រាជធានីភ្នំពេញ ៖ ថ្នាំញៀនជាច្រើនកញ្ចប់ត្រូវបានជនសង្ស័យម្នាក់ដាក់នៅក្រោមអង្រឹងលើគ្រែលក់ទាំងព្រឹកដូចលក់បន្លែត្រី សាច់ ដោយមិនខ្លាចញញើតច្បាប់បន្តិចសោះ ប៉ុន្តែសកម្មភាពនោះត្រូវបានប្រជាពលរដ្ឋប្រទះឃើញក៏រាយការណ៍ជូននគរបាលខណ្ឌដង្កោចុះទៅធ្វើការចាប់ខ្លួនភ្លាមៗ កាលពីម៉ោង១០និង៤០នាទីព្រឹក ថ្ងៃទី១៩ ខែតុលា ឆ្នាំ២០១៨…
រាជធានីភ្នំពេញ ៖ ថ្នាំញៀនជាច្រើនកញ្ចប់ត្រូវបានជនសង្ស័យម្នាក់ដាក់នៅក្រោមអង្រឹងលើគ្រែលក់ទាំងព្រឹកដូចលក់បន្លែត្រី សាច់ ដោយមិនខ្លាចញញើតច្បាប់បន្តិចសោះ ប៉ុន្តែសកម្មភាពនោះត្រូវបានប្រជាពលរដ្ឋប្រទះឃើញក៏រាយការណ៍ជូននគរបាលខណ្ឌដង្កោចុះទៅធ្វើការចាប់ខ្លួនភ្លាមៗ កាលពីម៉ោង១០និង៤០នាទីព្រឹក ថ្ងៃទី១៩ ខែតុលា ឆ្នាំ២០១៨ នៅក្នុងផ្ទះគ្មានលេខ សិ្ថតក្នុងភូមិព្រែកថ្លឹង សង្កាត់ជើងឯក ខណ្ឌដង្កោ ។
ជនសង្ស័យឈ្មោះ ទិត្យ ពៅ ភេទប្រុស អាយុ៣៤ឆ្នាំ មុខរបរមិនពិតប្រាកដ មានទីលំនៅសិ្ថតនៅភូមិរលួស សង្កាត់ជើងឯក ខណ្ឌដង្កោ ។
តាមប្រភព័ត៌មានបានឲ្យដឹងថា ជនសង្ស័យខាងលើបានដាក់លក់ថ្នាំញៀននៅលើគ្រែ ហើយបានចងអង្រឹងដេកពីលើរង់ចាំម៉ូយទៅទិញយកទៅប្រើប្រាស់ ប៉ុន្តែសកម្មភាពជួញដូរគ្រឿងញៀនដូចជាការលក់បន្លែ ត្រី សាច់បែបនេះ ត្រូវបានប្រជាពលរដ្ឋប្រទះឃើញក៏រាយការណ៍ជូននគរបាលឲ្យចុះបង្ក្រាប។
ប្រភពដដែលបន្តទៀតថា ក្រោយទទួលដំណឹងនេះភ្លាម លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានបញ្ជាលោកអធិការរងនគរបាល២រូប រួមមានលោកវរសេនីយ៍ទោ សូរ វិសាល និងលោកវរសេនីយ៍ត្រី ជាង ហុកសែ ដឹកនាំកម្លាំងចុះទៅសហការជាមួយលោកអនុសេនីយ៍ឯក មាន វណ្ណថុន នាយប៉ុស្តិ៍នគរបាលរដ្ឋបាលជើងឯក ធ្វើការបង្ក្រាប និងចាប់ខ្លួនជនសង្ស័យខាងលើ ព្រមទាំងដកហូតថ្នាំញៀនចំនួន៦កញ្ចប់, ថង់សម្រាប់ច្រកថ្នាំញៀនមួយចំនួន និងឧបករណ៍ប្រើប្រាស់ថ្នាំញៀនមួយចំនួន និងដែកសម្រាប់ចូកថ្នាំញៀន១ផងដែរ។
ក្រោយពេលចាប់ខ្លួនកម្លាំងនគរបាលបាននាំជនសង្ស័យទៅធ្វើការសួរនាំ និងកសាងសំណុំរឿងនៅអធិការនគរបាលខណ្ឌដង្កោ ដើម្បីបញ្ជូនទៅកាន់សាលដំបូងរាជធានីភ្នំពេញ ដើម្បីចាត់ការតាមច្បាប់៕
ចែករំលែកព័តមាននេះ