ខេត្តកណ្ដាល ៖ ចាប់ផ្តើមកក្រើកទៀតហើយនៅក្រុងតាខ្មៅ ខណៈចោរ២នាក់បានកាត់សោរបងចូលលួចយករថយន្តមួយគ្រឿង ម៉ាកកាមរីបាឡែនទៅបាត់ កាលពីថ្ងៃទី២០ ខែតុលា វេលារំលងអធ្រាត្រ នៅចំណុចអាហារដ្ឋាន «ស្រីពេជ្រ» ជាប់ផ្លូវលេខ១១៥ ភូមិព្រែករាំង សង្កាត់កំពង់សំណាញ់ ក្រុងតាខ្មៅ ។
ម្ចាស់រថយន្តឈ្មោះ ខុន សេងហ៊ាន ភេទស្រី អាយុ៤០ឆ្នាំ ជាអ្នកលក់ដូរ ទីលំនៅកន្លែងកើតហេតុ ។ ចំណែកជនល្មើស ត្រូវបានកត់សម្គាល់តាមរយៈកាមេរ៉ាសុវត្ថិភាព គឺជាមនុស្សប្រុស២នាក់ អាយុប្រហែល៤០ឆ្នាំ កម្ពស់ប្រហែល១,៧៥ម៉ែត្រ ដែលពេលនេះកំពុងគេចខ្លួន ។ រីឯរថយន្តកាមរីបាឡែន ដែលត្រូវចោរលួចយកទៅនោះ ពណ៌.ស ស៊េរីឆ្នាំ២០០៣ ពាក់ផ្លាកលេខ ភ្នំពេញ ២AR-០២១១ កង់ស្ព័រពណ៌ខ្មៅ ។
លោក ស កែវពិសិដ្ឋ អធិការនគរបាលក្រុងតាខ្មៅបានឲ្យដឹងថា ម្ចាស់រថយន្តតែងចតរថយន្តរបស់ខ្លួនទុកនៅខាងមុខផ្ទះដែលជាអាហារដ្ឋានយីហោ «ស្រីពេជ្រ» ដោយចាក់សោរបងសំណាញ់ព័ទ្ធជុំវិញជារៀងរាល់យប់ ។
តាមរយៈកាមេរ៉ាសុវត្ថិភាពបង្ហាញថា មានជនសង្ស័យ២នាក់ដែលមានភិនភាគដូចខាងលើ បានធ្វើសកម្មភាពកាត់សោទ្វាររបងចូលលួចយករថយន្តជិះចេញតាមផ្លូវលេខ១១៥ សំដៅទៅទិសខាងលិច ។
លោកអធិការបញ្ជាក់ថា ពេលនេះសមត្ថកិច្ចកំពុងស្រាវជ្រាវតាមចាប់ខ្លួនជនល្មើស ព្រោះបានស្គាល់ភិនភាគហើយតាមរយៈកាមេរ៉ាសុវត្ថិភាព ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ