេទ្យកាល់ម៉ែតរាជធានីភ្នំពេញ ។
រហូតមកដល់ព្រឹកថ្ងៃទី២១ តុលា គាត់និងប្រពន្ធបានមកអធិការដ្ឋាននគរបាលក្រុងកំពង់ចាម ដោយបានសុំយកសំភារៈរបស់កូនក្នុងនោះមានដូចជា លុយចំនួនជាង៣៩ម៉ឺនរៀល ប្រាក់ដុល្លារចំនួន៣១ដុល្លារ ខ្សែផ្លាទីន១ខ្សែ នាឡិកាដៃ១គ្រឿង ទូរស័ព្ទដៃ២គ្រឿង។
ក្នុងជំហានដំបូងគាត់ស្នើសុំដល់ម្ចាស់រថយន្ត មេត្តាជួយធ្វើយ៉ាងណាមើលកូនប្រុសគាត់ឲ្យបានដឹងខ្លួន
សិន និងរង់ចាំដោះស្រាយគ្នាបន្តទៀត ។
មន្ត្រីនគរបាលចរាចរវិញបានប្រាប់ឲ្យដឹងដែរថា មុនពេលកើតហេតុ ជនរងគ្រោះបានម៉ូតូមួយគ្រឿងធុន C100 កូរ៉េ បានបើកបរក្នុងល្បឿនលឿនក្នុងទិសដៅពីលិចមកកើតដោយមិនមានពាក់មួកសុវត្ថិភាពនោះទេ ស្របពេលដែលជិះមកដល់ត្រង់ចំនុចភូមិទី១៥ សង្កាត់កំពង់ចាម ក៏បានទៅបុកជាមួយនឹងរថយន្តហ៊ី
យ៉ាន់ដាយ ដែលបើកបរក្នុងទិសដៅពីត្បូងមកជើង ។ បណ្តាលឱ្យអ្នកបើកបរម៉ូតូរងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យ ដោយសាររបួសធ្ងន់ធ្ងរពេក ក៏បានស្លាប់នៅរសៀលថ្ងៃដដែល ។
ក្រោយកើតហេតុ លោកអធិការនគរបាលក្រុងកំពង់ចាម ឲ្យនាំយកវត្ថុតាងម៉ូតូនិងរថយន្តមករក្សាទុកនៅអធិការដ្ឋាននគរបាលក្រុងកំពង់ចាម ដោះស្រាយតាមច្បាប់ ៕
ចែករំលែកព័តមាននេះ