ខេត្តក្រចេះ ៖ ស្ថានភាពការពុលស្រាសនៅស្រុកសំបូរបានរីករាលដាលពីឃុំមួយទៅឃុំ មួយដោយក្នុងអំឡុងរយៈពេល៣ថ្ងៃគិតចាប់ពីថ្ងៃទី១៨ ដល់ថ្ងៃទី២០ តុលា បានបង្កឲ្យអ្នក ភូមិរស់នៅក្នុងភូមិតំបន់ដាច់ស្រយាលផ្សេងគ្នា យ៉ាងតិចចំនួន៥នាក់ ស្រីម្នាក់ត្រូវបាន…
ខេត្តក្រចេះ ៖ ស្ថានភាពការពុលស្រាសនៅស្រុកសំបូរបានរីករាលដាលពីឃុំមួយទៅឃុំ មួយដោយក្នុងអំឡុងរយៈពេល៣ថ្ងៃគិតចាប់ពីថ្ងៃទី១៨ ដល់ថ្ងៃទី២០ តុលា បានបង្កឲ្យអ្នក ភូមិរស់នៅក្នុងភូមិតំបន់ដាច់ស្រយាលផ្សេងគ្នា យ៉ាងតិចចំនួន៥នាក់ ស្រីម្នាក់ត្រូវបាន ពុលស្លាប់ និងមានអ្នកភូមិជាង៧០នាក់ ក្នុងនោះមានស្រី១៧នាក់ផ្សេងទៀតក៏កំពុងតែត្រូវបានជួយសង្គ្រោះ ។នេះបើតាមរបាយការណ៍របស់មន្ទីរសុខាភិបាលខេត្ត ។
របាយការណ៍ដដែលបានឲ្យដឹងថា ក្រៅពីនោះមានពលរដ្ឋដែលរងគ្រោះចំនួន៤២នាក់ ដែលបានធូរស្រាល ត្រូវបានត្រឡប់ទៅលំនៅឋានវិញ ។
អាការពុលដែលអាជ្ញាធរកំណត់ថា បណ្តាលមកពីពុលស្រាសនេះ ដំបូង គឺបានផ្ទុះឡើង បង្កឲ្យមានការភ្ញាក់ផ្អើល កាលពីថ្ងៃទី១៨ តុលា ក្នុងនោះបានបង្កឲ្យពលរដ្ឋ៣នាក់ ស្រីម្នាក់ បានស្លាប់ជាបន្តបន្ទាប់ និងមានជាង២០នាក់ទៀត បានរងគ្រោះដោយអាការពុល ។ ការពុល នេះបានកើតមានឡើងទៅលើពលរដ្ឋរស់នៅភូមិដំរ៉ែ ឃុំបឹងចារ ស្រុកសំបូរ បន្ទាប់ពីពួកគាត់ បាននាំគ្នាទទួលទានស្រាសនៅនឹងស្រែបានរយៈពេលមួយ បន្ទាប់ពីពួកគាត់បានបញ្ចប់ការច្រូតស្រូវប្រវ៉ាស់គ្នា និងបានហូបចុកក្លែមស្រាសជុំគ្នានៅនឹងស្រែដូចទៅតាមទម្លាប់រាល់ឆ្នាំ ។
នគរបាលស្រុកសំបូរបានឲ្យដឹងថា ក្រោយស្ថានភាពពុលនៅភូមិដំរ៉ែ ឃុំបឹងចារ បាន ស្ងប់ស្ងាត់ដោយមានអ្នករងគ្រោះធ្ងន់ធ្ងរ និងអ្នកបានទទួលទានស្រាតែមិនទាន់កើតមាន អាការពុលត្រូវបានបញ្ជូនមកសង្គ្រោះនៅមន្ទីរពេទ្យ ។ បាតុភាពពុលបានផ្ទុះឡើងសាជាថ្មីមួយ ទៀត ទៅលើពលរដ្ឋចំនួន៣ភូមិ ក្នុងកោះខ្ញែរ ស្រុកសំបូរវិញម្តង កាលពីថ្ងៃទី១៩ ខែតុលា ។ ការពុលសារជាថ្មីនៅថ្ងៃបន្ទាប់គ្នានេះ បានបង្កឲ្យមានអ្នកភូមិយ៉ាងតិច២នាក់ត្រូវបានពុលស្លាប់ជាបន្តបន្ទាប់ និងមានអ្នកភូមិជាង២០នាក់ទៀត ត្រូវបានជួយសង្គ្រោះ ។ ការពុលបង្កឲ្យមានអ្នកភូមិស្លាប់២នាក់សាជាថ្មីនេះ ត្រូវបាននគរបាលស្រុកសំបូរបញ្ជាក់ថា បានកើតមានឡើងបន្ទាប់ពីអ្នកភូមិបាននាំគ្នាទទួលទានស្រាស នៅក្នុងពិធីកំដរបុណ្យសពនៅក្នុងភូមិ ។
អធិការនគរបាលស្រុកសំបូរលោកវរសេនីយ៍ឯក ប៊ុន ឈឿន បានឲ្យដឹងថា ស្រាសដែលអ្នកភូមិបានទទួលទានក្នុងពិធីកំដរបុណ្យសព និងបានពុលនេះ គឺជាស្រាសដែលផលិត ចេញពីកន្លែងធ្វើអាជីកម្មតែមួយ ដែលសង្ស័យថា មានសារធាតុពុល និងបានដឹកយកមកលក់ចែកចាយដល់ឃុំមួយនេះ ។
ស្របជាមួយគ្នា និងបាតុភាពពុលរហូតបង្កឲ្យមានពលរដ្ឋស្លាប់ និងរងគ្រោះដោយស្ថិតស្ថានភាពស្រវាំងភ្នែក ទន់ដៃទន់ជើងហេវហត់ណែនដើមទ្រូង ដែលអាជ្ញាធរបានកំណត់ថា បណ្តាលមកពីពុលស្រាសនេះ ។
អាជ្ញាធរខេត្តក្រចេះ កាលពីថ្ងៃទី២០ តុលា បានអំពាវនាវឲ្យពលរដ្ឋរស់នៅស្រុកសំបួរ ក៏ដូចជា ពលរដ្ឋរស់នៅតាមតំបន់នានាក្នុងខេត្តក្រចេះបញ្ឈប់ការទទួលទានស្រាសមួយរយៈពេល ។ ជាមួយគ្នានេះអាជីវកម្មលក់ស្រាសមួយចំនួននៅក្នុងភូមិ និងឃុំ នានាក្នុងស្រុកមួយនេះ ត្រូវបានអាជ្ញាធរចុះផ្អាកការធ្វើអាជីវកម្មផលិត និងក៏មានស្រាស និងស្រាថ្នាំជាច្រើនផ្សេង ទៀត គឺត្រូវបានអាជ្ញាធររឹបអូសយកមករក្សាទុក ។
អធិការនគរបាលស្រុកសំបូរលោកប៊ុន ឈឿន ក៏បានឲ្យដឹងទៀតថា បន្ទាប់ពីផ្ទុះបាតុភាពពុលនេះ ម្ចាស់អាជីវកម្មផលិតស្រាសក្នុងឃុំបឹងចារស្រុកសំបូរម្នាក់ឈ្មោះ កុច សុហេង អាយុ៣១ឆ្នាំ ត្រូវបានកម្លាំងនគរបាលឃាត់ខ្លួន និងបញ្ជូនខ្លួនមកស្នងការដ្ឋាន ដើម្បីសាកសួរ ។
បើតាមលទ្ធផលវិភាគមួយរបស់មជ្ឈមណ្ឌលមន្ទីរពិសោធន៍ឧស្សាហកម្មកម្ពុជាបានបង្ហាញឲ្យដឹងនៅថ្ងៃទី២០ តុលានេះ ដោយបានរកឃើញថា ស្រាសដែលអ្នកភូមិបាននាំគ្នាទទួលទានរហូតកើតមានអាការពុលស្លាប់ និងធ្លាក់ខ្លួនឈឺ គឺសុទ្ធសឹងតែមានសារធាតុមេតាណុល និងអេតាណុលច្រើនលើសពីកម្រិតអនុញ្ញាតអតិបរមា ទើបធ្វើឲ្យប៉ះពាល់សុខភាព និងប៉ះពាល់អាយុជីវិតដល់អ្នកទទួលទាន ៕
ចែករំលែកព័តមាននេះ